ઉનાળામાં શરીરને જોઈતા મિનરલ્સ મેળવવા માટે તરબૂચ એક ઉત્તમ ફળ છે. સ્વાદની દ્રષ્ટિએ પણ ઉનાળામાં તરબૂચ ખાવાની મજા પડી જાય છે.
જ્યારે ગરમીનો પારો એકદમ ઊંચે પહોંચી જાય ત્યારે પરેશાન થઈને તમે શું કરો? ઠંડાં પીણાં કે શરબત કે ફ્રૂટ જ્યૂસ-મિલ્કશેક પીઓ યા પછી આઈસ્ક્રીમ ખાઓ. પણ આ બધાં જ કરતાં વધારે અસરકારક અને વધુ સ્વાદિષ્ટ અમે તમને કંઈક પીરસીએ તો? તો આજે બનાવી લો તરબૂચનું શરબત. આ નાના મોટા સૌને ભાવે છે અને બનાવવાનું પણ સરળ છે.
તરબૂચનું શરબત
સામગ્રી
-2 કિગ્રા તરબૂચ
-1 નંગ લીંબુ
-1 કપ બરફના ક્યુબ્સ
રીત
સૌપહેલાં તરબૂચ ધોઇને કાપી લો અને પછી તેના લીલા ભાગને કાપી નાખો. લાલ ભાગના નાના-નાના ટુકડા કરી મિકસરમાં ફેરવી લો. થોડા સમય પછી તરબૂચનો ગુદો અને રસ મિક્સ થઈ જાય ત્યારે તેને ગરણીથી ગાળી લો. આ રસમાં લીંબુ નિચોડી સારી રીતે મિકસ કરો અને ગ્લાસમાં નાખી જોઇએ એટલો બરફ નાખી સર્વ કરો. તમે ઇચ્છા અનુસાર ફૂદીનાના એક બે પાંદડાંથી સજાવી પણ શકો છો. આ શરબતમાં તમે ખાંડ પણ નાખી શકો છો.
કોઈ મહેમાન આવે તો પણ તમે ફટાફટ આ શરબત બનાવીને સર્વ કરી શકો છો. તે અન્ય પીણા કરતા એનર્જીથી ભરપૂર રહે છે અને તમે એક અલગ સ્વાદની મજા પણ માણી શકો છો.