ન્યાયિક / સગીર પત્ની સાથે શારીરિક સંબંધ બાંધવો ગુનો ગણાશે, લાગુ પડશે POCSO- HCનો ચુકાદો

• બાળલગ્નને લઈને કેરળ હાઈકોર્ટની મોટી ટીપ્પણી 
• સગીર પત્ની સાથે શારીરિક સંબંધ બાંધવો ગુનો ગણાશે
• આવા કિસ્સામાં પોક્સો એક્ટ લાગુ પડી શકે
• પોક્સો એક્ટ બાળ દુષ્કર્મની વિરૃદ્ધ છે

મુસ્લિમ પર્સનલ લો અને બાળલગ્ન અંગે કેરળ હાઈકોર્ટે મોટી વાત કહી છે. એક આરોપીની જામીન અરજી પર સુનાવણી કરતા કોર્ટે કહ્યું કે, આરોપી મુસ્લિમ હોય તો પણ પોક્સો એક્ટ તેને લાગુ પડશે. કોઈ પણ સમુદાયને તેમાંથી બાકાત રાખી શકાય નહીં. જો કોઈ પુરુષ પોતાની સગીર પત્ની સાથે શારીરિક સંબંધ બાંધે છે, તો આ કૃત્ય તેને લાગુ પડે છે. જસ્ટિસ બચુ કુરિયન થોમસની સિંગલ જજની બેન્ચે કહ્યું હતું કે, જો કોઇ પક્ષ સગીર હોય તો પોક્સો એક્ટ લાગુ પડે છે. કોર્ટે આરોપીની જામીન અરજી ફગાવી દીધી હતી. 

શું હતી ઘટના 
31 વર્ષના એક વ્યક્તિએ એક સગીર યુવતી પર બળાત્કાર ગુજાર્યો હતો. આ પછી તેણે લગ્ન પણ કરી લીધા હતા. આરોપ છે કે તેણે બાળકીનું અપહરણ કર્યું હતું અને પછી તેની સાથે બળાત્કાર ગુજાર્યો હતો. બાદમાં દબાણમાં આવીને લગ્ન કર્યા હતા. આરોપી તરફથી કહેવામાં આવ્યું હતું કે, તેણે કાયદાકીય રીતે લગ્ન કર્યા છે અને મુસ્લિમ પર્સનલ લો બોર્ડ તેની મંજૂરી આપે છે.

મુસ્લિમોમાં 18 વર્ષની કોઈ મર્યાદા નથી- આરોપીની રજૂઆત 
આરોપીએ કહ્યું કે તેના સમુદાયમાં 18 વર્ષની વયની કોઈ પ્રતિબંધ નથી. આથી પોક્સો એક્ટ હેઠળ સજા આપી શકાય નહીં. તેણે કહ્યું કે તેણે પીડિતા સાથે માર્ચ 2021 માં લગ્ન કર્યા હતા અને પર્સનલ લો મુજબ, તે બંને પતિ-પત્ની છે. તેમાં હરિયાણા, દિલ્હી અને કર્ણાટકની ઉચ્ચ અદાલતોના અનેક ચુકાદાઓનું ઉદાહરણ પણ ટાંકવામાં આવ્યું હતું, જોકે કોર્ટે તેની આવી દલીલ ફગાવી દીધી હતી. 

બન્ને પક્ષમાંથી કોઈ એક સગીર હોય તો પોક્સો લાગુ પડી શકે 
જસ્ટિસ કુરિયને કહ્યું, "જો બંને પક્ષોમાંથી કોઈ એક સગીર હોય, તો લગ્ન માન્ય રહેશે નહીં અને તે પોક્સો એક્ટ હેઠળ આવે છે." બીજી કોર્ટના નિર્ણયો અંગે તેમણે કહ્યું કે હું અન્ય નિર્ણયો સાથે સહમત નથી. કોર્ટે કહ્યું કે પોક્સો એક્ટ ખૂબ જ સમજી વિચારીને બનાવવામાં આવ્યો હતો. તે બાળલગ્ન અને બાળ જાતીય શોષણની વિરુદ્ધ છે. આ મુજબ લગ્ન બાદ પણ સગીર સાથે શારીરિક સંબંધ બાંધવા અશક્ય છે. બાળલગ્ન સગીરના વિકાસ પર અસર કરે છે. તે સમાજ માટે અભિશાપ છે. આ દલીલ કરતાં કોર્ટે આરોપીની જામીન અરજી ફગાવી દીધી હતી.