થોડા સમય પહેલા લદ્દાખની ગલવાન ઘાટીમાં વીરગતિ પામેલા કેપ્ટન દિક્ષાંત થાપા માટે તેમની ગર્લફ્રેન્ડે ઈમોશનલ પોસ્ટ શેર કરી છે.
દિક્ષાંત દુર્ઘટના સમયે હથિયારોનું લોડિંગ કરાવી રહ્યા હતા. એવામાં એક ઇન્ફેન્ટ્રી કોમ્બેટ વ્હીકલને એક ટ્રકે ટક્કર મારી દીધી હતી. દિક્ષાંત આ ટ્રક નીચે આવી જતા તેમનું કરુણ મોત નીપજ્યું હતું.
તેમની ગર્લફ્રેન્ડ તબ્બુ સાથે તેઓ ઘણા સમયથી રિલેશનશિપમાં હતા. તબ્બુએ તેની ઇન્સ્ટાગ્રામ પ્રોફાઈલનું નામ તબ્બુ દિક્ષાંત રાખ્યું હતું. તેણે દિક્ષાંત સાથેના ઘણા ફોટોઝ શેર કર્યા હતા. દિક્ષાંત શહિદ થયા બાદ તેણે તેની ઈમોશનલ લવ સ્ટોરી શેર કરી હતી.
તબ્બુએ લખ્યું છે કે,"હવે તમામ ક્ષણો જ્યાંથી શરુ થઇ હતી ત્યાં જ ફરી આવીને ઉભી રહી ગઈ છે. દિક્ષાંત થાપા. મારો દિક્ષુ. હવે તે આ દુનિયામાં નથી અને સ્વર્ગમાં ચાલ્યો ગયો છે પરંતુ એ હંમેશ માટે મારા દિલમાં રહેશે.
આજે જયારે હું ભૂતકાળમાં નજર કરું છું ત્યારે મને થાય છે કે હું આટલી નસીબદાર કેવી રીતે હતી? આખી દુનિયાનો સૌથી શ્રેષ્ઠ પુરુષ મને મળી ગયો! અને એને મારા માટે આટલી લાગણી થઈ ગઈ!
હું તેને 2012માં ફેસબુક ઉપર મળી હતી. હું એક શરમાળ કિશોરી હતી અને તે એક ઉત્સાહથી ભરપૂર, સંગીતપ્રેમી છોકરો હતો. અમે ખૂબ ખૂબ વાતો કરી અને 2014માં તેણે મને પ્રપોઝ કર્યું અને અમે રિલેશનશિપમાં આવી ગયા. અમે સૌપ્રથમ વખત ધરમશાલામાં એક મેળામાં મળ્યા હતા જ્યાં તે એક cool kid હતો અને હું એક શરમાળ, ગભરાયેલી છોકરી. તે મને હંમેશા કહેતો કે તેને ભારતીય સેનામાં જોડાવાની કેટલી ઈચ્છા ધરાવે છે અને મને તેની એ બાબત ખૂબ આકર્ષિત કરતી.
અમે એક જ કોલેજમાં ભણતા હતા. તે કોલેજના બેન્ડનો ડ્રમર હતો. તેને શોઝમાં પરફોર્મ કરતો જોઈને મારા હ્રદયના ધબકારા વધી જતા. તેણે એક દિવસ "છુ લો" નામનું એક ગીત મને ડેડિકેટ કર્યું હતું. મને નથી ખબર હવે હું કેવી રીતે એ ગીતને સાંભળી શકીશ.
હવે તારા વગરના જીવનની કલ્પના કરવી પણ મુશ્કેલ છે. હવે દરરોજ રાત્રે વીડિયો કોલ ઉપર ગીત ગાવા માટે તું હાજર નહીં હોય. હવે તું મારી ક્ષણોનું વીડિયો રેકોર્ડિંગ નહીં કરતો હોય અને મારા ફોટોઝ કારણ વિના શેર નહીં કરતો હોય. હવે તું મને એક ટ્રોફીને જેમ નહીં રાખે.
હું વિચારું તો ખ્યાલ આવે છે કે મારા બાળપણ, કિશારાવસ્થા, યુવાની બધા જ તબક્કામાં તું મારી સાથે હતો. હું તારા સ્મરણોમાંથી કેવી રીતે બહાર આવી શકીશ? કેટલી બધી યોજનાઓ, કેટલા બધા સપના, અઢળક પ્રેમ અને અચાનક આ બધું પત્તાના મહેલની જેમ ખરી પડ્યું!
હું નથી જાણતી કે મૃત્યુ બાદ આત્માનું શું થાય છે પણ જો એવો કોઈ પણ મોકો મળે કે હું તારી સાથે ફરીથી ફેસબુક ઉપર ચેટ કરી શકું, તારા હાથમાં હાથ નાખીને મેળામાં ચાલી શકું, તારી સાથેના ફોન ઉપર વાત કરતા કરતા સુઈ જઈ શકું, તો હું આ બધું જ ફરીથી કરવા તૈયાર છું. તું હંમેશામાં મારી સાથે રહીશ.