ગેમ ઑફ ગુજરાત / સૌરાષ્ટ્ર સર કરવા સી.આર.પાટીલ એક્શનમાં: આ કારણોસર યોજી તાબડતોબ બેઠક, જૂના નેતા ફરી સક્રિય કર્યા

• રાજકોટ કમલમ કાર્યાલય ખાતે સી.આર.પાટીલે યોજી બેઠક
• રાજકોટ શહેર-જિલ્લાની 8 બેઠકોને લઈને યોજી બેઠક
• મતદાન પહેલા શું સ્થિતિ છે તેની ચર્ચા થશેઃ પાટીલ

ગુજરાત વિધાનસભાની પ્રથમ તબક્કાની ચૂંટણીનું કાઉન્ટડાઉન શરૂ થઈ ગયું છે. પ્રથમ તબક્કાના મતદાનના પ્રચારનો આજે અંતિમ દિવસ છે. આજે સાંજે 5 વાગ્યે જાહેર પ્રચાર પર પડદો પડે એ પહેલાં આજે રાજકીય પક્ષોના દિગ્ગજ નેતાઓ સૌરાષ્ટ્ર-દ.ગુજરાતમાં ઉપરા-ઉપરી સભા ગજવી રહ્યા છે. ચૂંટણી પ્રચારના ધમધમાટ વચ્ચે આજે રાજકોટ કમલમ કાર્યાલય ખાતે ભાજપના પ્રદેશ પ્રમુખ સી.આર.પાટીલે બેઠક યોજી છે. રાજકોટ શહેર-જિલ્લાની 8 બેઠકોને લઈને કાર્યાલય ખાતે બેઠક યોજવામાં આવી છે. 

8 બેઠકો મામલે કરીશું ચર્ચાઃ પાટીલ
બેઠક પહેલા સી.આર પાટીલે મીડિયાને જણાવ્યું હતું કે, 'ગુજરાત વિધાનસભાની  પ્રથમની ચૂંટણીનું મતદાન 1લી ડિસેમ્બરના રોજ થવા જઈ રહ્યું છે. આજે સાંજે પ્રચાર પણ બંધ થઈ જશે, જેથી રાજકોટ શહેર-જિલ્લાની 8 બેઠકોને લઈને સમીક્ષા બેઠક યોજાવા જઈ રહી છે. જેમાં મતદાન પહેલા શું સ્થિતિ છે તેની ચર્ચા કરવામાં આવશે. આ બેઠક પૂર્ણ થયા બાદ હું ભરૂચ જવા રવાના થઈશ.'

સૌરાષ્ટ્રમાં ભાજપના જૂના નેતા ફરી સક્રિય થયા 
પ્રથમ તબક્કાના મતદાન પહેલા સૌરાષ્ટ્રમાં ભાજપના જૂના જોગી ફરી સક્રિય થયા છે. રાજકોટ-પ્રદેશ ભાજપના પૂર્વ સંગઠન મહામંત્રી અને હાલના બિહારના સંગઠન મહામંત્રી ભીખુ દલસાણિયા સૌરાષ્ટ્રમાં સક્રિય થયા છે. મતદાનના બે દિવસ પહેલાં ભીખુ દલસાણીયા રાજકોટ કમલમ ખાતે પહોંચ્યા હતા, જ્યાં તેમની સાથે સી.આર પાટીલ પણ બેઠકમાં ઉપસ્થિતિ રહેલાં જોવા મળ્યા. 

બે તબક્કામાં યોજાશે ચૂંટણી
ગુજરાતમાં બે તબક્કામાં ચૂંટણી યોજાવા જઈ રહી છે. પ્રથમ તબક્કાની 89 બેઠકો માટે  1 ડિસેમ્બરના રોજ મતદાન થશે, આ માટે કુલ 788 ઉમેદવારો ચૂંટણીના મેદાનમાં છે. જ્યારે બીજા તબક્કાની 93 બેઠકો માટે 5 ડિસેમ્બરના રોજ મતદાન થશે. બીજા તબક્કાની 93 બેઠકો માટે 833 ઉમેદવારો મેદાનમાં છે.  આમ ગુજરાત વિધાનસભાની 182 બેઠકો માટે કુલ 1621 ઉમેદવારો મેદાનમાં છે.

પ્રથમ તબક્કામાં કયા જિલ્લામાં મતદાન ? 
કચ્છ, દ્વારકા, પોરબંદર, જામનગર, ભાવનગર, જૂનાગઢ, રાજકોટ, બોટાદ, મોરબી, અમરેલી, ગીર સોમનાથ, સુરેન્દ્રનગર, ભરૂચ, નર્મદા, સુરત, તાપી, નવસારી, ડાંગ , વલસાડ.

બીજા તબક્કામાં કયા જિલ્લામાં મતદાન ? 
અમદાવાદ, ગાંધીનગર, મહીસાગર, મહેસાણા, પાટણ, બનાસકાંઠા, સાબરકાંઠા, અરવલ્લી, પંચમહાલ, આણંદ, ખેડા, છોટા ઉદેપુર, દાહોદ, વડોદરા.