કાર બનાવવાની સામગ્રીમાં વધી રહેલા ખર્ચને કારણે કંપનીને આગામી મહિનાથી ભાવવધારો કરવાની ફરજ પડી રહી હોવાનું કંપનીએ જણાવ્યું છે. રિપોર્ટ અનુસાર નવી કિંમતો 1 એપ્રિલથી લાગુ પડી શકે છે.
જો તમે પણ મારુતીની કાર લેવા માગતા હોય તો ઓછા ભાવે કાર ખરીદવાની તક છે કારણ કે આવતા મહિનાથી કારના વધારે પૈસા આપવા પડશે. એપ્રિલથી Maruti Alto થી માંડીને Maruti Brezza સુધીના તમામ મોડલ મોંઘા થઈ જશે. ઉલ્લેખનીય છે કે બીજી વાર કંપની તેની કારની કિંમતોમાં વધારો કરી રહી છે. આ પહેલા કંપનીએ ગત જાન્યુઆરીમાં ગાડીઓની કિંમત વધારી હતી.
મારુતી સુઝુકીએ એક નિવેદન જારી કરીને જણાવ્યું કે નવી કિંમત અલગ અલગ મોડલો પર નિર્ભર કરશે. જોકે કારના ભાવમાં કેટલો વધારો કરાશે તે અંગે કંઈ જણાવાયુ નથી. મારુતી સુઝુકીની ઉપરાંત બીજી કંપનીઓએ પણ તેના મોડલની કિંમતમાં વધારો કર્યો છે. જાન્યુઆરીમાં મારુતીએ તેની કારની કિંમતમાં લગભગ 34,000 રુપિયાનો વધારો કર્યો હતો. મહિન્દ્રા એન્ડ મહિન્દ્રાએ વાહનોની કિંમતમાં 1.9 ટકા અને ટાટા મોટર્સે લગભગ 26,000 રુપિયાનો વધારો કર્યો હતો.
ઈન્ડીયા રેટિંગ્સ એન્ડ રિસર્ચના તાજેતરના એક સ્ટડીમાં દાવો કરાયો છે કે વાહનોની કિંમત તથા પેટ્રોલ-ડીઝલમાં અસહ્ય ભાવવધારા છતાં પણ પ્રવાસી વાહન અને દ્વિચક્રી વાહનોના માગમાં ઘટાડો થયો નથી.