વા વા'યો ને / વાવાઝોડા પહેલા માવઠાની વાતો : કોંગ્રેસની બેઠકમાં 15 MLA ગેરહાજર, રાજકારણ ગરમાયું

• ધારાસભ્ય દળની બેઠકમાં કેટલાક 'ઘેર' હાજર 
• ભાજપ પ્રમુખ ક્યાં છે ? ફોન રણઝણી ઉઠયા 
• વાવાઝોડા પહેલા માવઠાની અટકળોનો દોર 

કારતકી અમાવાસ્યાના પૂર્વ દિવસે ગુજરાત કોંગ્રેસના નવ નિર્વાચિત પ્રમુખ જગદીશ ઠાકોરની ભવ્ય રીતે તાજપોશી કાર્યક્રમ પૂર્વે ગાંધીનગરમાં ધારાસભ્ય દળની બેઠકમાં સૌરાષ્ટ્રના  દિગ્ગજ ધારાસભ્યો સહીત 15 ધારાસભ્યો ગેર હાજર રહેતા,ભાજપ ગેલમાં આવી ગયો હતો અને ગાંધીનગરથી સૌરાષ્ટ્રના છેવાડા સુધી મોબાઈલ રણકતા થઈ  ગયા હતા.  ગાંધીનગરની બેઠક પૂર્વે,દિલ્હીથી મારતે વિમાને આવી પહોચેલા પ્રભારી ડો.રઘુ શર્મા, પદનામિત પ્રદેશ પ્રમુખ જગદીશ ઠાકોર અને સુખરામ રાઠવા અમદાવાદ એયર પોર્ટ પર આવી પહોચતા,ભવ્યાતિભવ્ય સ્વાગત કરાયું હતું. 

 સૌરાષ્ટ્રના દિગ્ગજો 'ઘેર'હાજર 

ગાંધીનગરમાં ગુજરાત કોન્ગ્રેસના ધારાસભ્ય દળની બેઠકમાં 15 જેટલા ધારાસભ્યો ગેર હાજર રહેતા મોટો રાજનીતિક ગણગણાટ શરુ થયો હતો. ખુદ ભાજપના દિગ્ગજો પણ આશ્ચર્યમાં મુકાઈ ગયા હતા અને રાજકોટ -સુરત તરફ તાર ઝણઝણાવી દીધા હતા કે,  પ્રદેશ પ્રમુખ C R પાટીલ ક્યાં છે ? તેનો પ્રવાસ કાર્યક્રમ શું છે ? કોઈ કોંગ્રેસી ધારાસભ્ય સાથે બેઠક છે કે કેમ ? ખાસ કરીને લલિત વસોયા, પ્રતાપ દૂધાત, વિમલ ચુડાસમા,વીરજી ઠુમ્મર ગેરહાજર રહેતા આ વાત ઉડીને આંખે વળગી હતી. પરિણામે, વાત વહેતી થવા પામી છે. જો કે અમરીશ ડેર સમયસર નહોતા પહોચ્યા પરિણામે, તેમના પર અટકળ લાગવી વધુ વાજબી હતી. જો કે, તેઓ બેઠક શરુ થયાના અડધા કલાકથી થોડા વધુ સમયમાં પહોચી જતા, તેમના નામ પર પૂર્ણ વિરામ મુકાઈ ગયું હતું.

 સૌરાષ્ટ્રનો'એકડો'નીકળી ગયો ?

ગુજરાત કોન્ગ્રેસના પ્રદેશ પ્રમુખ અને વિપક્ષના નેતા આ બન્ને નામમાં સૌરાષ્ટ્રનો એકડો નીકળી ગયો હોવાની ચર્ચા પણ વહેતી થઇ હતી, કહેવાય છે કે આ જ અસર ધારાસભ્ય દળની બેઠકમાં જોવા મળી હોય તેમ 15 જેટલા ધારાસભ્યો ગેર હાજર રહ્યા. ખાસ કરીને અમરેલી,ધોરાજી,વેરાવળ, વિસાવદર, જામનગર,ના ધારાસભ્યો આ બેઠકમાં ઉપસ્થિત નહોતા.

કોન્ગ્રેસના પ્રદેશ પ્રમુખ અને નેતા વિપક્ષના સ્વાગત અને પ્રભારી ડો.રઘુ શર્માની ઉપસ્થિતિમાં યોજાયેલી ધારાસભ્ય દળની બેઠકમાં આ ધારાસભ્યો ના પહોચતા, 'વાવાઝોડા પહેલા માવઠા'ની વાતો વહેતી થઇ  હતી   

જાણી લો, કોન્ગ્રેસના આ  15  ગણમાન્ય ધારાસભ્યો નહોતા 

પ્રતાપ દુધાત  ( સાવરકુંડલા ) 
વિક્રમ માડમ  (જામનગર )
કનુ બારૈયા  (તળાજા )
લલિત વસોયા (ધોરાજી )
વિમલ ચુડાસમા (વેરાવળ)
ભગાભાઇ બારડ (તાલાલા) 
બાબુભાઇ વાજા (માંગરોળ)
ભીખાભાઇ જોષી (જુનાગઢ)
નૌશાદ સોલંકી  (દસાડા )
પ્રવીણ મુછડીયા (કાલાવડ )
અશ્વિન કોટવાલ ( ખેડબ્રહ્મા )
Sરાજેન્દ્રસિંહ પરમાર ( બોરસદ )
ચંદ્રિકાબેન બારીયા (ગરબાડા-દાહોદ) 
પુનમ પરમાર  (સોજીત્રા )
અનંત પટેલ (વાંસદા )