નવરાત્રિ 2019 / પ્રથમ નોરતે બનાવો આ ફરાળી ડિશ, પેટ તો ભરાશે જ અને સ્ટેમિના પણ જળવાશે

ફરાળી બિરયાની મોરૈયામાંથી જ બને છે પરંતુ તેને થોડી અલગ રીતે બનાવવાથી તેનો ટેસ્ટ મોરૈયાથી અલગ બને છે. નવી ડિશ હોવાથી ઘરના દરેક સભ્યો તેને હોંશે હોંશે ખાઈ લે છે. ફરાળી બિરયાનીને ઉપવાસમાં પણ તમે પેટ ભરીને ખાઈ શકો છો. આ વાનગી તમારો સ્ટેમિના જાળવી રાખશે.

ફરાળી બિરયાની

સામગ્રી

-એક કપ મોરૈયો
-એક ટીસ્પૂન તેલ
-પા ટીસ્પૂન જીરું
-ત્રણ નંગ લીલાં મરચાં ઝીણા સમારેલા
-સિંધવ ફરાળી મીઠું સ્વાદ અનુસાર
-એક ટીસ્પૂન લીંબુનો રસ
-એક ટીસ્પૂન ખાંડ
-એક ટીસ્પૂન શેકેલી શિંગનો અધકચરો ભૂકો
-અડધી ટીસ્પૂન લાલ મરચું
-એક નંગ છીણેલું બટાકું
-એક ટીસ્પૂન તેલ
-પા ટીસ્પૂન જીરું

રીત

સૌ પ્રથમ એક પેનમાં તેલ લઇ જીરુંનો વઘાર કરો. લીલાં મરચાં અને શિંગનો ભૂકો નાંખી તેમાં છીણેલું બટાકું નાંખો. તેમાં સ્વાદ પ્રમાણે સિંધવ મીઠું નાંખી ચઢવા દો. બરાબર ચઢી જાય પછી તેમાં લીંબુનો રસ અને ખાંડ નાંખી હલાવો. ત્યારબાદ ખાંડનું પાણી બળે એટલે નીચે ઉતારી સાઈડ પર રાખો. હવે બીજી પેનમાં તેલ લઇ જીરુંનો વઘાર કરી લો. લીલા મરચા અને શિંગનો ભૂકો નાંખી બે કલાક પલળેલો મોરૈયો નાંખો. એક કપ મોરૈયો હોય તો એક કપ પાણી નાંખી ચઢવા દેવું. વચ્ચે જરૂર પડે તો બીજું પાણી નાંખવું. પણ બને તેટલો છૂટો થવા દેવો. ચઢી જાય એટલે તેમાં લીંબુનો રસ અને ખાંડ નાંખી બરાબર હલાવી નીચે ઉતારી લો. હવે એક બાઉલમાં છેક નીચે શેકેલી મસાલા શિંગનો ભૂકો અને ચપટી લાલ મરચું ભભરાવી તેની પર મોરૈયાનું એક લેયર કરો. તેની પર બટાકાની છીણનું લેયર કરો. તેની ઉપર ફરી મોરૈયાનું લેયર કરી બરાબર દબાવી લો. ધીમે રહીને એક સર્વિંગ ડિશમાં અનમોલ્ડ કરો. અને ગરમ ગરમ સર્વ કરો.