બેજવાબદાર / અમદાવાદ MAY I HELP YOU પોલીસ ડેસ્કને જ હેલ્પની જરૂર, પોલીસ કર્મચારીનો મૂડ હશે તો જવાબ મળશે, આશયનું બાળમરણ

• પોલીસ સ્ટેશનમાં મૂકેલાં MAY I HELP YOUનાં ડેસ્કને હેલ્પની જરૂર 
• MAY I HELP YOUનાં ડેસ્ક પોલીસ સ્ટેશનના ગેટ પાસે રાખવામાં આવ્યાં હતાં
• શહેરનાં તમામ પોલીસ સ્ટેશનમાં ‘મે આઈ હેલ્પ યુ’નાં બોક્સ માત્ર નામ પૂરતાં

અમદાવાદમાં સામાન્ય રીતે પોલીસ સ્ટેશનમાં જ્યારે પીઆઇ, પીએસનો નંબર પોલીસ કર્મચારીઓ કે પછી પીએસઓ પાસેથી માગવામાં આવે ત્યારે તેઓ ઘસીને ના પાડી દેતા હોય છે, જેના કારણે લોકોએ ધોયેલા મોઢે પરત ફરવું પડે છે. પોલીસ સ્ટેશનમાં આવતા લોકોને આસાનીથી અધિકારીઓના નંબર મળી રહે અને તેમને કોઇ મુશ્કેલી ઊભી થાય નહી તે માટે MAY I HELP YOUનાં ડેસ્ક બનાવ્યાં છે, જેમાં પીઆઇ, પીએસઆઇથી લઇને તમામના જરૂરી નંબરો આપેલા છે. પોલીસની આ કામગીરી ખરેખર વખાણવાલાયક છે, પરંતુ જેમ જેમ સમય જાય તેમ તેમ કામગીરી નબળી થતી જાય છે. આજે સ્થિ‌તિ એવી આવી ગઇ છે કે શહેરનાં દરેક પોલીસ સ્ટેશનમાં મૂકેલાં MAY I HELP YOUનાં ડેસ્કને હેલ્પની જરૂર પડી ગઇ છે. શહેરનાં તમામ પોલીસ સ્ટેશનમાં પીઆઇ, પીએસઆઇ સહિતનો સ્ટાફ બદલાઇ ગયો છે, પરંતુ MAY I HELP YOUનાં ડેસ્ક પર તો જૂના પોલીસ કર્મચારીઓનાં નામ ચાલે છે. 

 પોલીસ કર્મચારી પણ તેના મૂડ પ્રમાણે જવાબ આપે છે
પોલીસ સ્ટેશનમાં અલગ અલગ વિભાગ આવેલા છે. જ્યારે કોઇ પણ વ્યક્તિ પોલીસ સ્ટેશનમાં કામ માટે જાય છે ત્યારે તેને વિવિધ વિભાગોની જાણ હોતી નથી, જેથી તે ફરજ પરના પોલીસ કર્મચારીને પૂછે છે. પોલીસ કર્મચારી પણ તેના મૂડ પ્રમાણે જવાબ આપે છે, જેના કારણે પોલીસ સ્ટેશનમાં કામ માટે આવેલી વ્યક્તિને હાલાકીનો સામનો કરવો પડે છે. પોલીસ સ્ટેશનમાં આવતા લોકોને સ્માઇલ સાથે આવકારી તમામ વિગતો આપવા માટે MAY I HELP YOUનાં ડેસ્ક મૂકવામાં આવ્યાં હતાં. MAY I HELP YOUનાં ડેસ્ક પોલીસ સ્ટેશનના ગેટ પાસે રાખવામાં આવ્યાં હતાં, જ્યાં ફરજિયાત એક પોલીસ કર્મચારી ફરજ બજાવતા હતા. જ્યારે કોઇ પણ વ્ય‌િ‌ક્ત પોલીસ સ્ટેશનની મુલાકાતે આવતી ત્યારે પોલીસ કર્મચારી તેને પ્રેમથી મા‌હિતી આપતા હતા. આ સિવાય પોલીસ સ્ટેશનમાં આવનાર વ્યક્તિનું નામ-સરનામું પણ ચોપડામાં લખવામાં આવતું હતું. થોડા સમય સુધી આ કામગીરી જોરશોરથી ચાલી, પરંતુ સમય જતાં તે કામગીરી પર બ્રેક વાગી ગઇ છે. આજે કોઇ પોલીસ કર્મચારી ઊભા રહેતા નથી અને તે માત્ર શોભાના ગાંઠિયા સમાન થઇ ગયાં છે. 

'MAY I HELP YOU'
પોલીસે જે MAY I HELP YOU કાઉન્ટર બનાવ્યું છે તેમાં પોલીસ સ્ટેશનથી લઇ સાયબર ક્રાઇમ હેલ્પલાઇન સુધીના ફોન નંબર છે, જેથી પોલીસ સ્ટેશનમાં કોઇ પણ વ્યક્તિને નંબર શોધવા ફાંફાં નહીં મારવાં પડે. કાઉન્ટર ઉપર પીઆઇનો મોબાઇલ નંબર તેમજ કયા પીએસઆઇ કઈ ચોકીમાં ફરજ બજાવે છે અને તેમનો મોબાઇલ નંબર આપેલા છે. સર્વેલન્સ સ્ક્વોડના પીએસઆઇ, પોલીસ સ્ટેશન, પોલીસ કંટ્રોલરૂમ, મહિલા હેલ્પલાઇનનો પણ નંબર આપેલો છે. કાઉન્ટર ઉપર લખેલા નંબર ઉપર ફોન કરીને પોલીસ સ્ટેશન સંબં‌ધિત કામકાજની માહિતી પણ મળી શકે છે. પરંતુ જ્યારે કોઇ પણ પીઆઇ, પીએસઆઇ સહિત ટીમ બદલાય છે ત્યારે આ કાઉન્ટર પરના નંબર બદલાતા નથી. સરદારનગર પોલીસ સ્ટેશનમાં પીઆઇ એમ.એમ. સોલંકી ફરજ બજાવતા હતા, જે આજે ખા‌ડિયા પોલીસ સ્ટેશનમાં ફરજ બજાવે છે. પીઆઇ એમ.એમ. સોલંકી બદલાયા બાદ પીઆઇ વી.આર. ચૌધરી આવ્યા હતા, જે સસ્પેન્ડ થયા હતા. ત્યાર બાદ પીઆઇ પી.વી. ગો‌હિલ આવ્યા છે, જે હાલ સરદારનગર પોલીસ સ્ટેશનમાં ફરજ બજાવે છે. આ સિવાય શાહીબાગ પોલીસ સ્ટેશનમાં કે.ડી. જાડેજા પીઆઇ હતા, જેમની થોડા સમય પહેલાં બદલી થઇ છે અને તેમની જગ્યા પર એમ.ડી. ચંપાવત ફરજ બજાવે છે. આ મામલે ઝોન-4નાં ડીસીપી કાનન દેસાઇએ જણાવ્યું છે કે તેમના નેજા હેઠળ આવતાં તમામ પોલીસ સ્ટેશનનાં કાઉન્ટર પરથી નંબર હટાવી લેવાશે, જ્યારે ઝોન-૭ના ડીસીપી ભગીરથસિંહ જાડેજાએ પણ જણાવ્યું છે કે ડેસ્ક પરના નંબર હટાવી લેવાશે. 

પોલીસ સ્ટેશનમાં MAY I HELP YOU ડેસ્કના નંબર બદલાયા નથી 
શહેરમાં 45થી વધુ પોલીસ સ્ટેશન આવેલાં છે, જેમાં MAY I HELP YOUનાં ડેસ્ક મૂકવામાં આવ્યાં છે. તમામ ડેસ્ક પર પોલીસ કર્મચારીઓ હાજર રહેતા નથી, જ્યારે કેટલાંક કાઉન્ટર તો ધૂળ ખાઇ રહ્યાં છે. જો કોઇ પીઆઇ કે પીએસઆઇને તેમાં લખેલો નંબર જોઇને ફોન કરશો તો સીધો બીજા પોલીસ સ્ટેશનમાં ફરજ બજાવતા હોવાનું સાંભળવા મળશે.