સ્પોર્ટ્સ / US ઓપનમાં સોરેસ-પાવિચે મેન્સ ડબલ્સનો ખિતાબ કર્યો પોતાને નામ

• US open2020માં બ્રુનો અને પાવિચ જીત્યા
• મેન્સ ડબલનો મેળવ્યો ખિતાબ

સોરેસનો આ મેન્સ ડબલ્સમાં ત્રીજો,  જ્યારે પાવિચનો બીજો ગ્રાન્ડ સ્લેમ ખિતાબ છે. ગત વર્ષે જોડી બનાવ્યા બાદ આ બંનેએ પહેલી વાર ગ્રાન્ડ સ્લેમ ખિતાબ જીત્યો છે. સોરેસ અને પાવિચે બંને સેટમાં એક-એક બ્રેકપોઇન્ટ મેળવ્યો હતો. પ્રથમ સેટની ૧૨મી ગેમમાં તેમણે બ્રેક પોઇન્ટ હાંસલ કર્યો. સોરેસે ક્રોસ કોર્ટ વિનર જમાવીને એ મહત્ત્વપૂર્ણ પોઇન્ટ મેળવ્યો હતો. બીજા  સેટમાં આ જોડીએ પાવિચના વિનરથી ૪-૨ની સરસાઈ બનાવી અને પોતાની સર્વિસ પર મેચ અને ખિતાબ પોતાના નામે કરી લીધા હતા.

એલેકઝેન્ડર જ્વેરેવ-ડોમિનિક થીએમ વચ્ચે ફાઇનલમાં ટક્કરઃ યુએસ ઓપનને આ વર્ષે નવો ચેમ્પિયન મળવા જઈ રહ્યો છે, કારણ કે વર્ષના આ અંતિમ ગ્રાન્ડ સ્લેમના બંને ફાઇનલિસ્ટ નક્કી થઈ ચૂક્યા છે. જર્મનીનો એલેકઝેન્ડર જ્વેરેવ પહેલી વાર કોઈ ગ્રાન્ડ સ્લેમની ફાઇનલમાં પહોંચ્યો છે, જ્યારે બીજી સેમિફાઇનલનો વિજેતા ડોમિનિક થીએમ પણ પહેલી વાર યુએસ ઓપનના ખિતાબ મુકાબલામાં રમવાનો છે.

કોરોના મહામારીના કારણે વિમ્બલ્ડન રદ થયા બાદ યુએસ ઓપનનું આયોજન પણ જોખમમાં મુકાયું હતું. અનેક દિગ્ગજો યુએસ ઓપનમાં રમવાથી દૂર રહ્યા હતા, આમ છતાં ટૂર્નામેન્ટનો રોમાંચ જરા પણ ઓછો થયો નહોતો. છ વર્ષ બાદ પહેલી વાર એવું બનશે, જ્યારે યુએસ ઓપનને એક નવો ચેમ્પિયન મળશે.

રશિયાની વેરા જ્વોનારેવાએ પોતાની જર્મન પાર્ટનર લોરા સેગમન્ડ સાથે વુમન્સ ડબલ્સ ખિતાબ જીતી લીધો છે. તેમણે ફાઇનલમાં અમેરિકાની નિકોલ મેલિચાર અને ચીનની યિકાન ઝૂની જોડીને ૬-૪, ૬-૪થી માત આપી હતી. જ્વોનારેવાનો ડબલ્સમાં ત્રીજો ગ્રાન્ડ સ્લેમ ખિતાબ છે. આ પહેલાં તેણે ૨૦૦૬માં યુએસ અને ૨૦૧૨માં ઓસ્ટ્રેલિયન ઓપનમાં જીત મેળવી હતી.