VIDEO / ગુજરાતમાં આજથી MBBSના વિદ્યાર્થીઓ હડતાળ પર, જાણો ક્યાં શું છે સ્થિતિ

• સમગ્ર ગુજરાતના ઇન્ટર્ન ડોક્ટર ઉતરશે હડતાળ પર 
• સોમવારે MBBS ઇન્ટર્ન ડોકટર હડતાળ પર 
• 300 જેટલા ઈન્ટર્ન તબીબો કોરોના સંક્રમિત થયા

ગુજરાતની તમામ સરકારી તેમજ GMERS અને મ્યુનિસિપલ મેડિકલ કોલેજના ઈન્ટર્ન તબીબો 14મી ડિસેમ્બરના સોમવારથી અચોક્કસ મુદ્તની હડતાળ પર ઊતરશે. ઈન્ટર્ન તબીબોને અત્યારે માંડ 12,800 સ્ટાઈપેન્ડ અપાય છે. જે વધારીને ઓછામાં ઓછું 20,000 કરી આપવામાં આવે તે સહિતની વિવિધ ત્રણ માગણીઓ સાથે ગુજરાતના બે હજારથી વધુ ઈન્ટર્ન તબીબો આ હડતાળમાં જોડાશે, હડતાળને પગલે કોવિડ દર્દીઓને પણ હાલાકી થાય તેવી સ્થિતિ સર્જાશે.

શહેરોમાં હડતાળ શરૂ

રાજકોટમાં 170 તબીબ વિદ્યાર્થીઓ હડતાળમાં જોડાયા છે. વડોદરામાં પણ સયાજી હોસ્પિટલના 180 અને ગોત્રી હોસ્પિટલના 100 તબીબોની હડતાળ પર ઉતર્યા છે. અમદાવાદમાં પણ MBBS વિદ્યાર્થીઓ હડતાળ પર ઉતર્યા છે. 

અમદાવાદ BJ મેડિકલના ડિનનું નિવેદન

અમદાવાદ સિવિલના MBBS ઇન્ટર્ન તબીબોની હડતાળને લઈને બી.જે મેડિકલ કોલેજના ડીનનું નિવેદન સામે આવ્યું હતુ તેમણે જણાવ્યું હતુ કે, 15 દિવસ પેહલા ઈન્ટર્ન ડોક્ટર મળવા આવ્યા હતા અને રજૂઆત કરી હતી. હાલ દરેક ઇન્ટર્ન ડોક્ટરને 500 સ્ટાઇપેન્ડ મળે છે. ઇન્ટર્નની માંગ રૂપિયા 1000ના સ્ટાઇપેન્ડની છે અમે આ અંગે DyCMને રજૂઆત કરી છે છતાં હડતાળ પર ઉતર્યા છે. કોલેજ વતી અમે DyCMને ફરી રજૂઆત કરીશુ. 
 

ઇન્ટર્ન ડોક્ટર્સની માંગ શું?
 

• સ્ટાઇપેન્ડ 12,800થી વધારી 20 હજાર કરવામાં આવે
• કોવિડ ડ્યુટી બદલ ઇન્સેન્ટિવ આપવામાં આવે 
• કોવિડમાં ફરજ બદલ પ્રતિદિન 1 હજાર પ્રોત્સાહન વેતન અપાય
• વધારાનું એરિયર્સ એપ્રિલ મહિનાથી  આપવામાં આવે 
• ઇન્ટર્નશિપ સમયગાળાને બોન્ડ સમયગાળા સાથે ગણવામાં આવે
• ઇન્ટર્નશિપ પૂર્ણ થતા બોન્ડ મુક્ત ગણવાની પણ માગ

300 જેટલા ઈન્ટર્ન તબીબો કોરોના સંક્રમિત થયા

ઈન્ટર્ન તબીબો કોરોનામાં છેલ્લા નવ મહિનાથી સતત કામ કરી રહ્યા છે, અત્યાર સુધીમાં 300 જેટલા ઈન્ટર્ન તબીબો કોરોના સંક્રમિત થયા છે. આ તબીબો સ્ટાઈપેન્ડ વધારવા માટે રાજ્ય સરકાર સમક્ષ રજૂઆતો કરી ચૂક્યા છે પરંતુ કોઈ ઉકેલ ના આવતાં હવે અચોક્કસ મુદ્તની હડતાળ પાળવાનું નક્કી કર્યુ છે. ઈન્ટર્ન તબીબોની એવી પણ માગ છે કે, તેઓ એપ્રિલ મહિનાથી સતત ફરજ બજાવી રહ્યા છે.

ફરજ પરના આ સમયગાળાને બોન્ડ સમયગાળામાં 1-1 ગણીને ઈન્ટર્નશીપ પૂરી થયે, તમામ ઈન્ટર્ન તબીબોને બોન્ડ મુક્ત ગણવા જોઈએ, આ ઉપરાંત કોવિડ ફરજમાં પ્રોત્સાહિત માનદ વેતન રૂપે પ્રતિ દિન ઓછામાં ઓછું એક હજાર લેખે આપવામાં આવે. દિલ્હીની સરકારે ઈન્ટર્નને આઠ કલાકની પાળીના એક હજાર અને 12 કલાક માટે બે હજાર માનદ્ વેતન જાહેર કર્યું છે. જ્યારે અમદાવાદ મ્યુનિ. કોર્પોરેશન તથા મેડિકલ ડેન્ટલ તથા ર્નિંસગના વિદ્યાર્થીઓ અને ઈન્ટર્ન તબીબોને સ્ટાઈપેન્ડ ઉપરાંત માનદવેતન રૂપે રોજના 500 આપવામાં આવે છે.