અર્થતંત્ર ઘેરા સંકટમાં / માર્કેટ ૧૧ મહિનાના લો લેવલ પર, સેન્સેક્સ અને નિફ્ટી રેડ ઝોનમાં

સેન્સેક્સ ૩૪ પોઇન્ટના ઘટાડા સાથે ૩૬,૫૨૮ પર અને નિફ્ટી ૧૨ પોઇન્ટના ઘટાડા સાથે ૧૦,૭૮૫ પર ટ્રેડ કરી રહી છે. ઇકોનોમીની સ્થિતિ વધુ ખરાબ કરતા આંકડાઓ અને ૧૦ સરકારી બેન્કોને મર્જ કરીને ચાર બેન્ક બનાવવાના સરકારના નિર્ણયના કારણે લાગેલા ઝટકાથી શેરબજારમાં ગઇ કાલે સૌથી મોટો કડાકો જોવા મળ્યો હતો અને સેન્સેક્સ ૧૧ મહિનાની લો સપાટી ઉપર પહોંચી ગયો છે.

શેરબજારમાં સતત આવી રહેલા કરેક્શનના કારણે નાની કંપનીઓના રોકાણકારોને સૌથી વધુ નુકસાન થયું છે. નિફ્ટી-૫૦૦માં સામેલ કંપનીઓના ૫૦૦ શેરમાંથી ૩૪૫ શેરનું રિટર્ન નેગેટિવ રહ્યું છે અને ૫૦ ટકા શેર ૫૦ ટકાથી વધુ ડાઉન છે. એટલું જ નહીં મર્જર પ્લાનમાં સામેલ એન્કર બેન્કોના શેર પણ ૧૨ ટકાથી વધુ તૂટ્યા છે.

આજના ટ્રેડિંગમાં ફાર્મા શેરમાં જોરદાર વેચવાલી જોવા મળી છે. સન ફાર્મા ચાર ટકા તૂટ્યો છે. ઇન્ડસઇન્ડ બેન્ક, ટાટા મોટર્સ અને આરઆઇએલ પણ નબળા છે. મજબૂત શેરમાં ઇન્ફોસિસ, આઇટીસી અને હીરો મોટો કોર્પનો સમાવેશ થાય છે. પ્રાઇવેટ બેન્કોમાં વેચવાલીને લઇને બેન્ક નિફ્ટી ૦.૨૧ ટકા ઘટીને ૨૬,૭૭૭ પર ટ્રેડ કરી રહી છે.

ગઇ કાલે રૂપિયામાં સૌથી મોટો એટલે કે ૧૦૦ પૈસાના કડકા બાદ આજે રૂપિયામાં થોડી રિકવરી આવી છે અને રૂપિયો ૨૧ પૈસાના વધારા સાથે ૭૨.૧૯ની સપાટીએ ખૂલ્યો હતો. ગઇ કાલે ૧૦૦ પૈસા તૂટીને રૂપિયો ૭૨.૪૦ પર બંધ રહ્યો હતો.