કોઈ પણ ઘરમાં ફૂલ થાળી બની હોય તો પણ કેટલાક લોકોને ચટણી ખાવાની આદત હોય છે. ચટણી એ એવી ચીજ છે કે તમે કોઈ પણ રસોઈમાં તેને યૂઝ કરી શકો છો. તેમાં પણ જો લીલી ચટણી કે લાલ ચટણીના બદલે તમને લસણની ચટણી મળી જાય તો તમને મજા પડી જાય છે. તમે તેને દાળ, શાકમાં મિક્સ કરીને કે પરોઠા સાથે પણ ખાઈ શકો છો. કોઈ ફરસાણ સાથે જો લસણની ચટણી મળી જાય તો તે વધારે ટેસ્ટી બને છે.
આ લસણની ચટણી બનાવવાની રીત સરળ છે. તમે તેને બનાવીને સ્ટોર કરી શકો છો અને સાથે જ જરૂર પડે શાક કે દાળના વઘારમાં પણ વાપરી શકો છો. તો આવો જાણીએ કઈ રીતે ઘરે બનાવી શકો છો લસણની ટેસ્ટી ચટણી.
સૌ પહેલાં એક પેનમાં તેલ ગરમ મૂકો. તેમાં ચપટી હિંગ અને લસણની કળી ઉમેરીને તેને 1 મિનિટ સુધી સાંતળી લો. હવે શિંગદાણા અને સૂકા લાલ મરચાં તેમાં મિક્સ કરી લો. હવે તેમાં સૂકા ધાણા, તલ અને ટોપરાનો ભૂકો મિક્સ કરો. બધી ચીજોને ધીમા તાપે શેકતા રહો. મિશ્રણ ગુલાબી રંગનું બનશે. હવે આ દરેક ચીજને ઠંડું થવા દો. જ્યારે તે ઠંડુ થાય એટલે તેને મિક્સરમાં ક્રશ કરી લો. તેમાં સ્વાદ અનુસાર મીઠું અને મરચું ઉમેરો. આ સૂકી ચટણીને તમે મિક્સરમાંથી એરટાઈટ ડબ્બામાં પેક કરીને સ્ટોર કરી શકો છો.
ટિપ્સ
જો તમે ઈચ્છો તો તેલ થોડું ઓછું પણ લઈ શકો છો. વધુ લાંબો ટાઈમ સ્ટોર કરવી હોય તો વધુ તેલ હશે તો વધુ સારી રહેશે.
તમે તમારા સ્વાદ મુજબ લાલ મરચું વધુ કે ઓછું ઉમેરી શકો છો.
તમારે લસણની ચટણીનો કલર વધુ લાલ કરવો હોય તો કાશ્મીરી લાલ મરચું ઉમેરો.
આ ચટણીમાં આમચૂર પણ સારું લાગે છે. જો તમને જરા ખટાશવાળો ટેસ્ટ ગમતો હોય તો તમે તે ઉમેરી શકો છો.
જો સૂકા ધાણા ના હોય તો ક્રશ કરવામાં ધાણાજીરુ ઉમેરી લો તો પણ ચાલે.