કેરળમાં રહેતા એક શખ્સે ઈ-કોમર્સ વેબસાઈટ પરથી આઈફોનનો ઓર્ડર કર્યો હતો. પરંતુ ડિલીવરી મળ્યાં બાદ આ શખ્સે જ્યારે પેકેટ ખોલ્યું તો હેરાન થઇ ગયો. કારણકે આ પેકેટમાંથી વાસણ ધોવાનો એક સાબુ અને પાંચ રૂપિયાનો સિક્કો નિકળ્યો. અત્યારે આ શખ્સની કહાની સોશિયલ મીડિયામાં વાયરલ થઇ રહી છે.
કેરળમાં એક શખ્સે ઈ-કોમર્સ વેબસાઈટ પરથી આઈફોનનો ઓર્ડર કર્યો
પેકેટમાંથી વાસણ ધોવાનો સાબુ અને પાંચ રૂપિયાનો સિક્કો નિકળ્યો
સાબુ અને સિક્કાની તસ્વીર સોશિયલ મીડિયામાં વાયરલ
એક શખ્સે આઈફોન મંગાવ્યો અને પાર્સલમાં બીજુ નિકળ્યું
કેરળના અલુવામાં રહેતા નુરૂલ અમીન એક NRI છે. તેમણે હાલમાં ઓનલાઇન Appleના iPhone 12 મોબાઈલનો ઓર્ડર આપ્યો હતો. નુરૂલ મુજબ, તેમણે Amazon પરથી આઈફોન મંગાવ્યો હતો. જેની કિંમત 70,900 રૂપિયા હતી.
પેકેટમાંથી સાબુ અને સિક્કો નિકળ્યો
અઠવાડિયા સુધી રાહ જોયા બાદ જ્યારે નુરૂલની પાસે પાર્સલ આવ્યું તો તે ઉત્સાહમાં આવી ગયો હતો. પરંતુ જ્યારે તેણે પાર્સલ ખોલ્યુ તો તે અવાચક થઇ ગયો. કારણકે 70,900 રૂપિયાના આઈફોનના બદલે પેકેટમાં વિમ બાર સાબુ અને 5 રૂપિયાનો સિક્કો નિકળ્યો.
સોશિયલ મીડિયામાં તસ્વીર વાયરલ
સોશિયલ મીડિયામાં વાયરલ થયેલી એક તસ્વીરમાં લીલા રંગનો વિમ ડિશવોશ સાબુ અને 5 રૂપિયાનો સિક્કો જોવા મળ્યો છે. નુરૂલે પોલીસમાં તેની ફરિયાદ નોંધાવી. ત્યારબાદ તેને તેના રૂપિયા મળી ગયા. ફરિયાદ મુજબ, નુરૂલે 12 ઓક્ટોબરે પોતાના એમેઝોન પે કાર્ડ દ્વારા આઈફોનનો ઓર્ડર આપ્યો હતો. સાયબર પોલીસે આ સંદર્ભે ફરિયાદ નોંધી તપાસ શરૂ કરી તો જાણવા મળ્યું કે નુરૂલને જે ફોન મળવાનો હતો તે સપ્ટેમ્બરથી ઝારખંડમાં કોઈ ઉપયોગ કરી રહ્યું હતુ. આ વાત IMEI નંબર જોયા બાદ ખબર પડી.