IPL 2022 / IPLમાં શૂન્ય રને સૌથી વધુ વાર આઉટ થવાનો રાશિદનો રેકોર્ડ આ ખેલાડીએ તોડ્યો!

• RCBના તોફાની ઓલરાઉન્ડર ગ્લેન મેક્સવેલે પોતાની ટીમને જ કરી નિરાશ
• રાજસ્થાન રોયલ્સ સામેની મેચમાં ગ્લેન મેક્સવેલ શૂન્ય રને આઉટ થયો
• IPLમાં સૌથી વધુ શૂન્ય રને આઉટ થનારો વિદેશી બેટ્સમેન બની ગયો

સૌથી વધુ વાર શૂન્ય રને આઉટ થવા મામલે મેક્સવેલે રાશિદનો રેકોર્ડ તોડ્યો

ચોથા ક્રમ પર બેટિંગ કરવા આવેલા મેક્સવેલને કુલદીપ સેને ખાતું પણ ખોલવા દીધું નહીં અને તેને ગોલ્ડન ડક પર આઉટ કરી દીધો. આ મેચમાં શૂન્ય રને આઉટ થયા બાદ મેક્સવલ આઇપીએલમાં સૌથી વધુ વાર શૂન્ય રને આઉટ થનારો વિદેશી બેટ્સમેન બની ગયો છે. રાજસ્થાન સામેની મેચમાં ૧૨મી વાર એવું બન્યું, જ્યારે મેક્સવેલ શૂન્ય રને આઉટ થઈ ગયો. હવે તે આ લીગમાં સૌથી વધુ વાર શૂન્ય રને આઉટ થનારો વિદેશી ખેલાડી બની ગયો છે. આ સાથે મેક્સવેલે અફઘાનિસ્તાનના રાશિદ ખાનને પાછળ છોડી દીધો છે, જે આઇપીએલમાં અત્યાર સુધીમાં ૧૧ વાર શૂન્ય રને આઉટ થયો હતો. હવે વિદેશી ખેલાડી તરીકે આઇપીએલમાં સૌથી વધુ વાર શૂન્ય રને આઉટ થવાના મામલે રાશિદ બીજા નંબર પર પહોંચી ગયો છે અને મેક્સવેલ નંબર વન બની ગયો છે.

૧૧ કરોડનો ગ્લેન મેક્સવેલ RCBને ભારે પડી રહ્યો છે

ગત મંગળવારે રમાયેલી રાજસ્થાન સામેની મેચમાં મેક્સવેલનું ફરી એક વાર બેટ શાંત રહ્યું અને તે ખાતું પણ ખોલાવી શક્યો નહીં. મેક્સવેલ માત્ર રાજસ્થાન સામે જ નહીં, બલકે છેલ્લા ત્રણ મુકાબલામાં ફ્લોપ રહ્યો છે. જ્યારે જ્યારે ટીમને તેની જરૂર પડે છે ત્યારે તેના બેટમાંથી રન નથી નીકળતા. લખનૌ સામેની મેચમાં મેક્સવેલે ૨૩, હૈદરાબાદ સામે ૧૨ અને રાજસ્થાન સામે તેનું ખાતું પણ ખૂલ્યું નહોતું. આમ મેક્સવેલે છેલ્લી ત્રણ મેચમાં માત્ર ૩૫ રન બનાવ્યા છે. મેક્સવેલની ગત સિઝન શાનદાર રહી હતી. તેણે આરસીબી તરફથી ૧૫ મેચમાં ૪૨.૭૫ની સરેરાશથી ૫૧૩ રન ફટકાર્યા હતા. તેનો સ્ટ્રાઇક રેટ ૧૪૪.૧૦નો હતો. આ શાનદાર પ્રદર્શનને જોતાં આરસીબીએ તેને ૧૧ કરોડ રૂપિયામાં રિટેન કર્યો હતો. આટલો મોંઘો ખેલાડી હવે ટીમને ભારે પડી રહ્યો છે.