શહેરના સાબરમતી-ત્રાગડરોડ મુક્તિધામ પાસે બાઇકચાલકને રોકી માસ્કનો દંડ ભરવાનું કહેતાં બાઈક પાછળ બેસેલી મહિલાએ ઉશ્કેરાઇ જઈ પોલીસ કર્મચારી સાથે ઝપાઝપી કરી તેમના શર્ટનું ખિસ્સું ફાડી નાખી હાઇકોર્ટમાં ઘસડી જવાની ધમકી આપી હોવાનો કિસ્સો સામે આવ્યો છે.
પછીથી દંડ ભરી દઇશ
કાયદા અમે જાણીએ છીએ
ગુજરાત હાઈકોર્ટમાં ઘસડી જવાની ધમકી
સાબરમતી પોલીસ સ્ટેશનના હેડ કોન્સ્ટેબલ સંજીવકુમાર રતને આશિષ કલ્યાણકર અને અંકિતા પટેલ વિરુદ્ધ ફરિયાદ નોંધાવી છે કે ગઈ કાલે પીસીઆર વાન-ર૧ના સ્ટાફ સાથે બપોરે માસ્કના દંડની કાર્યવાહી કરતા હતા. દરમિયાનમાં ગોદરેજ ગાર્ડન સિટી તરફથી આવતા બાઇકચાલકે માસ્ક પહેર્યું ન હોવાથી પોલીસે બાઇક રોકી તેમને દંડ ભરવા કહ્યું હતું.
પછીથી દંડ ભરી દઇશ
બાઇકચાલકે કહ્યું કે મારે ઓફિસે જવાનું મોડું થાય છે. તમે સાઈડમાં જતા રહો, જેથી પોલીસે દંડ ભરી જતા રહો તેમ કહેતાં બાઈકચાલકે કહ્યું કે મારી પાસે પૈસા નથી, પછીથી દંડ ભરી દઇશ. તે સમયે બાઇક પાછળ બેઠેલી મહિલાએ પોલીસ કર્મચારી સંજીવકુમારને ધક્કો મારી મારે નોકરી જવાનું મોડું થાય છે એમ કહ્યું હતું. આ દરમિયાન મહિલાનું ઉપરાણું લઈ બાઇકચાલકે પણ ઝપાઝપી કરી હતી. મહિલાએ સંજીવકુમારના શર્ટનું ખિસ્સું ફાડી નાખતાં બીજા પાસેથી ઉઘરાવેલા દંડના રૂપિયા બે હજાર પણ ક્યાંક પડી ગયા હતા. આ બનાવ અંગે શી ટીમને જાણ કરવામાં આવી હતી.
કાયદા અમે જાણીએ છીએ
મહિલાએ પોલીસ કર્મચારીઓને હાઇકોર્ટમાં ઘસડી જવાની ધમકી આપી કલમ-૧૮૮ શું છે? એ અમે જાણીએ છીએ તેમ કહી માસ્કનો દંડ નહીં ભરીએ તેમ કહ્યું હતું. પોલીસે મહિલા અને બાઈકચાલકને શી ટીમની વાનમાં બેસાડી પોલીસ સ્ટેશન લાવી આશિષ ભાનુકર કલ્યાણકર અને અંકિતા પટેલ વિરુદ્ધ ગુનો નોંધી કાર્યવાહી કરી હતી.