સાવધાન! / માસ્ટરબેશનની આદત આટલી ભારે પડી શકે છે, 20 વર્ષના યુવક સાથે બની આ દર્દનાક ઘટના

• સ્વિત્ઝરલેન્ડનાં યુવકને માસ્ટરબેશનની આદત ભારે પડી 
• ન્યુમોમેડિયાસ્ટિનમ નામની દુર્લભ સ્થિતિ ઊભી થઈ 
• ફેફસાને થઈ ગંભીર ઇજા 

દરેક વસ્તુ લિમિટમાં કરો તો સારી 

સ્વિત્ઝરલેન્ડમાં એક 20 વર્ષના વ્યક્તિને માસ્ટરબેશનની આદત ભારે પડી હતી. તેના ફેફસામાં એક દુર્લભ ઇજા થઈ છે. જેના કારણે બાદમાં આ વ્યક્તિને હોસ્પિટલમાં દાખલ થવું પડ્યું હતું. એક સમાચાર એજન્સીના રિપોર્ટમાં આ સમગ્ર ઘટના બહાર આવી છે. 

રેડિયોલોજી કેસ રિપોર્ટ્સના મેના અંકમાં પ્રકાશિત થયેલા અહેવાલ મુજબ, છોકરાએ પથારીમાં હસ્તમૈથુન કરતી વખતે અચાનક છાતીમાં તીવ્ર દુખાવો અને શ્વાસ લેવામાં તકલીફની ફરિયાદ કરી. તેને તાત્કાલિક હોસ્પિટલમાં દાખલ કરવામાં આવ્યો હતો.

તપાસ કરતાં ડોકટરોને જાણવા મળ્યું કે દર્દીના ચહેરા પર સોજો આવી ગયો હતો. જ્યારે તે શ્વાસ લેતો અને બહાર કાઢતો ત્યારે જુદા જુદા કર્કશ અવાજો સંભળાતા. તેનો કેસ હિસ્ટ્રી દર્શાવે છે કે તે હળવા પ્રકારનો અસ્થમાનો દર્દી પણ છે.

ન્યુમોમેડિયાસ્ટિનમ નામની દુર્લભ સ્થિતિ

દર્દીની છાતીના એક્સ-રેમાં ન્યુમોમેડિયાસ્ટિનમ નામની દુર્લભ સ્થિતિ જોવા મળી હતી. તેને ફેફસામાં પણ પણ નુકસાન થયું હતું. તેને ઓક્સિજનના ઉચ્ચ ડોઝની પણ જરૂર ઊભી થઈ હતી.

ન્યુમોમેડિયાસ્ટિનમ ફેફસાં અથવા અન્નનળીમાં શારીરિક ઇજાને કારણે થઈ શકે છે. તે સ્થિતિ અનાયાસે પણ ઊભી થઈ શકે છે. આ પ્રકારની ઈજા યુવાન પુરુષોમાં થવાની શક્યતા વધુ હોય છે. તે તીવ્ર અસ્થમા ધરાવતા દર્દીઓમાં અને સખત કસરત દરમિયાન પણ થઈ શકે છે.

ઝડપથી સ્વસ્થ થયો અને ચાર દિવસ પછી તેને રજા મળી 

ડોક્ટરોએ આ વ્યક્તિને ICU માં ઓબ્ઝર્વેશન હેઠળ રાખ્યો હતો. છાતીમાં દુખાવો ઓછો કરવા માટે તેને એન્ટિબાયોટિક્સ આપવામાં આવી હતી. સદનસીબે તે ઝડપથી સ્વસ્થ થયો અને ચાર દિવસ પછી તેને રજા આપવામાં આવી.

રિપોર્ટમાં ડૉક્ટરોએ નોંધ્યું છે કે ન્યુમોમેડિયાસ્ટિનમનો આ કેસ અસામાન્ય હતો કારણ કે ઈજા હસ્તમૈથુનથી થઈ હતી.

જો કે સામાન્ય લોકોએ આ ઘટનાથી ગભરાવાની જરૂર નથી. આવી ઘટના ભાગ્યે જ બનતી હોય છે અને તેનું નિવારણ પણ લાવી શકાય છે. જો કે કોઈ પણ વસ્તુ જો લિમિટમાં ન કરવામાં આવે તો તે નુકસાન કરે જ છે.