સ્પોર્ટ્સ / MIને મોટો ઝટકોઃ મલિંગા IPLમાંથી બહાર, જેમ્સ પેટિન્સન ટીમમાં સામેલ

• મલિંગા IPLની બહાર 
• મલિંગા ન ગયો દુબઇ
• IPL2020ની અપડેટ્સ 

મલિંગાના જવાથી મુંબઈ ઇન્ડિયન્સને મોટો ઝટકો તો લાગ્યો જ છે, પરંતુ ફ્રેંચાઇઝીએ ઓસ્ટ્રેલિયાના પ્રતિભાશાળી ફાસ્ટ બોલર જેમ્સ પેટિન્સનને ટીમમાં સામેલ કર્યો છે. મુંબઈ ઇન્ડિયન્સના માલિક આકાશ અંબાણીએ કહ્યું, ''જેમ્સ પેટિન્સન અમારા માટે યોગ્ય ખેલાડી રહેશે. તે અમારા ફાસ્ટ બોલિંગ આક્રમણને વધુ મજબૂત કરશે. લસિથ મલિંગા મુંબઈ ઇન્ડિયન્સની તાકાત છે. એમાં કોઈ શંકા નથી કે મલિંગની ઊણપ મુંબઈ ઇન્ડિયન્સને સાલશે.''

ઉલ્લેખનીય છે કે મલિંગાનો આઇપીએલમાં રેકોર્ડ દમદાર છે. મલિંગા આઇપીએલમાં સૌથી વધુ વિકેટ ઝડપનારો બોલર છે. શ્રીલંકાના આ દિગ્ગજ ફાસ્ટબોલરે વર્ષ ૨૦૦૯માં આઇપીએલમાં ડેબ્યૂ કર્યું હતું. આઇપીએલમાં તેણે ૧૨૨ મેચમાં ૧૭૦ વિકેટ ઝડપી છે. તેનો ઈકોનોમી રેટ ૭.૧૪ છે. ૨૦૧૯માં મલિંગાએ અંતિમ ઓવરમાં મુંબઈ ઇન્ડિયન્સને એક રને રોમાંચક જીત અપાવી હતી. સીએસકે સામેની ફાઇનલમાં મુંબઈ ઇન્ડિયન્સને નવ રન બચાવવાના હતા અને મલિંગાએ છ બોલમાં માત્ર સાત રન જ આપ્યા હતા. આ જ કારણે મુંબઈ ઇન્ડિયન્સ ચોથી વાર ચેમ્પિયન બની  હતી.

મુંબઈની ટીમમાં સામેલ કરાયેલા જેમ્સ પેટિન્સનની વાત કરવામાં આવે તો તે બહુ જ ઝડપી બોલિંગ કરે છે. આ જમણેરી ફાસ્ટ બોલર ઘણી વાર ભારતના બેટ્સમેનોને પરેશાન કરી ચૂક્યો છે, જેમાં વિરાટ કોહલી પણ સામેલ છે.  પેટિન્સન માત્ર ૩૦ ટી-૨૦ મેચ રમ્યો છે, જેમાં તેણે ૪૭ શિકાર કર્યા છે. તેનો ઈકોનોમી રેટ ૮.૨૫ છે. પેટિન્સનની લાઇન-લેન્થ કમાલની છે, પરંતુ તેની સમસ્યા ફિટનેસને લઈ છે. પેટિન્સન કમરના દર્દને કારણે ઘણા સમય સુધી ઓસ્ટ્રેલિયન ટીમની બહાર રહ્યો હતો.