કેન્દ્રનાં ટ્રાફિકનાં નવા નિયમોનો ઘણી બધી જગ્યાએ વિરોધ થઈ રહ્યો છે. ત્યારે વડોદરાનાં એક યુવાને આ નિયમનો અનોખી રીતે વિરોધ કર્યો છે. વાહન ચાલકે પોતાનાં હેલ્મેટ પર લાયસન્સ, RC બુક, PUC અને ઈન્સ્યોરેન્સ પોલીસી લગાવી હતી. જેનો વીડિયો સોશિયલ મીડિયામાં વાયરલ થઈ રહ્યો છે. નવા નિયમની સામે પ્રશ્નો કરતો એક વીડિયો સોશિયલ મીડિયામાં વાયરલ થયો છે. પોલીસ વાહન ચલાવતા સમયે રોકે નહીં તેને લઈને યુવાને અનોખો પ્રયોગ કર્યો છે.
ઉલ્લેખનીય છે કે હવે કેન્દ્ર સરકાર ટ્રાફિકને લઇને નવા નિયમો લાવી છે. તાજેતરમાં મોદી સરકારે દેશની પ્રજાને ટ્રાફિકના નિયમો અંગે જનજાગૃતિ અને સભાનતા લાવવા નવો મોટર વિહિકલ એકટ લાગુ કર્યો છે. જેમાં કેટલીક કડક જોગવાઇઓ કરવામાં આવી છે. નવા મોટર વિહિકલ એકટ પાછળનો હેતુ અને ઉદેશ્ય ઘણા જ સારા અને ઉમદા છે
તેમજ તેની પાછળનો આખરી હેતુ ટ્રાફિકનાં નિયમોનો લોકો દ્વારા ચુસ્તપણે અમલ કરાવવાનો છે. ૧ સપ્ટેમ્બરથી અમલી બનેલ નવા મોટર વિહિકલ એકટનાં પગલે કેટલીક વિચિત્ર વિસંગતતાઓ પણ ઊભી થઇ છે.
તાજેતરમાં જ અમદાવાદમાં જે નવા ટ્રાફિક નિયમો જાહેર કરવામાં આવ્યાં તેને લઈને જ્યારે પોલીસ વાહન ચાલકોને દંડ ફટકારે છે તો અનેક નિયમો બતાવી દે છે. પરંતુ આ જ પોલીસવાળા જ્યારે કોઇ નિયમનું ઉલ્લંઘન કરે તો શું કહેવું અને કોને કહેવું તે એક પ્રશ્ન છે.
ત્યારે તાજેતરમાં જ ટ્રાફિકનાં નિયમોને લઈને સોશિયલ મીડિયામાં એક વીડિયો વાયરલ થઈ રહ્યો છે. જેમાં અમદાવાદમાં 10 જેટલાં પોલીસ કર્મીઓ હેલ્મેટ વિના બાઈક ચલાવી રહ્યાં છે. સરેઆમ ટ્રાફિકનાં નિયમોનું ઉલ્લંઘન કરનારા પોલીસને કોઈ કંઈ કહેતું નથી. શું તેમને કોઈ કાયદો લાગૂ પડતો નથી? સૂત્રોનાં જણાવ્યાં અનુસાર આ વીડિયો અમદાવાદનાં બાપુનગર વિસ્તારનો હોવાનું માનવામાં આવી રહ્યું છે.
હેલ્મેટ વિના બાઈક હંકારી રહેલા આ પોલીસ કર્મીઓને રાહદારીઓએ ખખડાવ્યા હતાં. આ તમામ હોમગાર્ડનાં જવાનો હોવાનું જણાઈ રહ્યું છે. ત્યારે બીજી બાજુ વડોદરામાં પણ આ નિયમનો અનોખી રીતે વિરોધ કરવા એક વાહનચાલકે પોતાનાં હેલ્મેટ પર જ લાયસન્સ, RC બુક, PUC અને ઈન્સ્યોરેન્સ પોલીસી લગાવી હતી. જેનો વીડિયો સોશિયલ મીડિયામાં વાયરલ થઈ રહ્યો છે.
મોટર વ્હીકલ એક્ટનાં કડક કાયદા
ઉલ્લેખનીય છે કે નવા મોટર વ્હીકલ એક્ટ-ર૦૧૯ને લોકસભામાં મંજૂરી મળ્યા બાદ હવે એ કાયદો બની ગયો છે. આ અંતર્ગત વાહનોનાં નિયમોમાં ભંગ બદલ વધુ કડક જોગવાઇ કરવામાં આવી છે. તે મુજબ એક્ટની સેકશન ૧૯૪-બી મુજબ ચાર વર્ષથી મોટા બાળક માટે પણ સિટબેલ્ટ ફરજિયાત થશે.
ઉપરાંત એમ્બ્યુલન્સને રસ્તો ન આપવો, વધુ સ્પીડે ગાડી ચલાવવી, ઓવરલોડ વાહન ચલાવવું, લાઈસન્સ વગર વાહન ચલાવવું, હેલ્મેટ ન પહેરવી સહિતના તમામ નિયમો ઉપર આકરા દંડની જોગવાઇ કરવામાં આવી છે.
જો કોઈ વાહન માલિકે થર્ડ પાર્ટી ઈન્સ્યોરન્સ નહીં કરાવ્યો હોય તો તેને દંડ સાથે જેલ પણ થઈ શકે છે. હવે નવા નિયમ મુજબ ઈન્સ્યોરન્સ વગર વાહન ચલાવનાર માટે દંડની રકમ બે ગણી થઈ છે. આ રકમ પહેલા ૧૦૦૦ હજાર હતી તે વધીને ૨૦૦૦ કરવામાં આવી છે.