આજે મણિપુર વિધાનસભા ચૂંટણીના પ્રથમ તબક્કામાં ઇમ્ફાલ પૂર્વ, ઇમ્ફાલ પશ્ચિમ, બિષ્ણુપુર, ચુરાચંદપુર અને કાંગપોકપી સહિત પાંચ જિલ્લાઓમાં ફેલાયેલ 38 બેઠકો પર મતદાન યોજાશે. જેમાં પ્રથમ તબક્કામાં 15 મહિલાઓ સહિત કુલ 173 ઉમેદવારો મેદાનમાં છે.
આજે મણિપુર વિધાનસભા ચૂંટણીના પ્રથમ તબક્કાનું મતદાન
પાંચ જિલ્લાઓમાં ફેલાયેલ 38 બેઠકો પર થશે મતદાન
પ્રથમ તબક્કામાં 15 મહિલાઓ સહિત કુલ 173 ઉમેદવારો મેદાનમાં
મણિપુરના મુખ્ય ચૂંટણી અધિકારી રાજેશ અગ્રવાલના જણાવ્યા અનુસાર, કુલ ઉમેદવારોમાંથી 39નો ગુનાહિત ઈતિહાસ છે. ભારતીય જનતા પાર્ટીએ તમામ 38 બેઠકો પર પોતાના ઉમેદવારો ઉભા રાખ્યા છે. કોંગ્રેસ 35 સીટો પર ચૂંટણી લડી રહી છે જ્યારે જનતા દળ (યુનાઈટેડ) 28 સીટો પર પોતાના ઉમેદવારો ઉભા રાખ્યા છે.
મણિપુરના મુખ્ય ચૂંટણી અધિકારી રાજેશ અગ્રવાલના જણાવ્યા અનુસાર, કુલ 12,09,439 મતદારો છે જેમાંથી 5,80,607 પુરૂષ, 6,28,657 મહિલા અને 175 ટ્રાન્સજેન્ડર મતદારો છે, જેઓ 1,721 મતદાન મથકો પર તેમના મતાધિકારનો ઉપયોગ કરશે. મતદાન સવારે 7 વાગ્યાથી શરૂ થશે અને સાંજના 4 વાગ્યા સુધી ચાલશે. જે મતદારો કોરોના પોઝિટિવ છે અથવા ક્વોરન્ટાઇનમાં છે તેઓને છેલ્લી કલાકમાં બપોરે 3 થી 4 વાગ્યાની વચ્ચે મતદાન કરવાની મંજૂરી આપવામાં આવશે.
નોંધનીય છે કે, 381 મતદાન મથકો સંપૂર્ણ રીતે મહિલા મતદાન કર્મચારીઓ દ્વારા સંચાલિત કરવામાં આવશે. જ્યારે સાઇકોટમાં એક મતદાન કેન્દ્ર સંપૂર્ણ રીતે વિકલાંગ મતદાન કર્મચારીઓ દ્વારા કરવામાં આવશે. ભારતના ચૂંટણી પંચ (ECI) એ ઓળખના પુરાવા તરીકે ફોટો મતદાતા કાપલી બંધ કરી દેવાઇ છે, આથી મતદારોએ આધાર કાર્ડ, મનરેગા જોબ કાર્ડ, પાસબુક સહિત પંચ દ્વારા મંજૂર કરાયેલ 12 ઓળખ દસ્તાવેજોમાંથી એકને રજૂ કરવું પડશે. શ્રમ મંત્રાલયની યોજના હેઠળ રજૂ કરાયેલ આરોગ્ય વીમા સ્માર્ટ કાર્ડ, ડ્રાઇવિંગ લાઇસન્સ, પાન કાર્ડ વગેરે, બેંક/પોસ્ટ ઓફિસ દ્વારા રજૂ કરાયેલા ફોટોગ્રાફ સાથે મણિપુરમાં ચૂંટણી પ્રચાર શનિવારે સમાપ્ત થઈ ગયો હતો.
5 માર્ચે થશે બીજા તબક્કાનું મતદાન
60 સભ્યોની મણિપુર વિધાનસભા માટે બે તબક્કામાં મતદાન થવાનું છે. જેમાં પ્રથમ તબક્કામાં 38 બેઠકો પર મતદાન થશે જ્યારે બીજા તબક્કામાં 22 બેઠકો પર મતદાન થશે. બીજા તબક્કાનું મતદાન 5 માર્ચે થશે. ભાજપે નેશનલ પીપુલ્સ પાર્ટી (NPP), નાગા પીપુલ્સ ફ્રન્ટ (NPF) અને લોક જનશક્તિ પાર્ટી (LJP) ના સમર્થન સાથે 2017 માં મણિપુરમાં સરકાર બનાવી. જો કે, આ વખતે ભાજપે એકલા જ ચૂંટણી લડવાનું નક્કી કર્યું છે અને તમામ 60 બેઠકો પર એકલી જ ચૂંટણી લડી રહી છે. બીજી તરફ કોંગ્રેસે છ રાજકીય પક્ષોનું જોડાણ કર્યું છે અને તેને મણિપુર પ્રોગ્રેસિવ સેક્યુલર એલાયન્સ (MPSA) નામ આપ્યું છે.