પ્રેરણા / 21 વર્ષનો આ યુવાન બન્યો જજ, રાજ્યની ન્યાયાધીશ પરીક્ષામાં છે ટોપર

• રાજસ્થાન જ્યુડીશ્યલ સર્વિસીસમાં 21 વર્ષની ઉંમરે ટોપર બન્યો મયંક 
• સિલેક્શન વખતે તેણે કહ્યું કે નાની ઉંમરના કારણે લાંબા સમય સુધી ફરજ બજાવી શકશે

રાજસ્થાન જ્યુડીશ્યલ સર્વિસીસમાં 21 વર્ષની ઉંમરે ટોપર બનેલા મયંક પ્રતાપ સિંહે વિક્રમ રચી દીધો છે. મયંકે એક પ્રસિદ્ધ ન્યુઝ એજન્સી સાથે વાતચીતમાં જણાવ્યું હતું કે તેને રાજસ્થાન જ્યુડીશ્યલ સર્વિસીસની પરીક્ષાની તૈયારીમાં ઘણી મુશ્કેલીઓનો સામનો કરવો પડ્યો હતો. 

મયંકે જણાવ્યું હતું કે તે ખૂબ ખુશ છે કે તેણે ટોચનો ક્રમ મેળવ્યો છે. તેને અંદાજ હતો કે તેની પસંદગી તો થઇ જ જશે પણ તેને આ પરિણામની અપેક્ષા નહોતી. તેના અને તેના પરિવાર માટે આ ખૂબ સારા સમાચાર છે. આ મયંક માટે ખૂબ અઘરો માર્ગ રહ્યો હતો. તે પોતાની કોલેજનું ભણતર પૂરું કરીને છેલ્લા વર્ષમાં હતો ત્યાર બાદ તેણે આ તૈયારી શરુ કરી હતી. આમ તેણે પોતાની કોલેજના અભ્યાસ ઉપર પણ ધ્યાન આપવું પડે તેમ હતું. મયંક દિવસના 11 થી 12 કલાકની તૈયારી કરતો હતો. તે પરીક્ષા પહેલા જ તેનો આખો કોર્ષ વંચાઈ જાય એ ગણતરીથી તૈયારી કરી રહ્યો હતો.

પોતાની જાતને ભાગ્યવાન ગણે છે મયંક

21 વર્ષીય મયંકે એમ પણ જણાવ્યું હતું કે રાજસ્થાન હાઇકોર્ટે લઘુત્તમ વય મર્યાદા 23 થી ઘટાડીને 21 કરી હતી જે મયંક માટે ફાયદાકારક રહ્યું હતું. મયંક પોતાની જાતને આ અંગે નસીબદાર ગણે છે કારણ કે પહેલી જાહેરાતમાં તે પોતાની ઉંમરના કારણે અરજી આપી શક્યો નહોતો. 

મયંકે રાજસ્થાન યુનિવર્સીટીમાં 5 વર્ષનો BA LLBનો કોર્સ કર્યો છે. તેણે જણાવ્યું હતું કે 12માં ધોરણથી તે જ્યુડિશ્યરીને સમાજનું સૌથી અગત્યનું અંગ માનતો હતો. તે ન્યાયાલયોમાં પેન્ડિંગ કેસોમાં પોતાનું યોગદાન આપવા માંગતો હતો. 

શું છે જજ બનવા માટે સૌથી મહત્વનો ગુણ?

સારા ન્યાયાધીશની સૌથી મહત્વની લાયકાત મયંકના મતે 'ઈમાનદારી' છે. ઈમાનદારીથી પ્રજાને ન્યાયપાલિકામાં વિશ્વાસ બેસે છે. સામાજિક મુદ્દાઓ માટે સંવેદનશીલતા ન્યાયાધીશ માટે ખૂબ જરૂરી છે. આ ઉપરાંત મહિલાઓ અને નાના બાળકોને લગતા ચુકાદાઓમાં ન્યાયાધીશે નિષ્પક્ષ રહેવું ખૂબ જરૂરી છે ત્યારે જ તે ભેદભાવ રહિત ચુકાદો આપી શકે છે.

મયંકના મતે આજે સમાજમાં એવા ઘણા પરિબળો છે જે ન્યાયાધીશોને પ્રભાવિત કરી શકે છે. કોઈ પણ પ્રકારની શેહ શરમ, લોભ લાલચ કે કોઈ પ્રકારનો ડર રાખ્યા વિના જજ પોતાનો ચુકાદો આપે તે જરૂરી છે. 

પોતાની નાની ઉંમર માટે મયંકને ખુશી છે કે તે લાંબા સમય સુધી સેવા આપી શકશે અને સમાજ કલ્યાણનું નેક કાર્ય કરી શકશે. પોતાના શોખ બાબતે મયંકે જણાવ્યું હતું કે તેને પુસ્તકો વાંચવા ખૂબ પસંદ છે. આ ઉપરાંત તેને મહિલાઓ અને બાળકોને લગતા સમાજ સેવાના કામો કરવા પસંદ છે.