સુરતમાં નવી સિવિલ હોસ્પિટલમાંથી ગાંજાનો છોડ મળી આવતા તંત્ર દોડતું થયું હતું
સુરતમાં નવી સિવિલમાંથી મળ્યો ગાંજાનો છોડ
સિવિલ કેમ્પસમાં છોડ બન્યો ચર્ચાનો વિષય
છોડ મળી આવતા સિવિલ વિવાદમાં
સુરતમાં નવી સિવિલ હોસ્પિટલમાંથી ગાંજાનો છોડ મળી આવતાં સિવિલ ફરી એકવાર વિવાદમાં આવી ગઈ છે. હોસ્પિટલ એરિયામાં MICUની પાછળના ભાગે ઊગેલો ગાંજાનો છોડ સિવિલ કેમ્પસમાં ચર્ચાનો વિષય બની ગયો છે. છોડ લગભગ 7થી 8 મહિનાનો હોવાનો અંદાજ લગાવાઈ રહ્યો છે. ગાંજાનો છોડ મળવાની ચર્ચા વહેતા સિવિલ RMO સહિતનો સમગ્ર સ્ટાફ દોડતો થઈ ગયો હતો.
છોડની ઊંચાઈ 5 ફૂટ, 7-8 મહિનાનો હોવાના અંદાજ
મળી આવેલો છોડ ગાંજાનો જ હોવાથી હોસ્પિટલ મેનેજમેન્ટ સામે એક મોટો સવાલ ઊભો થઈ રહ્યો છે કે કોઈ ઈસમ દ્વારા આ ગાંજાનો છોડની વાવણી કરવામાં આવી છે કે પછી અન્ય કારણસર આ છોડ ઊગી નીકળ્યો છે. ગાંજાનો છોડ 7-8 મહિનાનો હોવાના અંદાજથી હોસ્પિટલ સ્ટાફની બેદરકારી સામે પણ સવાલો થઈ રહ્યા છે. છોડની ઊંચાઈ 5 ફૂટ આસપાસ છે. સમગ્ર ઘટના સિવલ કેમ્પસમાં ચર્ચાનો વિષય બનતા સિવિલ RMOના કાને આ વાત પહોંચી હતી. જે બાદ પોલીસ દ્વારા છોડને સળગાવી દેવામાં આવ્યો હોવાનું સિવિલ હોસ્પિટલના કર્મચારીઓનું કહેવું છે.
બાબત ગંભીર છે કડક કાર્યવાહી થશે: કેતન નાયક, RMO, સિવિલ
સિવિલ RMO કેતન નાયકે તાત્કાલિક ઘટનાની ગંભીરતાને સમજી મેનેજમેન્ટ સ્ટાફને જવાબદાર સામે યોગ્ય પગલાં લેવાની વાત કહી છે. તેમણે કહ્યું હતું કે ખૂબ જ ગંભીર બાબત છે, એની ચોક્કસ તપાસ થશે. પણ સવાલ એ છે કે અજાણ્યા પોલીસ કર્મચારીએ છોડ ઉખાડી તેની બાજુમાં 15 મીટરના એરિયામાં છોડ સળગાવી દઈ પુરાવા નાશ કરવાનો પ્રયત્ન કર્યો હતો. જે બાબતે સિવલ RMO કેતન નાયકે કહ્યું હતું કે છોડના નમૂના લઈ ચકાસણી અર્થે મોકલી દેવામાં આવ્યા છે. તે કુદરતી રીતે જ ઊગી નીકળ્યો કે છોડની વાવણી કોઈ દ્વારા કરવામાં આવી તે સધન તપાસ હાથ ધરવામાં આવશે.