ધબડકો / લૉકડાઉનથી ઑટો ઈન્ડસ્ટ્રીને ભારે ફટકો પડતા 90 ટકા સુધીનું વેચાણ ઘટ્યું, જાણો કઈ કંપનીનું કેટલું ઘટ્યું

• સૌથી મોટી કાર નિર્માતા કંપનીનાં વેચાણમાં આશરે 47 ટકાનો કડાકો
• ઑટો ઇન્ડસ્ટ્રીમાં પેસેન્જર વ્હીકલના વેચાણમાં પણ ભારે ઘટાડો 
• અશોક લેલેન્ડ કંપનીમાં તો માર્ચ મહિનાના વેચાણમાં 90 ટકાનો ધબડકો

આર્થિક મંદીનાં કારણે વાહનોના વેચાણમાં ભારે ઘટાડો જોવા મળ્યો હતો. કોરોના વાયરસ અને લોકડાઉને ઑટો ઇન્ડસ્ટ્રીની હાલત જ ખરાબ કરી નાખી છે. દેશની સૌથી મોટી કાર નિર્માતા કંપનીનાં વેચાણમાં આશરે 47 ટકાનો કડાકો જોવા મળ્યો છે. 

મારુતિ સુઝુકીએ આ વર્ષે માર્ચ મહિનામાં 83 હજાર યુનિટ વાહનોનું વેચાણ કર્યું. એક વર્ષ પહેલાં આ જ કંપનીએ લગભગ 1 લાખ 58 હજાર વાહનો વેચ્યા હતા. એક વર્ષમાં મારુતિ સુઝુકીના વેચાણમાં 47 ટકાનો ઘટાડો નોંધાયો છે. માત્ર ઘરેલું વેચાણ જ નહીં કંપનીને વાહનોની નિકાસમાં પણ ભારે ધબડકો સહન કરવો પડ્યો છે. ગયા વર્ષે કંપનીએ 10 હજાર યુનિટ વાહનોની નિકાસ કરી હતી જયારે આ વર્ષે તેમાં 55 ટકાનો કડાકો જોવા મળ્યો. આ વર્ષે કંપની માત્ર 4712 યુનિટનું જ નિકાસ કર્યું 

ઑટો ઇન્ડસ્ટ્રીમાં પેસેન્જર વ્હીકલના વેચાણમાં પણ ભારે ઘટાડો જોવા મળ્યો. મારુતિ સુઝુકીના પેસેન્જર વ્હીકલના વેચાણમાં આ વર્ષે માર્ચમાં 47 ટકાનો ઘટાડો થયો. આંકડાઓ પરથી સ્પષ્ટ છે કે ગયા વર્ષે માર્ચમાં કંપનીએ જેટલું વેચાણ કર્યું હતું તેના બદલામાં આ વર્ષે માર્ચ મહિનામાં કંપનીના વાહનોનું વેચાણ લગભગ અડધું જ થઇ ગયું. 

અશોક લેલેન્ડ કંપનીમાં તો માર્ચ મહિનાના વેચાણમાં 90 ટકાનો ધબડકો થયો. આ વર્ષે કંપનીએ 2179 વાહનોનું વેચાણ કર્યું. ગયા વર્ષે આ જ મહિનામાં કંપનીએ 21 હજાર વાહનો વેચી નાખ્યા હતા. ઘરેલું વેચાણની વાત કરીએ તો તે આ વર્ષે 1787 યુનિટ હતું જે ગયા વર્ષે 20 હજારને પાર આંકડો રહ્યો હતો. આમ મીડીયમ અને હેવી કોમર્શિયલ વાહનોના વેચાણમાં 90 ટકાનો ઘટાડો થયો છે.