રાજકોટમાં કોરોનાના કેસ વધતા ડીઇઓએ લીધો મહત્વનો નિર્ણય, વિદ્યાર્થીઓએ શાળાએ જતા પહેલા રાખવુ પડશે આ ધ્યાન
રાજકોટમાં વકરી રહ્યો છે કોરોના
બીજી તરફ શાળાઓ થઇ રહી છે શરૂ
કોરોનાને ધ્યાને રાખીને DEOએ લીધો મહત્વનો નિર્ણય
ગુજરાતમાં કોરોનાના કેસ વધી રહ્યા છે ત્યારે હવે કોરોનાની ગાઇડલાઇનનું ચુસ્ત પણ અમલીકરણ નહીં કરવામાં આવે તો કોરોનાના કેસનો રાફડો ફાટે તો કોઇ નવાઇ નહી. તેમાં પણ હવે ગુજરાતમાં કોરોનાના આંકડા 3 ડિઝીટમાં પહોંચી ગયા છે. છેલ્લા વીસ દિવસમાં રોકેટ ગતિએ કોરોનાના કેસ વધી રહ્યા છે જેને લઇને મહાનગરોમાં કેટલાક નિયમોનું પાલન કરવુ ફરજિયાત કરાયું છે.
શાળામાં માસ્ક ફરજિયાત
રાજકોટ સહિત આખા સૌરાષ્ટ્રમાં કોરોનાના કેસ વધી રહ્યા છે. પરિણામે રાજકોટની શાળાઓમાં માસ્ક ફરજિયાત કરવામાં આવ્યું છે. મહત્વનું છે કે છેલ્લા 24 કલાકમાં રાજકોટમાં 10 કોરોનાના કેસ નોંધાયા. જ્યારે આખા સૌરાષ્ટ્રમાં 24 કેસ નોંધાયા છે. વળી હવેથી તો શાળાઓ પણ શરૂ થઇ . આથી સાવચેતીના ભાગરૂપે DEO દ્વારા માસ્ક ફરજિયાતનો નિર્ણય કરાયો છે. વિદ્યાર્થીઓ સારી રીતે ભણી શકે તેમજ તેઓનું સ્વાસ્થય ન જોખમાય તે રીતે કોરોનાની ગાઇડલાઇન મુજબ શિક્ષણની શરૂઆત કરવામાં આવી રહી છે.
3 વર્ષની બાળકીને કોરોના
રાજકોટમાં 3 વર્ષની બાળકી સહિત 10 લોકો કોરોના પોઝિટીવ નોંધાયા. જેમાં અમેરિકાથી આવેલી 3 વર્ષની બાળકી કોરોનાગ્રસ્ત બની છે.. મહત્વનુ છે કે કોરોનાનો કહેર ઓછો થતા પ્રતિબંધોને હળવા કરવામાં આવ્યા. પરિણામે વિદેશ પ્રવાસ વધ્યો તેમજ વતનની મુલાકાતે આવી રહ્યા છે. વળી વેકેશન હોવાથી બહાર ફરવા જવાનું પ્રમાણ પણ વધી ગયુ જેથી કરીને ક્યાંક કોરોનાનો ચેપ લાગવાના પ્રમાણમાં વધારો થઇ રહ્યો છે તેમ કહી શકાય. હાલમાં 10 લોકોને કોરોન્ટીન કરવામાં આવ્યા છે. તેઓની પૂરતી સંભાળ રાખવામાં આવી રહી છે. તેમજ તેઓના સંપર્કમાં આવેલા લોકોનો પણ કોરોના ટેસ્ટ કરવામાં આવી રહ્યો છે.
ગુજરાતમાં છેલ્લા 24 કલાકમાં 244 કેસ
ગુજરાતમાં કોરોના કેસ સતત વધી રહ્યા છે. છેલ્લા 20 દિવસમાં કોરોના કેસ 40થી લઈને 244 સુધી પહોંચી ગયા છે. તેમાંય 4 દિવસથી કોરોનાએ બેવડી સદી મારી રહ્યો છે એટલે કે છેલ્લા 24 કલાકમાં રાજ્યમાં કોરોનાના 244 કેસ નોંધાયા છે. તો આજે કોરોનાને લીધે કોઈ દર્દીનું મૃત્યુ થયું નથી. 131 દર્દીઓ સાજા થઈ હેમખેમ ઘરે પરત ફર્યા છે. કેસમાં વધારો આવતા એક્ટિવ કેસની સંખ્યા પણ 1374 પહોચી ગઈ છે. કોરોનાથી ગંભીર અસરગ્રસ્ત 5 દર્દીઓની વેન્ટિલેટર પર સારવાર ચાલી રહી છે.