રાજકોટ સિવિલનો મેડિકલ ઓફિસર નશાની હાલતમાં ઝડપાયો છે. આ મામલે સિવિલ હોસ્પિટલના ઇન્ચાર્જ અધિક્ષક ડો. એસ.પી.રાઠોડનું નિવેદન સામે આવ્યું છે. તેમણે જણાવ્યું છે કે, સત્ય પુરવાર થશે તો કડક પગલા લેવામાં આવશે.
રાજકોટમાં દારૂબંધીના ધજાગરા ઉડ્યા
તબીબ સિવિલમાં જ કરતો હતો દારૂનું સેવન
તબીબ રૂમમાંથી 150 ML દારૂ મળી આવ્યો
રાજકોટ સિવિલ હોસ્પિટલનો મેડિકલ ઓફિસર સાહિલ ખોખર નશાની હાલતમાં ઝડપાયો હતો. પોલીસે ડોક્ટર રૂમની તલાશી લેતા તેના કબાટના ખાનામાંથી દારૂનો જથ્થો પણ મળી આવ્યો હતો. હાલ ક્રાઇમ બ્રાન્ચે સાહિલ ખોખર વિરુદ્ધ ફરિયાદ નોંધી કાર્યવાહી હાથ ધરી છે. આ મામલે સિવિલ હોસ્પિટલના ઇન્ચાર્જ અધિક્ષક ડો.સુરેશ રાઠોડનું નિવેદન સામે આવ્યું છે.
24 કલાકમાં તપાસ કમિટી પોતાની તપાસ કરશે પૂર્ણઃ સુરેશ રાઠોડ
ડો.સુરેશ રાઠોડે જણાવ્યું કે, ફી પદાર્થ પી ફરજ નિભાવવી તે ગુનાહિત કૃત્ય ગણાય છે. સમગ્ર મામલાની તપાસ માટે કમિટી બનાવવામાં આવી છે. તપાસ કમિટીમાં 3 અધિકારીઓ છે. તપાસ કમિટીના સભ્યોમાં RMO સહિતના 3 અધિકારીઓ છે. 24 કલાકમાં તપાસ કમિટી પોતાની તપાસ પૂર્ણ કરાશે. હકીકત સત્ય પુરવાર થશે તો કડક પગલા લેવામાં આવશે. આ બાબતની મને જાણ પ્રેસ મીડિયાના માધ્યમથી થઈ છે. સમગ્ર ઘટનાના સીસીટીવી મેં જોયા નથી. તબીબ 11 માસના કરાર આધારિત ફરજ બજાવી રહ્યા છે. તબીબ સાથે ફરજ બજાવનારા કર્મીઓના નિવેદન નોંધવાની કામગીરી ચાલી રહી છે.
કબાટમાંથી મળી આવ્યો હતો દારૂ
અત્રે ઉલ્લેખનીય છે કે, રાજકોટ ક્રાઈમ બ્રાન્ચે સિવિલ હોસ્પિટલમાં દરોડા પાડ્યા હતા. જ્યાં મેડિકલ ઓફિસર તરીકે ફરજ બજાવતો ડો.સાહિલ ખોખર નામનો તબીબ નશાની હાલતમાં મળી આવ્યો હતો. જે બાદ ડો.સાહિલ ખોખરને કેસબારીની સામે આવેલા ડોક્ટર રૂમમાં લઇ જવાયો હતો, જ્યાં લાકડાંના કબાટમાં તેનું ખાનું ખોલાવતાં જ પાણીની બોટલમાં દારૂ ભરેલો મળ્યો હતો. હાલ સમગ્ર મામલે FIR ફાઈલ કરવામાં આવી છે અને કાયદેસરની કાર્યવાહી હાથ ધરવામાં આવી છે.
સળગતા સવાલ
- સિવિલમાં દારૂનો નશો કરનારા તબીબ વિરુદ્ધ કાર્યવાહી થશે?
- શું સાહિલ ખોખરની જેમ રાજકોટ સિવિલમાં અન્ય કોઈ તબીબો પણ નશો કરે છે?
- સાહિલ ખોખરને દારૂ કોણે આપ્યો?
- સિવિલના સત્તાધીશો સાહિલ વિરુદ્ધ કાર્યવાહી કરશે?
- હોસ્પિટલમાં નશો કરીને દર્દીના જીવ સાથે ચેડા કેમ?
- રાજ્યમાં દારૂબંધીનો કડક અમલ કેમ નથી થતો?
- પોલીસના સઘન ચેકિંગ બાદ પણ રાજ્યમાં દારૂ કેવી રીતે આવે છે?
- શું પોલીસ અને બુટલેગરો વચ્ચે સાંઠગાંઠ છે?
- શું બુટલેગરો પોલીસને હપ્તો આપે છે?
- પોલીસ દારૂનો નશો કરનારા તબીબની ધરપકડ કરશે?