ક્રેડિટ કાર્ડ તમને EMI પર સામાન ખરીદવાની સુવિધા આપે છે. આની મદદથી તમે તમારી પાસે રોકડ ન હોવા છતાં પણ સમયસર શોપિંગ કરી શકો છો. ઉપરાંત, તમે સમયસર ચૂકવણી કરીને ઘણી સારી ઑફર્સ મેળવી શકો છો.
EMI પર સામાન ખરીદવાની સુવિધા
સમયસર ચુકવણી કરી મેળવો ઓફર્સ
ફોલો કરો આ જરૂરી ટિપ્સ
ક્રેડિટ કાર્ડ હવે સામાન્ય બની ગયું છે. પરંતુ તેનો ઉપયોગ કેવી રીતે કરવો તે બહુ ઓછા લોકો જાણે છે. એટલે જ ઘણા લોકો માટે ક્રેડિટ કાર્ડ દેવાની જાળ બની જાય છે. જો કે, બજારના નિષ્ણાંતોનું માનીએ તો ક્રેડિટ કાર્ડ એ ચુકવણી માટે એક શ્રેષ્ઠ વિકલ્પ છે. જે આર્થિક રીતે અનુશાસનથી ચાલતા લોકો માટે હંમેશા ફાયદાનો સોદો સાબિત થાય છે.
જો તમે પણ ક્રેડિટ કાર્ડનો ઉપયોગ કરો છો અથવા ઉપયોગ કરવા માંગો છો, તો બેંકો દ્વારા સમયાંતરે આપવામાં આવતી કેટલીક સલાહને ધ્યાનમાં રાખીને અમે તમને બતાવવા જઈ રહ્યા છીએ કે કઈ રીતે તમે પોતાના ક્રેડિટ કાર્ડથી સ્માર્ટ શોપિંગ કરો અને ક્રેડિટ કાર્ડને ફાયદાનો સોદો બનાવો.
સતત કરો ક્રેડિટ કાર્ડનો ઉપયોગ
ઘણીવાર લોકો પાસે પૈસા ન હોય ત્યારે ક્રેડિટ કાર્ડનો ઉપયોગ કરે છે. પરંતુ સ્માર્ટ રોકાણકારો તેમની પાસે બિલ ચૂકવવા માટે પૂરતા પૈસા હોવા છતાં પણ ક્રેડિટ કાર્ડ વડે ખરીદી કરે છે. તેનાથી તેમને ઘણા ફાયદા થાય છે. ઘણી બેંકો ચોક્કસ ખરીદી પછી વાર્ષિક ફી માફ કરે છે. ગ્રાહકને દરેક ખરીદી સાથે રિવોર્ડ પોઈન્ટ મળે છે.
સૌથી મોટી વાત એ છે કે જો બિલ સમયસર ચૂકવવામાં આવે તો વ્યાજ નથી લાગતું અને સાથે જ ગ્રાહકનો ક્રેડિટ સ્કોર સારો થાય છે. ક્રેડિટ કાર્ડના સતત ઉપયોગથી તમે બેંકની નજરમાં પણ રહેશો અને તમને સતત નવી ઑફર્સ પણ મળી રહેશે. જો કે, આ માટે તમારે અનુશાસિત રહેવું પડશે કારણ કે જો તમે છેલ્લી તારીખ સુધીમાં ચુકવણી નહી કરો તો ક્રેડિટ કાર્ડ તમને માત્ર વધુ ખર્ચ કરવા તરફ દોરી શકે છે સાથે છેલ્લી તારીખ સુધી ચુકવણી ન કરવા પર વધારે વ્યાજ પણ ચુકવવું પડી શકે છે.
નો-કોસ્ટ ઈએમઆઈનો ઉઠાવો ફાયદો
ક્રેડિટ કાર્ડની સૌથી મોટી વિશેષતા એ ખરીદીને EMIમાં કન્વર્ટ કરવાની સુવિધા છે. તેનાથી લોકો નાની રકમથી મોટી ખરીદી કરી શકે છે. EMI પણ બે પ્રકારની હોય છે. પ્રથમ ખૂબ જ નાની મુદતની હોય છે એટલે કે 3 થી 9 મહિના સુધીની નો-કોસ્ટ EMI અને બીજી EMI વ્યાજ સાથે જે સામાન્ય રીતે એક વર્ષથી વધુ હોય છે.
ઓછા વ્યાજે નો-કોસ્ટ EMI અથવા EMI ઑફર મેળવવામાં ક્રેડિટ કાર્ડ લાભો ઉપલબ્ધ છે. જો તમે તમારા બજેટ કરતા 20-30 ટકા વધુ એવી કોઈ ખરીદી કરવા માંગતા હોવ તો તમારે નો કોસ્ટ EMI નો લાભ લેવો જોઈએ. તમે આ સમયનો ઉપયોગ બચત દ્વારા બાકીની રકમ એકત્ર કરવા માટે કરી શકો છો. અને તમારા વ્યાજની પણ બચત થશે. જ્યારે બજેટમાં કોઈ સમસ્યા હોય, તો તમે 18 કે 24 મહિના માટે નાની EMI સાથે સીધી ખરીદી કરીને તમારા માસિક બજેટને મર્યાદામાં રાખી શકો છો.
યોગ્ય ક્રેડિટ કાર્ડની પસંદગી
જો તમે બજારમાં ઉપલબ્ધ તમામ ક્રેડિટ કાર્ડ્સ પર નજર કરો, તો તમને વિવિધ સુવિધાઓવાળા કાર્ડ્સની સંપૂર્ણ શ્રેણી જોવા મળશે. તેમાંના કેટલાક ચોક્કસ કંપનીઓ અથવા બ્રાન્ડ સાથે સંકળાયેલા છે. જેમ કે ઈ-કોમર્સ કંપનીઓ, ઓઈલ માર્કેટિંગ કંપનીઓ અથવા બ્રાન્ડ્સના જૂથ સાથે બેંકોના ચોક્કસ કરાર પર આધારિત ક્રેડિટ કાર્ડ.
તમારા માટે એવા કાર્ડની પસંદગી કરો જે તમારી મોટાભાગની ખરીદીને આવરી લે. જો તમે કોઈ ખાસ કંપનીના પેટ્રોલ પંપ પરથી વધુ ઈંધણ ખરીદો છો અથવા ઈ-કોમર્સ કંપની દ્વારા વધુ ખરીદી કરો છો, તો તેની સાથે સંકળાયેલ ક્રેડિટ કાર્ડ લેવાનો પ્રયત્ન કરો. આનાથી તમે ક્રેડિટ કાર્ડનો પૂરો ફાયદો ઉઠાવી શકશો. આ સાથે, વીમા કવર, રિવોર્ડ પોઈન્ટ્સ, કેશ બેક જેવી તમામ ઑફર્સને ધ્યાનમાં લઈને યોગ્ય ક્રેડિટ કાર્ડ પસંદ કરો. સાથે પ્રયત્ન કરો કે લાઈફટાઈમ ફ્રી કાર્ડ મેળવી શકો.
ઑફર્સ પર આપો ધ્યાન
ઘણીવાર તમે જુઓ છો કે કોઈ ચોક્કસ ક્રેડિટ કાર્ડ પર વધારાનું કેશબેક ઓફર કરવામાં આવે છે. આની સાથે રેસ્ટોરાંથી લઈને મોટી બ્રાન્ડ પણ ક્રેડિટ કાર્ડ પર ઑફર્સ આપે છે. જો કે, સમસ્યા એ છે કે લોકો તેમના ક્રેડિટ કાર્ડ પર જે ઑફર્સ મેળવી રહ્યાં છે તે વિશે જાણતા નથી. બેંકો તમારા કાર્ડને લગતી ઑફર્સ વિશેની માહિતી તમારા ઇમેઇલ પર મોકલતી રહે છે. જો તમારી પાસે કોઈપણ બેંકનું ક્રેડિટ કાર્ડ છે, તો તેઓ જે ઈમેલ મોકલી રહ્યા છે તે વાંચો, આ તમને ખરીદી અંગે વધુ સારા નિર્ણય લેવામાં મદદ કરશે.