દેશની સૌથી મોટી કાર ઉત્પાદક કંપની મારુતિ સુઝુકીએ સોમવારે તેની લોકપ્રિય હેચબેક સ્વિફ્ટ અને અન્ય CNG મોડલોની કિંમતમાં 15,000 રૂપિયા સુધીના વધારાની જાહેરાત કરી છે. કંપનીએ જણાવ્યું હતું કે વિવિધ ઇનપુટ ખર્ચમાં વધારાને કારણે સ્વીફ્ટ અને અન્ય તમામ CNG મોડલોની કિંમતમાં વધારો કરવામાં આવ્યો છે. કંપની જણાવ્યું છે કે, 'ગત મહિને રો મટિરિયલ્સના ભાવમાં વધારો થવાના કારણે ઇલેક્ટ્રિક કારના ભાવમાં વધારો કરવામાં આવ્યો છે.
મોટાભાગના CNG મોડલોની કિંમતમાં રૂપિયા 15,000નો વધારો
કંપનીએ પોતાના નિવેદનમાં જણાવ્યું છે કે હેચબેક સ્વિફ્ટ અને અન્ય CNG મોડલોની કિંમતમાં રૂપિયા 15,000નો વધારો કરવામાં આવ્યો છે. તમામ મોડલોની નવી કિંમતો 12 જુલાઈ, 2021થી લાગુ થશે. ભાવ વધારા પહેલાં દિલ્હીના એક શોરૂમમાં સ્વિફ્ટની કિંમત રૂ. 5.73 લાખથી લઇને 8.27 લાખ સુધીની હતી. મારુતિ સુઝુકી અલ્ટો, સેલેરિયો, એસ-પ્રેસો, વેગનઆર, ઇકો અને અર્ટીગાના CNG મોડલોનું વેચાણ કરે છે. તેમની કિંમત રૂપિયા 4.43 લાખથી લઈને 9.36 લાખ રૂપિયા સુધીની છે. આ વર્ષે એપ્રિલમાં કંપનીએ તેના મોટાભાગના મોડેલોની કિંમતમાં રૂપિયા 22,500 સુધીનો વધારો કર્યો હતો. તે સમયે સ્વીફ્ટ અને સેલેરિયોના ભાવમાં કોઈ ફેરફાર કરવામાં આવ્યો ન હોતો.
કંપનીએ નાણાકીય પરિસ્થિતિને જાળવવા માટે કર્યો હતો નિર્ણય
MSIના એક્ઝિક્યુટિવ ડિરેક્ટર (સેલ્સ એન્ડ માર્કેટિંગ) શશાંક શ્રીવાસ્તવે જણાવ્યું હતું કે સ્ટીલ અને કેટલીક ધાતુઓ, જેમ કે રોડિયમ અને પેલેડિયમની કિંમતોમાં નોંધપાત્ર વધારો થયો છે. એપ્રિલમાં અમે મોટાભાગના મોડેલોની કિંમતમાં વધારો તે વિચારીને કર્યો હતો કે ધાતુઓના ભાવ ભવિષ્યમાં નીચે આવશે. પરંતુ તેવું બન્યું નહીં. છેલ્લા ઉપાય તરીકે, અમે કંપનીની નાણાકીય પરિસ્થિતિને જાળવવા માટે તેની ઇલેક્ટ્રિક કારના ભાવમાં વધારો કરવાનો નિર્ણય કર્યો હતો.
ધાતુઓના ભાવમાં વધારો થતાં CNG મોડલોની કિંમતમાં કર્યો છે વધારો
શશાંક શ્રીવાસ્તવે જણાવ્યું હતું કે સ્ટીલની કિંમત કિલો દીઠ રૂપિયા 38થી વધીને 68 રૂપિયા કિલો દીઠ થઈ ગઈ છે. જ્યારે રોમોડિયમનો ભાવ ગ્રામ દીઠ રૂપિયા 19,000થી વધીને ગ્રામ દીઠ રૂપિયા 66,000 થઈ ગયો છે. જે ઉત્પાદન ખર્ચ પર સીધી અસર કરે છે. સમગ્ર વિશ્વમાં કડક ઉત્સર્જન ધોરણોને લાગુ કરવાને કારણે રોડિયમ અને પેલેડિયમની માંગમાં ઘણો વધારો થયો છે. શશાંક શ્રીવાસ્તવે વધુમાં જણાવ્યું કે, નજીકના ભવિષ્યમાં આ ધાતુઓના ભાવ નીચે આવશે તેવા કોઈ સંકેત નથી. તેથી કંપની દ્વારા ધાતુઓના વધેલા ભાવના ભારનો અડધો ભાગ ગ્રાહકો પર મૂકવામાં આવ્યો છે.