પુરસ્કાર / ગુજરાતના 19 પોલીસ અધિકારી-જવાનોને ચંદ્રક એનાયત થશે, પ્રજાસત્તાક દિવસની પૂર્વ સંધ્યાએ થઈ જાહેરાત

• ગુજરાતના 19 પોલીસ અધિકારી-જવાનોને પોલીસ ચંદ્રક એનાયત કરાશે
• 72મા પ્રજાસત્તાક દિવસની પૂર્વ સંધ્યાએ જાહેર કરાયા નામ
• બે IGP, 6 DySP, 4 PI, 4 ASI, બે હેડ કોન્સ્ટેબલ અને એક કોન્સ્ટેબલને રાષ્ટ્રપતિ મેડલ 

26 જાન્યુઆરી 2021ના દિવસે 72મા પ્રજાસત્તાક દિવસની ઉજવણી થઈ રહી છે. ત્યારે દેશની સરહદ પર આર્મી જવાનો પોતાની ફરજ દેશજનો માટે નિભાવી રહ્યા છે. પરંતુ દેશની અંદર પણ પોલીસ જવાનો પોતાની ફરજ પર કાયમ છે. આવા કેટલાક પોલીસ અધિકારીઓને તેમની ઉત્તમ કામગીરી બદલ રાષ્ટ્રપતિ દ્વારા પોલીસ ચંદ્રકો આપવામાં આવે છે. 72મા પ્રજાસત્તાક દિવસની પૂર્વ સંધ્યાએ વિશિષ્ટ પોલીસ જવાનોની યાદી જાહેર કરાઈ છે. જેમાં ગુજરાતના 19 પોલીસ જવાનોને આ વખતે ચંદ્રકથી ભૂષિત કરાશે. 

પોલીસ ચંદ્રક માટે IG કક્ષાના બે અધિકારી, DySP કક્ષાના 6 અધિકારીની પસંદગી કરવામાં આવી છે. તો આ સાથે SRPમાં ફરજ બજાવતા DySP કે.પી પટેલને પણ પુરસ્કારથી સન્માનિત કરાશે. કે.પી પટેલ PIના પદ પરથી પોતાની સારી કામગીરી બાદ DySPના પદ પર પહોંચ્યા હતા. જ્યારે હવે તેમને પોલીસ ચંદ્રક પ્રાપ્ત થઈ રહ્યો છે. 

આ સાથે PI કક્ષાના 4 પોલીસ કર્મચારીઓને પણ પોલીસ ચંદ્રકથી સન્માનિત કરવામાં આવશે. તેમની સાથે 4 ASI પદના કર્મચારીઓને પણ રાષ્ટ્રપતિ દ્વારા આપવામાં આવતા આ ચંદ્રકથી નવાઝવામાં આવશે. તો હિંમતસિંહ બમણિયા અને યોગેન્દ્ર કોસડા નામના હેડ કોન્સ્ટેબલની સાથે નારણભાઈ પમ્પાણીયા કોન્સ્ટેબલને પણ તેમની ઉત્કૃષ્ટ કામગીરી બદલ પોલીસ ચંદ્રક પ્રાપ્ત થશે.