મેન્યુફેકચરે ચૂનો લગાવ્યો! / રાજકોટમાં એક-બે નહીં 16 કિલો સોનાનું બોબીએ માર્યું બૂચ, સોની બજાર થઇ દોડતી, બાદમાં થયો મોટો પર્દાફાશ

• રાજકોટમાં મેન્યુફેકચર જ કરોડોનો ચૂનો લગાવ્યો
• 7 કરોડનું 2 ડઝન જેટલા જ્વેલર્સનું 16 કિલો સોનું ગયું
• લેણુ ચડી જતા બોબીએ સોનું ફાઈનાન્સરોને આપી દીધું હોવાની ચર્ચા

રાજકોટમાં પ્રખ્યાત સોની બજારમાં બંગાળી કારીગરો દ્વારા સોનું લઇને ભાગી ગયાનો કિસ્સો સામે આવ્યો હતો. ત્યારે હવે વધુ એક ઘટના અહીં સામે આવી છે. રાજકોટની સોની બજારમાં મેન્યુફેકચરનું કામ કરતા બોબી નામના શખ્સ 7 કરોડનું 16 કિલો જેટલું સોનું લઇને ગાયબ થઇ ગયો છે. 

લેણુ ચડી જતા બોબીએ સોનું ફાઈનાન્સરોને આપી દીધું હોવાની ચર્ચા

મળતી માહિતી અનુસાર, બોબી પર ફાઈનાન્સરોનું લેણું ચડી ગયું હોવાનું પ્રાથમિક તારણ સામે આવે છે. લેણું થઇ જતા તેણે એક માસ્ટર પ્લાન બનાવ્યો હતો સોની બજારમાંથી અનેક જ્વેલર્સનું કરોડો રૂપિયાનું સોનું લઇને ફરાર થઇ ગયો છે. જોકે હાલ એવી ચર્ચા છે કે બોબી રાજકોટમાં જ છે અને તેમણે સોનું પરત આપવાનો ઇન્કાર કર્યો છે. તેને આ બધું સોનું ફાઇનાન્સરોને આપી દીધું હોવાનું કહેવાય છે. બોબીએ જ્વેલર્સનું સોનું પરત ન આપતા સોની બજારના વેપારીઓ ક્રાઈમ બ્રાન્ચની ઓફિસે પહોંચ્યા હતા. જોકે પોલીસે આ મામલે ફરિયાદ નોંધ્યા વગર તપાસ હાથ ધરી છે. 

2 ડઝન જેટલા જ્વેલર્સનું 16 કિલો સોનું ગયું

સોની બજારના વિવિધ બે ડઝન જેટલા જ્વેલર્સનું 16 કિલો સોનું ગયું છે. તેમાં બે મોટા જવેલર્સ છે જેમનું લગભગ સાડા આઠ કિલો જેટલું સોનું છે. બાકીના બેનું કિલો-સવા કિલો સોનું ગયું છે અને અન્ય નાના વેપારીઓનું દરેકનું ચારસોથી આઠસો ગ્રામ સોનું લઈને બોબીએ પરત નથી આપ્યું. જે જ્વેલર્સનું સોનું ગયું છે તેમાં જૈન ચેઈન, આર.પી.ઓનર્મિેન્ટસ, શુભ જવેલર્સ, શિલ્પા જવેલર્સ વગેરેનો સમાવેશ થાય છે.