માલેગાવ બોમ્બ ધડાકામાં કથિત રીતે વિસ્ફોટક લગાવવા માટે ઉપયોગ કરાયેલ એલએમએલ ફ્રીડમ મોટરસાઇકલને સોમવારે ટ્રાયલ કોર્ટમાં પહેલીવાર લાવવામાં આવી. આ મોટરસાઇકલ પ્રજ્ઞા સિંહ ઠાકુરના નામે રજિસ્ટર્ડ છે.
લોકસભા ચૂંટણી 2019ના ભોપાલથી ચૂંટાયેલા સાંસદ પ્રજ્ઞા સિંહ હાલ બેલ પર બહાર છે. મોટર સાઇકલ બોમ્બ બ્લાસ્ટ વાળી જગ્યા પર ક્ષતિગ્રસ્ત અવસ્થામાં મળી હતી. આપને જણાવીએ કે 29 સપ્ટેમ્બર 2008ના રોજ થયેલા બોમ્બ બ્લાસ્ટમાં 6 લોકોના મોત થયા હતા. જ્યારે 100થી વધારે લોકો ઘાયલ થયા હતા.
સ્થળ પર તપાસ કરનાર સાક્ષીએ બે મોટરસાઇકલની ઓળખ કરી છે. તેમાંથી એક એલએમએલ છે જ્યારે બીજી હોન્ડા યૂનિકોન મોટરસાઇકલ છે. સાક્ષીને સોમવારે આ મોટરસાઇકલ ઉપરાંત પાંચ સાઇકલ પણ બતાવામાં આવી છે. સાક્ષી મુજબ, આ એ બાઇક અને સાઇકલ છે જે તેણે 2008માં ઘટનાસ્થળ પર જોઇ હતી.
આપને જણાવીએ કે, ટ્રાયલમાં પુરાવા તરીકે રજૂ કરવામાં આવેલ બે બાઇક અને પાંચ સાઇકલોને માલેગાવના ભીખૂ ચોક પાસેથી મેળવવામાં આવી હતી. તેમની તપાસ ફોરેન્સિક સાઇન્સ લેબોરેટ્રીએ કરી અને બાદમાં તેને મહારાષ્ટ્ર એન્ટી ટેરિરિઝમ સ્ક્વોડ (ATS) પાસ મોકલી દેવામાં આવી છે. આ પહેલા પણ મામલાની તપાસ એટીએસ કરી હતી. સોમવારે આ તમામ પુરાવાઓને ટેમ્પોમાં નાંખીને કોર્ટમાં લઇ જવામાં આવ્યા હતા.
કોર્ટે અભિયોજન અને બચાવ પક્ષના વકીલોને નિર્દેશ આપ્યો છે કે ગ્રાઉન્ડ ફ્લોર પર જઇને આ પુરાવાને જુએ. સ્પેશિયલ જજ વીએસ પદલકરે પણ પુરાવા વિશે જાણકારી મેળવી. સાક્ષીને પહેલા જૂટના બેગમાં બાંધેલ કાટ ખાઇ ગયેલી સાઇકલને બતાવાઇ. બાદમાં સાક્ષીને મોટરસાઇકલ ઓળખવા માટે કહેવામાં આવ્યું. જે બાદ સાક્ષીએ મોટરસાઇકલની ઓળખ કરી હતી.