ગોડાદરા વિસ્તારમાં ઘર આગળ રમી રહેલી ભાણીનું તેના જ મામાની ગાડી નીચે કચડાઈ જતાં કમકમાટીભર્યું મોત થયું
સુરતમાં મામાની કાર નીચે સગી ભાણીનું મોત
સુરતના ગોડાદરા ગણેશનગરની ઘટના
મામાને કારમાં જોઈને સામે દોડી આવેલી ભાણીનું મોત
ગાડી નીચે આવતા ભાણી પ્રાંજલનું થયું મોત
સુરતથી એક ચોંકાવનારા અને દુ:ખદ સમાચાર સામે આવ્યા છે. વાત જાણે એમ છે કે, મામાની કાર નીચે કચડાઈ જતાં ભાણીનું મોત થયું છે. આ સમગ્ર ઘટનાના સીસીટીવી પણ સામે આવ્યા છે. સુરતના ગોડાદરા વિસ્તારમાં ઘર આગળ રમી રહેલી ભાણીનું તેના જ મામાની ગાડી નીચે કચડાઈ જતાં કમકમાટીભર્યું મોત થયું છે. વિડીયોમાં જોઈ શકાય છે કે, ઘર આગળ રમી રહેલી ભાણી ઉપર ઘરના વળાંક આગળ મામાની ગાડી ફરી વળતાં કરુણ મોત થયું છે.
સુરતના ગોડાદરા ગણેશનગરની ઘટનાથી અનેક લોકોએ ચેતવા જેવુ છે. પાંચ મિનિટ પહેલા ઘર આગળ રમી રહેલી બાળકીનું પળભરમાં મોત થતાં પરિવારજનો શોકમગ્ન બની ગયા છે. ઘટનાની વિગત એવી છે કે, ઘરના આંગણામાં રમી રહેલી ભાણી પ્રાંજલ પોતાના મામાને જોઈને તેમની બાજુ ગઈ હતી. જોકે ઇકો સ્પોર્ટ કાર લઈને આવતા મામાને આ વાત ધ્યાન બહાર ગઈ હતી. આજે અજાણતા જ તેમની ગાડી ભાણી પ્રાંજલ ઉપર ફરી વળતાં કરુણ મોત થયું હતું.
કેવી રીતે બની ઘટના?
સુરતની ઘટનાના સીસીટીવીમાં જોઈ શકાય છે કે, ભાણી પ્રાંજલ બીજા અને નાના બાળકો સાથે ઘરના આંગણામાં રમી રહી છે. આ દરમ્યાન સામેની બાજુ વળાંકમાં તે ઊભી હતી ત્યારે તે મામાની કારને જુએ છે, જેથી તે સામેની જાય છે. જોકે મામાને આ વાતની કોઈ જાણકારી ન હોઇ તેમની ઇકો સ્પોર્ટ કારનું જમણું ટાયર ભાણી પ્રાંજલના શરીર અને માથાના ભાગે ફરી વળતાં તેનું કરૂણ મોત થઈ જાય છે.
પોલીસે ગુનો નોંધી વધુ તપાસ હાથ ધરી
સુરતના ગોડાદરા ગણેશનગરની ઘટનાના ચોંકાવનારા સીસીટીવી સામે આવ્યા છે. જોકે સીસીટીવીમાં જોઈ શકાય છે કે, કેવી રીતે ઘર આગળ રમતી ભાણીએ પળવારમાં જ જીવ ગુમાવવાનો વારો આવ્યો હતો. આ તરફ હવે સમગ્ર મામલે ગોડાદરા પોલીસે ગુનો નોંધી વધુ તપાસ હાથ ધરી છે.