પાક નિષ્ફળ / માણસ, પશુ બાદ પાકમાં રોગ! મગફળીમાં ફેલાયો 'મુંડા' રોગ, પાકનો બોલાવી દે છે સોથ, અમરેલીમાં ખેડૂતો હેરાન

• અમરેલીના ખેડૂતોનો મગફળીનો પાક નિષ્ફળ 
• મુંડા નામના રોગથી મગફળીના પાકને નુકસાન
• બાબરા,બગસરા સહિત ખાંભા પંથકમાં અસર 

અમરેલી પંથકમાં મગફળીના પાકમાં મુંડાએ મોકાણ સર્જતા ધરતીપુત્રોને માથે ઓઢીને રોવાના વારો આવ્યો છે. અમરેલી જિલ્લાના બાબરા, બગસરા, ખાંભા અને સાવરકુંડલાના અમુક ગામડાઓમાં મગફળીમાં મુંડા નામનો રોગ આવતા પાક સુકાઈ રહ્યો છે. આથી ખેડૂતોના પરસેવાની કમાણી મુંડામાં સમાણી હોય તેવો ઘાટ ઘડાયો છે એટલું જ નહિ અનેક ખેડૂતોના ખેતરો મુંડાએ સાફ કરી દેતા ખેડૂતોને પાકનો સફાયો કરવાની નોબત આવી છે.  જેને લઇને ખેડૂતોની એક સાંધે ત્યા તેર તૂટે તેવી હાલાત થઇ છે.

ખેડૂતોના માહામૂલી ખર્ચા પર ફરી વળ્યું પાણી
ખેડૂતને જગતનો તાત કહેવાય છે પણ ખેડૂતો પરથી ઉપાધિના વાદળો ક્યારેય હટતા નથી. અમરેલી જિલ્લાના તાલુકા મથકો પર મગફળીનું મબલખ વાવેતર કર્યા બાદ મુંડા નામનો રોગ મગફળીમાં આવતા મગફળીના છોડ સાવ પીળા પડી જાય છે. મુંડા નામની જીવાત મગફળીના ઉભા પાકનો સોથ બોલાવી દે છે ત્યારે બગસરા પંથકમાં ખેડૂતોએ મગફળીના પાકને કાઢવાની નોબત આવી ને ઉભી રહી છે. 

મુંડાની મોકાણથી મગફળીના પાક પર રોટાવેટર ફેરવવા મજબૂર ખેડૂત
બગસરા પંથક સાથે પાંચાળ પંથક ગણાતા બાબરામાં મુંડાએ ખેડૂતોને મગફળીના ઉભા પાક પર રોટાવેટર ફેરવવા મજબૂર કરી દીધા હતા. જેથી લીલાછમ પાકને ના છૂટકે નાશ કરવો પડી રહ્યો છે.  મોંઘું બિયારણ અને ખાતરને ઉપરથી મોંઘી ડાટ રાસાયણિક દવાઓ નાખવા છતાં મગફળીમાં મુંડા નામની જીવાત કેડો છોડતી નથી. આથી ધરતીપુત્રો જીવથી પણ વ્હાલા પાકનો સફાયો કરવા મજબૂર બન્યા છે. બાબરાના મોટા ભાગના વિસ્તારોમાં ખેડૂતો પોતાની મગફળી કાઢી રહ્યા છે ચોમાસાની સારી એવી સીઝન હોવા છતાં ખુલ્લા પડેલા મેદાન જેમ ખેતરો ભાંસી રહયા છે. મુંડા નામના મગફળીમાં રોગે હાહાકાર મચાવ્યો છે અને મગફળીનાં છોડને બાળી રહ્યો છે. મુંડા નામનો રોગ આવતા મગફળીનો છોડ સુકાવા લાગે છે અને છોડ વિકાસ ન થતા ખેડૂતો પોતાની મગફળી ખેતરો માંથી કાઢી રહ્યા છે મોંઘી દાટ દવાઓનો છટકાવ કરવા છતાં પણ મગફળીમાંથી મુંડા જતા નથી ત્યારે ખાંભા ગીરના ગામડાઓમાં હાલત પણ બાબરા બગસરા જેવી જ થઈ છે.