ઉત્તરપ્રદેશમાં એક વિચિત્ર ઘટના પ્રકાશમાં આવી છે જેમાં સમોસાની દુકાન ઉપર એક ગ્રાહકને જાતે સમોસા તળવાની ઈચ્છા થઇ ગઈ. તેને જોઇને આસપાસના 4 લોકોને પણ સમોસા તળવાની ઈચ્છા થઇ ગઈ અને બંને પક્ષ વચ્ચે ઝગડો થતા 4 લોકોએ યુવકને મારી મારીને મોતને ઘાટ ઉતારી દીધો હતો.
ઉત્તરપ્રદેશના ગાઝીપુર જિલ્લામાં એક ચોંકાવનારી ઘટના સામે આવી છે. અહીં સંતોષ નામનો એક યુવક દારૂના નશાની હાલતમાં સમોસાની દુકાન પાસે પહોંચ્યો છે. તેને સમોસા ખાવાની ખુબ ઈચ્છા થઇ હતી પરંતુ તેણે દુકાનદાર સામે એક વિચિત્ર માંગણી મૂકી.
નશામાં સંતોષે દુકાનદારને કહ્યું કે તેણે સમોસા જાતે તેલમાં તળવા છે. ત્યારબાદ ચાર બીજા લોકો અહીં ભેગા થઈ ગયા. તેમણે પણ જાતે સમોસા તળવાની જીદ શરુ કરી. આ ચાર વ્યક્તિઓ પણ પીધેલા હોવાની શક્યતા છે. જોતજોતામાં ઝઘડો અને ત્યારબાદ મારપીટ શરુ થઈ ગઈ.
ચાર વ્યક્તિઓ સામે સંતોષ એકલો હતો. ચારે વ્યક્તિઓએ ભેગા થઇને તળવાના ઝારા, ઈંટ અને ડંડા વડે સંતોષની માર માર્યો. સંતોષને એટલો માર માર્યો કે સંતોષ મૃત્યુ પામ્યો.
મૃતક સંતોષના નાના ભાઈએ જણાવ્યું હતું કે તેમનો ભાઈ નાશમાં હતો અને ત્યારે આ મારામારી શરુ થઇ ગઈ હતી. પોલીસે આ ચારેય વ્યક્તિઓ સામે FIR દાખલ કરી છે.
ગાઝીપુરના SP અધિકારીના જણાવ્યા મુજબ નોનહરા પોલીસ સ્ટેશન વિસ્તારના બોરી પુલ પાસે ફરસાણની દુકાનમાં સમોસા બનાવવાની બાબતે ઝગડો શરુ થયો હતો. મૃતક સંતોષ અને તમામ આરોપીઓ બધા જ નશામાં હતા. બંને પક્ષો વચ્ચે મારપીટ બાદ ઘાયલ સંતોષને ગંભીર હાલતમાં હોસ્પિટલ ખસેડવામાં આવ્યો હતો જ્યાં રસ્તામાં તેનું મોટ નીપજ્યું હતું. આ ઘટનામાં બે આરોપીઓની ધરપકડ કરવામાં આવી છે જયારે 2 આરોપીઓ ફરાર છે.