શહેરના સાઉથ બોપલ વિસ્તારમાં આવેલા એક બિલ્ડિંગના પાર્કિંગમાં સાત દિવસ પહેલા મળી આવેલા ૧૯ વર્ષના યુવકની લાશનો ભેદ પોસ્ટમોર્ટમ રિપોર્ટે ખોલી દેતાં પોલીસે હત્યાનો ગુનો દાખલ કર્યો છે. યુવકનું મોત ગૂંગળામણથી નહીં પરંતુ તેનું ગળું દબાવીને હત્યા કરવામાં આવી હોવાનો ઘટસ્ફોટ થયો છે. યુવકની રહસ્યમય હત્યા કેસમાં બોપલ પોલીસે શંકાના આધારે બે યુવકો વિરુદ્ધમાં હત્યાનો ગુનો દાખલ કર્યો છે.
ઓર્ચિડ સેન્ટરના પાર્કિંગમાં કારમાંથી ૧૯ વર્ષીય ભાવેશ રબારીની લાશ મળી હતી
પરિવારજનોની ફરિયાદના આધારે પોલીસે બે યુવકોની પૂછપરછ હાથ ધરી હતી
સીસીટીવી ફૂટેજમાં કારમાંથી કોઈ વ્યક્તિ જતી કે આવતી નહીં દેખાતા પોલીસ મૂંઝવણમાં
મહેસાણા જિલ્લાના ગુંજા ગામમાં રહેતા લાલાભાઇ રબારીએ બોપલ પોલીસ સ્ટેશનમાં વિષ્ણુ અમરતભાઇ રબારી (રહે, થલતેજ ઔડાનાં મકાન) અને જિગર ભુરાભાઇ રબારી (રહે ચાંદલોડિયા) વિરુદ્ધમાં શંકાના આધારે હત્યાની ફરિયાદ કરી છે. વેજલપુર ઔડાનાં મકાનમાં રહેતા ૧૯ વર્ષના ભાવેશ રબારીની સાઉથ બોપલમાં આવેલા ઓર્ચિડ સેન્ટરમાં ૩૧ જાન્યુઆરીના રોજ વહેલી સવારે કારમાંથી લાશ મળી આવી હતી.
રિપોર્ટમાં તેનું મોત ગળું દબાવવાથી થયું હોય તેવું સામે આવ્યું
ઓર્ચિડ સેન્ટરમાં નોકરી કરતા સિક્યોરિટી ગાર્ડે કારમાં ભાવેશની લાશ જોઇને પોલીસને જાણ કરી હતી. બોપલ પોલીસને ઘટનાની જાણ થતાં તે તાત્કાલિક ઘટના સ્થળે પહોંચી ગઈ હતી અને તપાસ શરૂ કરી હતી. પોલીસની પ્રાથમિક તપાસમાં સામે આવ્યું છે કે ભાવેશનું મોત ગૂંગળામણથી થયું હતું. જોકે પોસ્ટમોર્ટમ રિપોર્ટમાં તેનું મોત ગળું દબાવવાથી થયું હોય તેવું સામે આવ્યું છે.
૩૧ જાન્યુઆરીએ ભાવેશની લાશ મળી હતી
ઉલ્લેખનીય છેકે ભાવેશની લાશ જોનાર સિક્યોરિટી ગાર્ડે પોલીસને જણાવ્યું હતું કે ભાવેશ કાર લઇને આવ્યો હતો. કાર ચાલુ રાખીને મોડી રાત્રે સુઇ ગયો હતો. ૧૯ વર્ષિય ભાવેશ તેના સંબંધીની કાર ઓલા કેબમાં ચલાવે છે. ભાવેશ કાર લઇને મોડી રાત્રે કામ કરવા માટે નીકળતો હતો. ૩૧ જાન્યુઆરીએ ભાવેશની લાશ મળી હતી. જેમાં તેના નાકમાંથી લોહી નીકળતું હતું. જેથી પોલીસને શંકા હતી કે ભાવેશનું મોત ગૂંગળામણ કે પછી કોઇ જાનવર કરડવાથી થયું હોઇ શકે છે. ભાવેશનાં મોતની જાણ પરિવારજનોને થતાં તેમણે વિષ્ણુ રબારી અને જિગર રબારીએ હત્યા કરી હોવાની શંકા પોલીસને વ્યકત કરી હતી.
જિગર અને વિષ્ણુ રબારી વિરુદ્ધમાં હત્યાનો ગુનો દાખલ
જોકે હત્યા થયા હોવાના કોઇ પુરાવા પોલીસને નહીં મળતાં તેમની માત્ર પૂછપરછ કરી હતી. ભાવેશનાં મોતને લઇને પરિવાજનોએ પેનલ ડોક્ટરથી પોસ્ટમોર્ટમ કરવાની માગ કરી હતી. પેનલ ડોક્ટરે પોસ્ટમોર્ટમ કરતાં ચોંકાવનારો ખુલાસો થયો હતો કે ભાવેશનું મોત ગળું દબાવવાથી થયું છે. પરિવારજનોની શંકા સાચી પડતાં તેમણે ગઇ કાલે જિગર અને વિષ્ણુ રબારી વિરુદ્ધમાં હત્યાનો ગુનો દાખલ કર્યો છે. ફરિયાદમાં ભલે વિષ્ણુ અને જિગરનું નામ આરોપી તરીકે હોય પરંતુ પોલીસે બંનેની શંકાના આધારે પૂછપરછ શરૂ કરી છે. રૂપિયાની લેતી દેતી મામલે વિષ્ણુ અને જિગરની ભાવેશ સાથે છ મહિના પહેલાં માથાકૂટ થઇ હતી. પરિવારજનોએ આ બબાલના આધારે શંકા કરી છે કે તેની હત્યા આ બે યુવકોએ કરી હોઇ શકે છે.
ભાવેશનું મોત ગળું દબાવવાથી થયું હોવાનો પોસ્ટમોર્ટમમાં થયો ખુલાસો
બોપલ પોલીસ સ્ટેશનના પોલીસ સબ ઇન્સ્પેક્ટર એ.એન.નીનામાએ જણાવ્યું છે કે પોસ્ટમોર્ટમ રિપોર્ટમાં ભાવેશનું મોત ગળું દબાવવાથી થયું હોવાનું આવે છે. જેના આધારે બે શકદાર વિરુદ્ધમાં હત્યાનો ગુનો દાખલ કર્યો છે. જોકે ચોંકાવનારી વાત એ છે કે ભાવેશનું મોત થયું તે દિવસે અને તેના બીજા દિવસના સીસીટીવી ફૂટેજ ચેક કર્યા છે. જેમાં કોઇએ હત્યા કરી હોવાના પુરાવા મળ્યા નથી. ઓર્ચિડ સેન્ટરના સીસીટીવી ફૂટેજ ચેક કર્યા છે. જેમાં ભાવેશ કાર લઇને આવે છે તે ફૂટેજ મળી આવ્યા છે. જ્યારે બીજા દિવસના પણ સીસીટીવી ફૂટેજ ચેક કર્યા છે. ભાવેશનું મોત ગળું દબાવવાથી થયું છે પરંતુ કારમાંથી કોઇ આરોપી ઊતરતા હોય તેવાે એક પણ વીડિયો મળી આવ્યાે નથી. જેથી તેનું મોત એક રહસ્યમય છે.