પશ્ચિમ બંગાળના કોલકાતા મેડિકલ કોલેજમાં ડોકટરો પર થયેલા હુમલાને લઇને દેશભરના તબીબોમાં રોષ જોવા મળી રહ્યો છે. દિલ્લી એઇમ્સ સહિત દેશભરમાં સરકારી અને ખાનગી ડોકટરોને આજરોજ એક દિવસની હડતાળમાં જોડાવા અપીલ કરવામાં આવી છે.
ત્યારબાદ દિલ્લીના એઇમ્સના આરડીએ દ્વારા દિવસભર હડતાળમાં જોડાવાની જાહેરાત કરી છે. આમ હડતાળના કારણે ઓપીડી તેમજ ઇમરજન્સી સેવા પ્રભાવિત થશે. આ અગાઉ રાયપુર એઇમ્સ દ્વારા પણ ગુરૂવારે સાંજે હડતાળમાં જોડાવાની જાહેરાત કરાઇ હતી.
દિલ્લી મેડિકલ એસોસિયેશને રાજધાનીમાં આવેલ ખાનગી અને સરકારી હોસ્પિટલ, ક્લિનિક તેમજ નર્સિંગ હોમને પત્ર લખી દેશવ્યાપી મેડિકલ બંધને સમર્થન આપવા અપીલ કરી છે. એસોસિયેશનના અધ્યક્ષ અને દિલ્લી મેડિકલ કાઉન્સિલના સચિવ ડો. ગિરીશ ત્યાગીએ જણાવ્યું કે પશ્ચિમ બંગાળમાં કાયદો વ્યવસ્થા કથળી છે.
એક ડોકટર ઓછા સાધનો સાથે 15થી 16 કલાક સુધી હોસ્પિટલમાં બેસીને 300થી 500 દર્દીઓની સારવાર કરે છે, પરંતુ તેમ છતાં ડોકટરને હિંસાનો શિકાર બનવું પડે છે. તેમણે જણાવ્યું કે કોલકતા મેડિકલ કોલેજમાં ડોકટર પર થયેલો હુમલો ચિકિત્સા ક્ષેત્ર માટે ચિંતાજનક છે.
એઇમ્સ આરડીએ અધ્યક્ષ ડો. અમરિંદર સિંહએ જણાવ્યું કે પશ્ચિમ બંગાળના મુખ્યમંત્રી મમતા બેનર્જી ડોકટરોને ન્યાય અપવાની જગ્યાએ કાયદા બતાવી ધમકાવી રહ્યાં છે. દેશભરમાં ડોકટરોની સુરક્ષાને લઇને સવાલ ઉભો થયો છે.