મેઘમહેર / સુરત અને સૌરાષ્ટ્રના ચેકડેમોમાંથી પાણી છોડાતા અનેક ગામો બેટમાં ફેરવાયા, વાહન વ્યવહાર પણ ખોરવાયો

• સુરતના ઉકાઈ ડેમમાંથી પાણી છોડાઈ 
• સૌરાષ્ટ્રના 21 ડેમ એક જ રાતમાં છલકાયા
• અનેક ગામો બેટમાં ફેરવાતા સંપર્ક વિહોણા

રાજ્યમાં અનેક જિલ્લાઓમા મેઘમહેર બાદ હવે મેઘકહેર જેવી સ્થિતિ જોવા મળી રહી છે અનેક વિસ્તારોમાં જળબંબાકારને પગલે સર્વત્ર પાણી જ પાણી જોવા મળી રહ્યા છે. મહત્વનું છે કે અનેક ચેકડેમ છલોછલ થઈ જતા પાણીને ડાઈવર્ટ કરવાનું સ્થિતિ ઉભી થઈ છે જ્યારે ડેમમાંથી પાણી છોડવામાં આવતા નીચાણવાળા ગામોમાં પાણી ફરી વળતા ગામો હવે બેટમાં ફરવાયા છે. 

સુરતના ઉકાઈ ડેમમાંથી પાણી છોડાઈ 

સુરતના ઉકાઈ ડેમમાંથી પાણી છોડાઈ રહ્યું છે ત્યારે હવે ઉકાઈ ડેમની સપાટી રૂલ લેવલને પાર પહોંચી છે મહત્વનું છે કે ડેમની ભયજનક સપાટીથી માત્ર 4 ફુટ દૂર છે. ત્યારે હાલની ડેમની જળસપાટી 341.12 ફૂટ પહોંચી છે તો ઉકાઇ ડેમનું રૂલ લેવલ 340 ફૂટ છે. હાલ ઉકાઇ ડેમમાં પાણીની આવક 29 હજારથી વધુ થઈ રહી છે જેથી ડેમનુ રૂલ લેવલ મેન્ટેઇન કરવા ડેમમાંથી 98 હજાર 853 ક્યૂસેક પાણી તાપી નદીમાં છોડાઇ રહ્યું છે તેમજ ઉકાઇ ડેમના 22માંથી 10 ગેટ ખોલવામાં આવ્યા છે. જ્યારે ડેમના 9 ગેટ 4 ફૂટ અને 1 ગેટ 3 ફૂટ ખોલવામાં આવ્યો છે. 

સૌરાષ્ટ્રના 21 ડેમ એક જ રાતમાં છલકાયા

આ તરફ સમગ્ર સૌરાષ્ટ્રમાં મેઘમહેર જોવા મળી રહી છે. સૌરાષ્ટ્રના 81 ડેમમાંથી 21 ડેમ એક જ રાતમાં છલકાયા જતા ડેમોમાં નવા નીર આવ્યા છે.  રાજકોટના 18, જામનગરના 16 ડેમમાં આવ્યા નવા નીર આવતા પાણીની આવકમાં વધારો થયો છે. જ્યારે મોરબીના 6 ડેમમાં પાણીના આવક થતા ડેમના આમ સૌરાષ્ટ્રના 14 જેટલા ડેમના દરવાજા ખોલવામાં આવ્યા છે. જો વાત કરવામાં આવે તો  ભાદર-2, આજી-2 અને 3, ડોંડી, ઉંડ-1 ડેમના દરવાજા ખોલાયા છે જ્યારે ન્યારી-2, વેણુ-2, અને મોજ ડેમના દરવાજા ખોલાયા છે. 

ગામો બેટમાં ફેરવાતા અનેક ગામો સંપર્ક વિહોણા

સૌરાષ્ટ્રમાં ભારે વરસાદને કારણે પરિસ્થિતિ વિકટ બની છે.  તેમજ સૌરાષ્ટ્રના કેટલાય ગામો બેટમાં ફેરવાયા જતા અનેક ગામો સંપર્ક વિહોણા બન્યા છે. ગ્રામજનો સલામત છે પણ અનેક ગામો હજૂ સંપર્ક વિહોણા બન્યા છે. વરસાદને કારણે રાજકોટ, જામનગર, પોરબંદર, જૂનાગઢ જિલ્લામાં ભારે અસર થઈ હોવાનું અનુમાન સેવાઈ રહ્યું છે. જ્યારે 15 ડેમો ઓવરફ્લો થતાં નીચાણવાળા વિસ્તારોમાં બેટમાં ફેરવાયા છે. વરસાદને કારણે અનેક માર્ગો પણ પાણી ફરી વળતા વાહન વ્યવહાર પણ ખોરવાયો છે. તેમજ ગ્રામ્ય વિસ્તારોમાં હજુ ST રૂટ પણ બંધ કરવાની ફરજ પડી છે. 

કોસ્ટગાર્ડ દરિયામાં ફસાયેલા 7 માછીમારોનું રેસ્ક્યૂ કર્યું 

જૂનાગઢના માંગરોળમાં ભારે વરસાદને કારણે વલ્લભગઢથી કેશોદ સુધીના રસ્તાઓ ઉપર ફરી વળ્યા પાણી જેથી વાહનચાલક અને રાહદારીઓને મુશ્કેલીનો સામનો કરવો પડ્યો તો દીવના વણાંકબારામાં દરિયામાં હોડી ડૂબવાનો મેસેજ મળતા કોસ્ટગાર્ડ રેસ્ક્યૂ ઓપરેશન કરી ફસાયેલા 7 માછીમારોને બચાવ્યા હતા. ખરાબ હવામાનની વચ્ચે પણ કોસ્ટગાર્ડે 1 કલાકની અંદર રેસ્ક્યુ ઓપરેશન  પાર પાડ્યું હતું. 

જામકંડોરણાથી ગોંડલ તરફનો હાઈવે બંધ કરાયો 

ભારે વરસાદને પગલે પૂલ તૂટી જતા જામકંડોરણાથી ગોંડલ તરફનો હાઈવે બંધ કરાયો હતો તેમજ પુલ તરફ બેરીકેટ ફણ લગાવી દેવાયા છે. ભારે વરસાદને કારણે ન્યારી નદી બંને કાંઠે વહેતી થઈ છે. તેમજ નદી કિનારાના ગામોને અલર્ટ પણ કરાયા છે. આ તરફ રાજકોટના લોધિકામાં સૌથી વધુ 20 ઈંચ વરસાદ નોંધાતા આજી ડેમમાં પાણીની આવકમાં વધારો થયો છે. ડેમને વધુ ભરવા માટે ડેમના દરવાજા પણ બંધ કરી દેવામાં આવ્યા છે.