IndvsAus: મયંક અગ્રવાલે ડેબ્યુ ટેસ્ટમાં અડધી સદી ફટકારી રચ્યો ઇતિહાસ

બોક્સિંગ ડે પર આજથી ભારત-ઓસ્ટ્રેલિયા વચ્ચે ત્રીજી ટેસ્ટ મેચનો પ્રારંભ થઇ ગયો છે. ચાર ટેસ્ટ મેચની શ્રેણીની ત્રીજી મેચ મેલબોર્ન ખાતે રમાઇ રહી છે. જેમાં ભારત તરફથી મયંક અગ્રવાલે આંતરરાષ્ટ્રીય ટેસ્ટ ક્રિકેટની શરૂઆત કરી છે.

જેમાં ટીમ ઇન્ડિયા તરફથી મયંક અગ્રવાલે ઓપનિંગ કર્યું હતું. જ્યારે મયંક અગ્રવાલે પોતાની પ્રથમ ટેસ્ટ મેચ રમતા લંચ પહેલા બાઉન્ડ્રી ફટકારી પોતાની અડધી સદી નોંધાવી હતી. તેની સાથે જ મયંક અગ્રવાલે ઇતિહાસ રચી દીધો છે.

મયંક અગ્રવાલ ઓસ્ટ્રેલિયામાં ડેબ્યુ ટેસ્ટમાં અડધી સદી ફટકારનાર બીજો ખેલાડી બન્યો છે. જો કે ટી પહેલા કમિન્સે તેને અંગત 76 રન પર આઉટ કરી દીધો છે. ઉલ્લેખનીય છે કે મયંક અગ્રવાલ પહેલા ભારત તરફથી દત્તાત્રેય ગજાનન (દત્તુ) ફાડકરે ડેબ્યુ ટેસ્ટમાં અડધી સદી ફટકારી હતી.

દત્તુએ 1947-48માં ઓસ્ટ્રેલિયા પ્રવાસમાં સિડની ખાતે 51 રનની ઇનિંગ્સ રમી હતી. દત્તુએ 12 ડિસેમ્બર 1947માં શરૂ થયેલી ટેસ્ટ મેચમાં અડધી સદી મારી હતી.

ઓસ્ટ્રેલિયાની ધરતી પર ડેબ્યુ ટેસ્ટમાં પ્રથમ ઇનિંગ્સમાં હાફ સેન્ચુરી લગાવનાર બીજો ભારતીય ખેલાડી છે. આ અગાઉ બુધવારના રોજ મેલબોર્નમાં ભારતે ટોસ જીતીને પ્રથમ બેટિંગનો નિર્ણય કર્યો છે.

ભારતીય ટીમમાં ત્રણ ફેરફાર કરવામાં આવ્યાં છે. ખરાબ ફોર્મના કારણે મુરલી વિજય અને લોકેશ રાહુલને ટીમમાંથી બહાર બેસાડવામાં આવ્યાં છે.