આણંદ / સિસ્વા ગામે વાડીમાં ફસાયેલી બાળકી અને તેના પરિવારને બહાર લાવનાર મામલતદારે VTV સાથે કરી ખાસ વાતચીત

• બોરસદના સિસ્વા ગામમાં ભારે વરસાદ બાદ ચાલ્યુ હતુ રેસ્ક્યુ ઓપરેશન
• મામલતદાર આરતી ગોસ્વામીએ બાળકીનું સુરક્ષીત સ્થળાંતર કર્યુ હતું
• બાળકીને બાથમાં લઈ મુશ્કેલીની વચ્ચે સુરક્ષીત ઉગારી

આણંદ જિલ્લાના બોરસદ પંથકમાં ભારે વરસાદ ખાબક્યો હતો. આ દરમિયાન અનેક ગામોમાં પાણી ભરાયા હતા. જેને પગલે સિસ્વા ગામમાં પણ નીચાણવારા વિસ્તારોમાં વરસાદી પાણી ઘૂસ્યા હતા. આથી સિસ્વા ગામની પટેલ વાડીમાં રહેતા લોકોનું સ્થળાંતરણ કરવાની નોબત આવી હતી. જેમાં મામલતદારની મમતાના દર્શન થયા હતા. મામલતદાર આરતી ગોસ્વામીએ બાળકીને ગોદમાં ઊચકીને સુરક્ષિત સ્થળે પહોંચાડી હતી. મામલતદારની આ સરાહનિય કામગીરીના સમગ્ર પંથકમાં મુક્તમને વખાણ થઇ રહ્યા  છે ત્યારે આ મામલે મામલતદારે VTV NEWS પર પૂર બાદની સ્થિતિનો ચીતાર આપ્યો હતો. હાલ દવા છંટકાવ અને પશુ મૃતદેહને ખસેડવા સહિતની કામગીરી જોરશોરથી ચાલતી હોવાનું જણાવ્યુ હતું. 

380 લોકોનું કરાયું હતું સ્થળાંતર
બોરસદ પંથકમાં વરસાદને પગલે 380 લોકો પ્રભાવિત થતા તેમને સલામત સ્થળે સ્થળાંતર કરાવવામાં આવ્યું હતું આ સાથે વરસાદી પાણીથી લોકોની ઘરવખરી સાથે પશુ ધનને પણ વ્યાપક નુકસાન થયું હતું. સર્વત્ર જળબંબાકાર સર્જાતા ખેડૂતોના ખેતરો પણ પાણીમાં ગરકાવ થયા હતા જેને લઈ ખેતી પાકો નષ્ટ થવા પામ્યા છે. જોકે 24 કલાક બાદ વરસાદી પાણી ધીરે ધીરે ઓસરતા લોકોએ રાહતનો શ્વાસ લીધો હતો. જેમાં વરસાદ બાદ બચાવ કામગીરીમાં તંત્ર ખડેપગે કામે લાગ્યું હતું.

લોકોનો રોષ અને વખાણ બંને સ્વીકારવા જ પડે: આરતી ગોસ્વામી 
વધુમાં મામલતદાર આરતી ગોસ્વામીએઉમેર્યું હતું કે, હજુ ચોમાસાનો પ્રારંભ જ થયો છે ત્યારે પૂરની આ સ્થિતિમાંથી શીખ લઇને પાણી ભરાઈ તેવી ભૌગોલીક સ્થિતિ ધરાવતા વિસ્તારોમાં આગમચેતીના ભાગરુપે મોબાઈલ ટોઇલેટ મૂકવા સહિતના પગલાં લેવાયા છે. વધુમાં મામલતદાર આરતી ગોસ્વામીએ અન્ય કર્મચારીઓ, અધિકારીઓને સંદેશ આપતા જણાવ્યુ કે જાહેર સેવાક તરીકે જ્યારે તમને ફરજ સોંપવામાં આવે છે ત્યારે પ્રજાના કામ તો કરવાના જ હોય છે. સાથે સાથે જ્યારે લોકોને સેવામાં વહીવટી તંત્ર દ્વારા કોઇ ખામી રહે તો લોકો આક્રોશ પર કરવાના છે અને જો કાબિલેદાદ કામગીરી હોય તો લોકો પ્રસંશા પણ કરવાના છે. આથી ઓફિસર તરીકે લોકોનો રોષ અને વખાણ બંને સ્વીકારવા જ પડે અને તે મુજબ યશસ્વી કામગીરી બજાવવી જોઈએ. તેમ અંતમાં આરતી ગોસ્વામીએ ઉમેર્યું હતું.