કોરોના આફતના શમતા પડઘા વચ્ચે, મુખ્યમંત્રી પદેથી વિજય રૂપાણીના રાજીનામાં બાદ ગુજરાતની રાજનીતિમાં નવો ભૂકંપ સર્જાયો હતો, રાજ્યમાં નવી સરકારની રચના જરૂરી બની ગઈ હતી, ત્રણ ચાર દિવસના ગજગ્રાહ, તંગદિલી અને મંથન બાદ આખરે રાજ્યને નવું મંત્રીમંડળ મળ્યું ખરું, પરંતુ સરકારની ઈમેજ નવેસરથી ઊભી કરવા માટે જે નવી સરકાર રચાઈ છે તેના માંથે જવાબદારીનો ભાર કંઈ ઓછો નથી, ત્યારે ગુજરાતની નવી રચાયેલી સરકાર સામે રાજ્યની સ્થિતિ અને સરકારની ઈમેજ સુધારવા માટે કેવા હશે જોઈએ
દરેક જ્ઞાતિને સાથે લઈ ચાલવાનો પડકાર
પોતાના મુખ્યમંત્રી તરીકેના કાર્યકાળ દરમિયાન વિજય રૂપાણીએ તમામ જ્ઞાતિ સમુદાયને સાથે રાખીને ચાલવાનો પ્રયાસ કર્યો હતો પરંતુ તેમાં તેમને ધારી સફળતા મળી ન હતી, વિવિધ જ્ઞાતિ જૂથો સમયાંતરે પોતાની નારાજગી પ્રગટ કરવામાં અને સરકાર પર દબાણ ઊભું કરવામાં સફળ રહ્યા હતા, ત્યારે હવે નવી સરકાર પર પાટીદારો, દલિતો, આદિવાસીઓ અને ઓબીસી સમુદાયને વિશ્વાસમાં લઈને સાથે જાળવી રાખવાનો પડકાર ઊભો છે
વિરોધ પક્ષની રણનીતિનો ફેલ કરવાનો પડકાર
વિજય રૂપાણી પાસેથી મુખ્યમંત્રી પદ છીનવી લેવામાં આવ્યું એ બાબત વિજયભાઈ ક્યાંક નબળાં પડ્યા હોઈ શકે તેની તરફ ઈશારો કરી રહી છે, ખાસ કરીને વિરોધપક્ષના પ્રહારને ખાળવામાં વિજયભાઈ ક્યાંક ઉણાં ઉતર્યા હોવાનું ભાજપ હાઈકમાન્ડને લાગ્યું છે, સરકારની નિષ્ફળતાની વાત જનતા સુધી લઈ જવામાં અને જનતામાં રોષ ફેલાવવામાં કોંગ્રેસ ઘણી સફળ રહી છે, અધૂરામાં પૂરું હવે રાજ્યમાં આપ ધીમાં પગલે પ્રવેશ કરીને પોતાની રણનીતિ વિસ્તારી રહી છે, ત્યારે હવે નવી સરકાર પર વિરોધપક્ષી રણનીતિને ધ્વસ્ત કરવાનો મોટો પડકાર મોં ફાડીને ઊભો છે
સંભવિત ત્રીજી લહેરનો પડકાર
કોરોનાની બીજી લહેર દરમિયાન સરકારની કામગીરી સામે ઘણા સવાલો પેદા થયા હતા, કોરોનાનો સામનો કરવામાં ઘણી બધી ભૂલો રહી ગઈ હતી, એક તબક્કે તો રાજ્યમાં અંધાધૂધી અને અરાજકતા જેવો માહોલ સર્જાયો હતો, લોકો ભાજપના નેતાઓ સામે ખુલ્લેઆમ રોષ ઠાલવી રહ્યા હતા, સરકાર કંઈ જ કરી રહી નથી તેવી છાપ ઊભી થઈ હતી, સરકારે જેટલા પ્રયાસ કર્યા તેનો લાભ એનકેશ કરવામા ભાજપને સફળતા મળી નહોતી, ત્યારે હવે નવી સરકાર સામે કોરોનાની ત્રીજી સંભવિત લહેરમાં બીજી લહેર જેવી અંધાધૂંધી ન સર્જાય તેનો પડકાર મોં ફાડીને ઊભો છે
આંતરિક મતભેદનો પડકાર
વિજય રૂપાણીએ બધા ધારાસભ્યોનો સાથે રાખીને ચાલવાનો પ્રયાસ કર્યો હતો પરંતુ તેમ છતાં તેમાં બહુ સફળતા મળી નહોતી, સમયાંતરે કેટલાક ધારાભ્યોની નારાજગી સામે આવતી રહેતી હતી, વાઘોડિયાના ધારાસભ્ય મધુ શ્રી વાસ્તવ હોય કે, ભાવનગરના પુરષોતમ રૂપાલા હોય કે, પછી સાવલીના કેતન ઈનામદાર હોય આ બધા ધારાસભ્યો પોતાના કામ નહીં થતાં હોવાની ફરિયાદ કરી ચૂક્યા હતા, એટલું જ નહીં સરકારમાં અધિકારીરાજનો આક્ષેપ કરી ચૂક્યા હતા ત્યારે હવે નવી સરકાર સામે આંતરિક મતભેદ અને અધિકારીરાજના આક્ષેપો ઊભા ન થાય તેવી સ્થિતિનું નિર્માણ કરવાનો પડકાર ઊભો છે
સરકારી ભરતીના વાયદાનો પડકાર
રાજ્યમાં સરકારે બજેટમાં બે લાખ યુવાનોને રોજગારીનો વાયદો કર્યો હતો પરંતુ કોઈને કોઈ કારણસર ભરતીપ્રકિયા પૂર્ણ થઈ શકી નથી, જ્યાં ભરતી પ્રક્રિયા થઈ છે ત્યાં નિમણૂકો આપવાની હજુ બાકી છે આ બાબતોને લઈને યુવાનોમા સરકાર સામે ભારે રોષ જોવા મળી રહ્યો છે, ત્યારે નવી સરકાર સામે બેરોજગાર યુવાનોના ગુસ્સાને ખાળવાનો પડકાર મોં ફાડીને ઊભો છે
સરકારી કર્મચારીની માંગોનો પડકાર
રાજ્યમાં સરકારી કર્મચારીઓમાં અસંતોષ તો દરેક સરકાર વખતે જોવા મળ્યો છે, પરંતુ ભાજપની રૂપાણી સરકાર સામે સરકારી કર્મચારીઓનો રોષ વધારે જોવા મળ્યો હતો, સરકારી કર્મચારીઓના વિવિધ સંઘો, મહાસંઘો અને મહામંડળો અવારનવાર હડતાલનું શસ્ત્ર ઉગામી ચૂક્યા છે, અને છેલ્લા બે વર્ષથી આરોગ્યખાતાના કર્મચારીઓનો અસંતોષ વધારે ઉગ્ર બની રહ્યો છે ત્યારે નવી સરકાર સામે સરકારી કર્મચારીઓનો રોષ શમાવવાનો પડકાર ઝળુંબી રહ્યો છે
નવા મંત્રીઑને વહીવટી આંટી ઘૂંટી નડશે
નવનિયુક્ત સીએમ ભૂપેન્દ્ર પટેલ અને તેમનું આખું મંત્રીમંડળ તદ્દન નવું છે, જેમાંના ઘણા મંત્રીઓ ખૂબ ઓછું ભણેલા છે, મોટાભાગના મંત્રીઓ વહીવટી પ્રકિયાથી અજાણ છે, એમ કહી શકાય કે મોટાભાગના મંત્રીઓ સરકાર ચલાવવા માટે બિનઅનુભવી છે ત્યારે ભાજપ સામે નવા મંત્રીઓને વિકાયકાર્યો માટે સજ્જ કરવાનો પડકાર રહેલો છે, કેમ કે ભાજપે પોતાની સમૂળગી છાપ સુધારવા માટે નવા નેતાઓને મંત્રીપદ આપ્યુ છે અને વિધાનસભાની ચૂંટણી આડે હવે વધારે સમય બાકી રહ્યો નથી ત્યારે ટૂંકા ગાળમાં નવા મંત્રીઓને વહીવટી આટાપાટાથી અભિમુખ કરવાનો અને તેમના માધ્યમથી રાજ્યની વિકાસયાત્રાને આગળ ધપાવવાનો મોટો પડકાર મોં ફાડીને ઊભો છે.