ભારતની સૌથી મોટી કાર નિર્માતા કંપની Maruti Suzukiએ ગુરુવારે પોતાની કારના મોડલ્સની કિંમતમાં વધારાની ઘોષણા કરી. કંપનીના એક અધિકારીના જણાવ્યા અનુસાર ‘કોમોડિટી અને ડિસ્ટ્રીબ્યુશન કોસ્ટમાં વધારાની સાથે પ્રતિકૂળ ફોરેન એક્ચેન્જ રેટ્સના કારણે આ વધારો કરવામાં આવ્યો છે.’ કારની કિંમતોમાં 6100 રૂપિયા (એક્સ શો-રૂમ દિલ્હી) વધારો કરવામાં આવ્યો છે અને નવી કિંમતો તાત્કાલિક ધોરણે લાગુ થઈ ગઈ છે.
એક સૂત્ર દ્વારા કહેવામાં આવ્યું કે ‘Maruti Suzukiના પોપ્યુલર મોડલમાંથી 98% સ્થાનીક માર્કેટમાં વેચાય છે અને તેમને આનું અમુક રૉ-મટિરિયલ ઈમ્પોર્ટ કરવું પડે છે આવામાં એડવર્ઝ કરન્સીની અસરના કારણે કંપનીએ આ ભાવવધારો કરવો પડ્યો છે.’
અગાઉ આજે ડૉલરની સામે રૂપિયો 70.32 રૂપિયાની ઐતિહાસિક તળિયે પહોંચ્યા બાદ સુધાર પર આવ્યો હતો. જોકે ભારતીય કરન્સીમાં આવેલી નબળાઈની ખરાબ અસર આયાતકારો પર થઈ છે. કારણ કે તેમને બહારથી માલ મંગાવવા તથા મોકલવા માટે ડૉલરમાં ડીલ કરવાની હોય છે અને તેના માટે તેમણે અગાઉની સરખામણી વધુ રૂપિયા ખર્ચવા પડી રહ્યાં છે.
સૂત્રના જણાવ્યા અનુસાર કંપનીની હેચબેક સ્વિફ્ટ (ડિઝલ વેરિઅન્ટ)ની કિંમતમાં કોઈ ફેરફાર જોવા નહીં મળે. જ્યારે Maruti SUV બ્રેઝામાં સૌથી વધુ 6100 રૂપિયાનો ભાવવધારો થયો છે. બ્રેઝા હાલમાં Maruti Suzukiની તેના સેગમેન્ટમાં બેસ્ટ સેલિંગ કાર છે.
અગાઉ ગુરુવારે જ જર્મનીની લક્ઝરી કાર મેકર કંપની મર્સિડિઝ બેન્ઝે પણ પોતાની કાર્સની કિંમતમાં સપ્ટેમ્બરથી 4%નો વધારો કરવાની ઘોષણા કરી છે.
આ ઉપરાંત ટાટા મોટર્સ મહિન્દ્રા એન્ડ મહિન્દ્રા અને હોન્ડા જેવી કાર નિર્માતા કંપનીઓ આ મહિનાના અંત સુધીમાં પોતાની કાર્સમાં ભાવવધારાની જાહેરાત કરી શકે છે.