દિગ્ગજ મોટક કંપની મારુતિ સુઝુકીએ ગુરુવારે નવી કાર લીઝ સર્વિસની ઘોષણા કરી છે. તેને Maruti Suzuki Subscribeના નામથી લોન્ચ કરી છે. મારુતિએ આ નવી સર્વિસ જાપાનની Orix સાથે પાર્ટનરશિપમાં શરૂ કરી છે. નવી લીઝિંગ સર્વિસ મારુતિની જૂની લીઝિંગ સ્કીમ્સ કરતા અલગ છે કારણ કે તે કોર્પોરેટ ક્લાઈન્ટ્સની જગ્યાએ વ્યક્તિગત ગ્રાહકો માટે છે.
શું છે મારુતિ સુઝુકીની સબ્સક્રાઈબ સર્વિસ?
આ નવી સર્વિસમાં કોઈપણ ગ્રાહક મારુતિ સુઝુકીની નવી કારને લીઝ પર લઈ શકે છે. કંપનીએ 24 મહિના, 36 મહિના અને 48 મહિના સુધીના લીઝના ઓપ્શન આપ્યા છે. એટલું જ નહીં જો ગ્રાહક પસંદ કરેલા લીઝ ટેન્યોર પછી પણ કારને લીઝ પર રાખવા માંગે છે તો ટેન્યોર પુરો થવાના 30 દિવસ પહેલા લેખિતમાં રિક્વેસ્ટ મોકલવાની
રહેશે. લીઝ ટેન્યોર દરમિયાન ગ્રાહકે દર મહિને ફિક્સ મંથલી ચાર્જ આપવો પડશે. તેમાં કારનું મેન્ટેનન્સ અને ઈન્શ્યોરન્સ સામેલ છે. કાર લીઝ પર લેવા માટે કોઈ ડાઉનપેમેન્ટ આપવું નહીં પડે.
આ રીતે લીઝ પર લઈ શકાશે કાર
કોઈપણ સબસ્ક્રિપ્શન કે લીઝિંગ સર્વિસની જેમ મારુતિ સુઝુકી સબસ્ક્રાઈબમાં પણ તમારે કાર, તેના વેરિઅન્ટ અને લીઝ ટેન્યોર પસંદ કરી જરૂરી ફોર્મ ભરવાનું રહેશે. એપ્લિકેશન અપ્રૂવ થયા બાદ બુકિંગના 15 દિવસની અંદર તમને પસંદ કરેલી કાર મળી જશે. જોકે, તે કારની ઉપલબ્ધતા પર નિર્ભર કરે છે. કારની ડિલીવરી મળ્યા બાદ તમે મેન્ટેનન્સ, સર્વિસ અને ઈન્શ્યોરન્સ સહિત અન્ય સર્વિસ માટે ક્લેમ કરી શકો છો.
શું લીઝનો સમય પૂરો થયા પહેલાં કાર પાછી આપી શકાય છે
દરેક લોન ટેન્યોરની સાથે લોક-ઈન પીરિયડ છે. 24 મહિના માટે 12 મહિનાનો લોક-ઈન પીરિયડ, 36 મહિના માટે 18 મહિના અને 48 મહિના માટે 24 મહિનાનો લોક-ઈન પીરિયડ છે. જો તમે લોક ઈન પીરિયડ પૂરો થયા પહેલાં કાર પાછી આપવા માંગો છો, તો બાકી બચેલાં મહિના અને તેની સાથે 3 મહિનાની વધારાની ચૂકવણી કરવી પડશે. સાથે જ જો તમે લોક ઈન પીરિયડ પછી કાર પાછી આપી રહ્યા છો, તો તમારે 1-3 મહિનાની વચ્ચે ચૂકવણી કરવી પડશે.
કઈ કાર લીઝ પર લઈ શકાય છે
મારુતિ સુઝુકી સબ્સક્રાઈબ સ્કીમમાં સ્વિફ્ટ, ડિઝાયર, બલેનો, બ્રેઝા, સિયાઝ, XL6 અને અર્ટિગાને તમે લીઝ પર લઈ શકો
છો. બધી કારો નવી મળશે. મારુતિએ હાલ આ લીઝ સર્વિસ પાયલોટ પ્રોજેક્ટ તરીકે શરૂ કરી છે. હાલ આ સર્વિસ બેંગલુરુ અને ગુરુગ્રામમાં ઉપલબ્ધ છે.