ભરૂચના MBBS થયેલા યુવાનને પોસ્ટ ગ્રેજ્યુએટ MS કે MD માટે મુંબઈ કોર્પોરેશનની સાયન હોસ્પિટલ એન્ડ મેડિકલ કોલેજમાં એડમિશનના નામે મુન્નાભાઈઓની ટોળકીએ મામુ બનાવી રૂપિયા 43 લાખ પડાવી લીધા હોવાની ઘટનામાં ભરૂચ પોલીસે મુંબઈ સાયન હોસ્પિટલના પૂર્વ ડે. ડીન સહિત તેના પન્ટરની ધરપકડ કરી છે. ભરૂચની ભજ્જુવાલા સોસાયટીમાં રહેતાં અને નિવૃત્ત જીવન ગુજારતાં આદમવલી પટેલના પુત્ર મોહસિને MBBSનો અભ્યાસ પુર્ણ કર્યાં બાદ તે પોસ્ટ ગ્રેજ્યુએશનની તૈયારીઓ કરી રહ્યો હતો પરતું ઠગબાજોની ટોળકીનો શિકાર બની ગોય.
કોલેજના ડીન સાથે વાત કરાવી શકે કહી ઠગાઈ કરતા
મહત્વનું છે કે ગત વર્ષ જૂલાઇ મહિનામાં એક શખ્સ તેમના મોબાઇલ પર ફોન કરી પોતાની રિતમ શર્મા તરીકેની ઓળખ આપી તેમની સાથે વાત કરી હતી. આદમભાઈને જણાવ્યું હતું કે, તેમના પુત્ર મોહસીનનું મુંબઇ મહાનગરપાલિકામાં સાયન હોસ્પિટલ ઇન સર્વિસ કોટામાં એડમિશન કરાવી આપી શકે છે. તેમજ સાયન લોકમાન્ય તિલક હોસ્પિટલ એન્ડ મેડિકલ કોલેજના ડીન સાથે તેઓ વાત કરાવી શકે છે. ત્યાર બાદ તેમ વાતોમાં ભોળવતાં તેઓ પરિવાર સાથે મુંબઇ ગયાં હતાં. જ્યાં ડો. રાકેશ વર્મા, લવકુમાર ગુપ્તા, વિશાલ રાદરિયા, મુકેશ મિશ્રા, આદિત્ય અને સાગર નામના શખ્સોને હોસ્પિટલના ડેપ્યુટી ડીન તેમજ હોસ્પિટલના અલગ અલગ કર્મચારીઓ તરીકે ઓળખ કરાવી હતી.
મુંબઈમાં એડમિશન અપાવાનું કહી 43 લાખ ખંખેરી લીધા
જે બાદ પહેલાં રૂપિયા 60 લાખમાં અને બાદમાં 43 લાખમાં રૂરિયામાં એડમિશન આપવાનું ફાઇનલ કર્યું હતું. જેના પગલે તેઓએ તબક્કાવાર રીતે તેમને આંગડિયામાંથી તેમજ RTGS થી તમામ રૂપિયા ચુકવ્યાં હતાં. જોકે, બાદમાં ડપ્યુટી ડીન તરીકે મળેલાં રાકેશ વર્માને સસ્પેન્ડ કર્યાં હોવાનું તેમજ હોસ્પિટલે આ પ્રકારનું કોઇ એડમિશન આપ્યું ન હોવાનું માલુમ પડતાં તેમની સાથે ઠગાઇ થઇ હોવાનું જણાયું હતું. જેના પગલે આદમભાઈ એ આખરે ભરૂચ બી ડિવિઝન પોલીસ મથકે માર્ચ મહિનામાં ફરિયાદ નોંધાવી હતી જોકે સમગ્ર મામલે પોલીસે ગુનો નોંધી આગળની કાર્યવાહી હાથ ધરી હતી.
ભરૂચ પોલીસે બે આરોપીઓની કરી ધરપકડ
પોલીસે તપાસ કરતા સમગ્ર મામલો સામે આવ્યો હતો જેમાં મુંબઈની આર્થર રોડ જેલમાંથી મેડિકલમાં PG માટે પ્રવેશ અપાવવાના બહાને રેકેટ ચલાવામાં આવતું હતું પોલીસે હકાલ પટ્ટી કરાયેલા ડેપ્યુટી ડીન ડો. રાકેશ રામનારાયણ વર્મા અને તેના પન્ટર લવ અવધકિશોર ગુપ્તાની ભરૂચ પોલીસે ટ્રાન્સફર વોરંટથી કબજો મેળવી વધુ તપાસ હાથ ધરી છે. હાલ તો પોલીસે તમામ વિરુદ્ધ ગુનોં નોંધી આગળની કાર્યવાહી હાથ ધરી છે.
આ ટોળકી ઓછા રેન્કિંગવાળા સ્ટુડન્ટને શિકાર બનાવતી
ભરૂચ ASP વિકાસ સુંડાએ જણાવ્યું હતું કે, મેડિકલમાં પ્રવેશના નામે આ ટોળકી ઓછા રેન્કિંગવાળા સ્ટુડન્ટને શિકાર બનાવતી હતી. બેઠકો ભરાઈ ગયા બાદ જે તે કોલેજની ખાલી રહેલી બેઠકો ઉપર પ્રવેશના નામે ખેલ ખેલાતો હતો. દેશભરમાં ટોળકી સામે મેડિકલમાં પ્રવેશના નામે લાખોની ઠગાઈ કરાયાના 8 થી 10 ગુના નોંધાયેલા છે. ગેંગના કેટલાક સભ્યો વોન્ટેડ છે તો કેટલાક હાલ જેલમાં છે.