જાણવા જેવું / ધોની અને પોન્ટિંગને પછાડીને આ મહિલા બની દુનિયાની નંબર વન કેપ્ટન, એક પછી એક તોડ્યાં મોટા રેકોર્ડ

• ઓસ્ટ્રેલિયાની મહિલા કેપ્ટન મેગ લેનિંગ દુનિયાની ધુઆધાર ખેલાડી
• તેની કેપ્ટનન્સીમાં ઓસ્ટ્રેલિયાએ પાંચમી વાર જીત્યો વર્લ્ડ કપ
• મેગ લેનિંગે  રિકી પોન્ટિંગ અને ધોનીને પાછળ રાખી દીધા 

ઓસ્ટ્રેલિયાની મહિલા ક્રિકેટ ટીમે ફરી એકવાર વર્લ્ડ કપનો ખિતાબ પોતાના નામે કરી લીધો છે. રવિવારે કેપટાઉનમાં દક્ષિણ આફ્રિકા સામે રમાયેલી અંતિમ મેચમાં મેગ લેનિંગની આગેવાનીમાં ઓસ્ટ્રેલિયાએ 19 રનથી જીત મેળવી હતી.

ઓસ્ટ્રેલિયાની સફળતાનો શ્રેય કેપ્ટન મેગ લેનિંગને 
ઓસ્ટ્રેલિયાની સફળતાનો શ્રેય કેપ્ટન મેગ લેનિંગને આપવામાં આવી રહ્યો છે, જેના નેતૃત્વમાં ટીમે 5 વર્લ્ડ કપ જીત્યા છે. જેમાં ચાર ટી-20 વર્લ્ડ કપ અને એક વન ડે વર્લ્ડકપનો સમાવેશ થાય છે. તેમજ કોમનવેલ્થ ગેમ્સનો ગોલ્ડ મેડલ પણ ઓસ્ટ્રેલિયાએ તેમની આગેવાનીમાં જીત્યો હતો. નવાઈની વાત એ છે કે, મેન્સ ક્રિકેટ હોય કે વિમેન્સ ક્રિકેટ, આજદિન સુધી કોઈ કેપ્ટન આટલા બધા આઇસીસી ટાઈટલ જીતી શક્યો નથી.

મહિલા ક્રિકેટમાં ઓસ્ટ્રેલિયાએ 13મું વર્લ્ડ કપ ટાઇટલ 
આ રેકોર્ડની વાત કરીએ તો મેગ લેનિંગે ઓસ્ટ્રેલિયાના રિકી પોન્ટિંગ અને ભારતના મહેન્દ્ર સિંહ ધોનીને પાછળ છોડી દીધા છે. રિકી પોન્ટિંગના નેતૃત્વમાં ઓસ્ટ્રેલિયાએ 4 ટાઇટલ (2 વર્લ્ડ કપ, 2 ચેમ્પિયન્સ ટ્રોફી) જીત્યા છે, જ્યારે એમએસ ધોનીના નામે 3 ટાઈટલ (એક વન-ડે વર્લ્ડકપ, એક ટી-20 વર્લ્ડ કપ અને એક ચેમ્પિયન્સ ટ્રોફી) છે.

માત્ર 30 વર્ષની ઉંમરે ક્રિકેટમાં તહેલકો મચાવ્યો મેગ લેનિંગે 
મેગ લેનિંગની ઉંમર માત્ર 30 વર્ષની જ છે અને તે માત્ર કેપ્ટન્સીની રીતે જ નહિ પણ બેટીંગની બાબતમાં પણ ક્રિકેટના લેજન્ડ છે. આંતરરાષ્ટ્રીય ક્રિકેટમાં મેગ લેનિંગના નામે 17 સદી છે, જે એક રેકોર્ડ છે. તેણે 15 વન ડે સદી અને 2 ટી20 સદી ફટકારી છે. મેગ લેનિંગની કારકિર્દી પર નજર નાખીએ તો તેણે અત્યાર સુધી 103 વન ડેમાં 4602 રન બનાવ્યા છે, જેમાં 53.13ની સરેરાશ રહી છે. જ્યારે તેણે 132 ટી-20 મેચમાં 3405 રન બનાવ્યા છે, આ દરમિયાન તેની એવરેજ 36.22ની રહી છે. કેપ્ટનશિપ ઉપરાંત તે એક ખેલાડી તરીકે વર્લ્ડ કપ પણ જીતી ચૂકી છે, આ સિવાય તેણે આઇસીસીના તમામ મોટા એવોર્ડ જીત્યા છે.

મેગ લેનિંગના મુખ્ય ટાઈટલ્સ -
• કોમનવેલ્થ ગેમ્સ 2022 - ગોલ્ડ મેડલ (કેપ્ટન)
• આઇસીસી વર્લ્ડ કપ - 2013, 2022 (કેપ્ટન)
• આઇસીસી ટી -20 વર્લ્ડ કપ - 2012, 2014, 2018, 2020, 2023 (છેલ્લા 4 માં કેપ્ટન)