SHORT & SIMPLE / લગ્ન પછી પતિને છોડીને પ્રેમિકા મારા સાથે રહેતી હતી, હવે મને કસ્ટડી આપો: અરજી કરનારા યુવકને ગુજરાત હાઇકોર્ટે ફટકાર્યો દંડ

• પરિણીત પ્રેમિકાની કસ્ટડીની માગ કરનારા અરજદારને દંડ
• બનાસકાંઠાના વ્યક્તિએ હાઈકોર્ટમાં કરી હતી અરજી
• પરિણીતાના લગ્ન મરજી વિરુદ્ધ અન્ય સાથે કરી દેવાયા હતાઃ અરજદાર

અમદાવાદમાં એક પરણીત મહિલાના પ્રેમમાં પડેલા અને તેને તેના પતિ પાસેથી મુક્ત કરાવીને પામવાની જીદે ચઢેલા બનાસકાંઠાના વ્યક્તિએ ગુજરાત હાઈકોર્ટમાં અરજી કરી હતી. જોકે, લિવ-ઈન રિલેશનશિપના કરારના આધારે પ્રેમિકાને પામવા માટે પહોંચેલા અરજદારને હાઈકોર્ટે રૂ.5000નો દંડ ફટકાર્યો છે.

ચુકાદો પતિના પક્ષમાં સંભળાવ્યો છેઃ ખંડપીઠ
આ કેસની સુનાવણી દરમિયાન ન્યાયાધીશ વી.એમ પંચોલી અને ન્યાયાધીશ એચ.એમ પ્રચ્છાકની બેન્ચે જણાવ્યું હતું કે, અરજદારના મહિલા સાથે હજુ સુધી લગ્ન પણ નથી થયા અને મહિલાના તેના પતિ સાથે છૂટાછેડા પણ થયા નથી. આ કેસમાં કોર્ટે ચુકાદો પતિના પક્ષમાં સંભળાવ્યો છે અને અરજદારને રાજ્ય કાનૂની સેવા સત્તામંડળમાં 5000 રૂપિયાનો દંડ ભરવાનો આદેશ આપ્યો છે.

અયોગ્ય ઠેરવવામાં આવી છે અરજીઃ ખંડપીઠે
ખંડપીઠે જણાવ્યું કે, લિવ-ઈન રિલેશનશિપના કરારના પાયા પર અરજી કરવામાં આવી હતી તેને અયોગ્ય ઠેરવવામાં આવી છે. કથિત એગ્રિમેન્ટના આધારે અરજી દાખલ કરવાનો અધિકાર નથી.

પરણેલી મહિલાને પામવા HCમાં કરી હતી અરજી
વાસ્તવમાં બનાસકાંઠા જિલ્લાના એક વ્યક્તિએ પોતાની સાથે રિલેશનશિપમાં રહેલી પરણેલી મહિલાને પામવા માટે હાઈકોર્ટના દ્વાર ખખડાવ્યા હતા. અરજદારે રિલેશનમાં રહેલી પરિણીતાની કસ્ટડીની માગ સાથે અરજી કરી હતી. જેમાં અરજદારે જણાવ્યું હતું કે, પરિણીતાના લગ્ન મરજી વિરુદ્ધ અન્ય સાથે કરી દેવાયા હતા. લગ્ન બાદ પરિણીતા મારી સાથે રહેતી હતી જેથી કસ્ટડી મળવી જોઈએ. પરિણીતા સાથે લિવ ઈન એગ્રીમેન્ટને આધાર બનાવી અરજી કરાઈ હતી.