સુવિધા / હવે કારના માલિક બનવા તમારે તેને ખરીદવાની જરૂર નહીં પડે, મારૂતિની શાનદાર ઑફર

કંપનીએ મારુતિ સુઝુકી સબ્સ્ક્રાઇબ નામનો એક પ્રોગ્રામ શરૂ કર્યો છે. આ પ્રોગ્રામ હેઠળ તમે નવી સ્વીફ્ટ, ડિઝાયર, વિટારા બ્રેઝા, એર્ટિગા, બલેનો, સિયાઝ અને XL6ને 12 મહિના, 18 મહિના, 24 મહિના, 30 મહિના, 36 મહિના, 42 મહિના અને 48 મહિના માટે સબ્સ્ક્રાઇબ કરી શકો છો.

સરળ ભાષામાં સમજીએ તો તમે આ સમયગાળા દરમિયાન કારને તમારા ઘરે લઈ જઇ શકો છો. કંપની તરફથી કાર અને સમયગાળો પસંદ કરવાની સ્વતંત્રતા આપવામાં આવી છે. મતલબ કે તમે તમારી ઇચ્છા મુજબ કારને ઘરે લઇ જઇ શકો છો.

આ સુવિધા અંતર્ગત ગ્રાહક પાસેથી ન તો મેન્ટેનન્સ કોસ્ટ અથવા ન તો ઇન્શ્યોરન્સ કોસ્ટ ચૂકવવામાં આવશે. તે જ સમયે ડાઉન પેમેન્ટ ચૂકવવાની પણ જરૂર નથી. ગ્રાહકોએ ફક્ત કારનું ભાડુ ચૂકવવાનું રહેશે. સબ્સ્ક્રિપ્શન અવધિ સમાપ્ત થયા પછી ગ્રાહકને બાયબેક ઓપ્શનની પણ સુવિધા મળશે.

જો તમે આ સુવિધાનો લાભ લેવા માંગો છો તો તમારે તમામ જરૂરી ડોક્યુમેન્ટ સાથે નજીકના ડીલર પાસે જવાનું રહેશે. આ સાથે તમે https://www.marutisuzuki.com/subscribe વેબસાઈટ વિઝિટ કરીને તમારું ફોર્મ સબમિટ કરી શકો છો. 

આ ફોર્મમાં ફોન નંબર સહિતની અન્ય મહત્વપૂર્ણ માહિતી તમારી પાસેથી લેવામાં આવશે. આ પછી, કંપની તમારો સંપર્ક કરશે. હાલમાં, બેંગલુરુ, પુના, હૈદરાબાદ અને ગુરુગ્રામમાં આ સુવિધા આપવામાં આવી રહી છે.

એક્ઝિક્યુટિવ ડિરેક્ટર (માર્કેટિંગ અને સેલ્સ) શશાંક શ્રીવાસ્તવના જણાવ્યા અનુસાર, બદલાતા બિઝનેસ ડાયનેમિક્સમાં ઘણા ગ્રાહકો પબ્લિક ટ્રાન્સપોર્ટથી પર્સનલ વ્હીકલમાં શિફ્ટ થવા માંગે છે. તેમને એક એવો ઉપાય જોઈએ છે કે જેનાથી તેમના ખિસ્સા પર વધારે ભાર ન આવે. આ કારણ છે કે આ યોજના શરૂ કરવામાં આવી છે.