આજ સમયમાં સામાન્ય રીતે વરરાજો ઇમ્પોર્ટેડ કારમાં પરણવા જતો હોય છે. પરંતુ રાણવાવમાં એક યુવાને ગાડમાં જાન જોડી અને જુનાજમાનાની યાદ તાજી કરી હતી. શણગારેલ ગાડા અને અશ્વ સાથે જાન નિકળતા રાણવાવામાં લોકો આ જાનને જોવા ઉમટી પડ્યા હતા.
આજના યુગમાં લોકો પોતાના લગ્ન પાછળ ખુબજ ખર્ચો કરતા હોય છે. આ ઉપરાંત દિવસેને દિવસે જૂની પરમ પરાઓ વિસરતી જાય છે. ત્યારે પોરબંદરના રાણવાવા તાલુકાના વાડી પ્લોટ વિસ્તારમાં રહેતા અને ખેતીકામ કરતા ચેતન પાણખણીયાના લગ્ન રાણવાવની જ સ્નેહા નામની યુવતિ સાથે નક્કી થયા હતા.
આ યુવાને કારમાં જાન લઈ જવાને બદલે ગાડામાં જાન જોડવાનુ આયોજન કર્યું. ચેતનના નિવાસ્થાને પાંચ જેટલા શણગારેલા ગાડા અને ચાર જેટલા અશ્વ સાથે બેન્ડવાજા અને ઢોલ શરણાઈ સાથે જાન નીકળી હતી. જાનડીઓ શણગારેલા ગાડામાં બેસી અને લગ્નગીત ગાયા હતા. તો વરરાજો શુશોભીત અશ્વ સાથેની બગીમાં સવાર થયો હતો. શણગારે ગાડા અને અશ્વ સાથેની જાન શહેરના રાજમાર્ગો ઉપરથી નિકળી હતી.
જાનને નિહાળવા લોકો ઉમટી પડ્યા હતા. બેન્ડવાજા અને ઢોલ શરણાઈના તાલ ઉપર જાનૈયાઓએ રાસની રમઝટ બોલાવી હતી. ચેતનના દાદાની ઈચ્છા હતી તેમના પૈાત્રની જાન જુની પરંપરા મુજબ ગાડામાં જોડવામાં આવે દાદાની ઈચ્છા મુજબ આજે ચેતને પોતાની જાન શણગારેલા ગાડા જોડી હતી. આ જાન જોઈ અને જુનાજમાનાના લગ્નની યાદ તાજી થઈ હતી.