રેસિપિ / શ્રાવણના ઉપવાસમાં ટ્રાય કરી લો આ સ્ટેમિના વધારનારું શાક, પહેલા ક્યારેય નહી કર્યું હોય ટ્રાય

• બનાવી લો કાચા કેળાની ખાસ વાનગી
• સ્વાદ અને હેલ્થમાં રહેશે બેસ્ટ
• જાણો સરળ રેસિપિ

સામાન્ય રીતે ઉપવાસમાં રોજ એકના એક બટાકાની ભાજી અને સાબુદાણની ખીચડી ખાવનો કંટાળો આવે જ. ત્યારે ફરાળમાં પણ કંઈક નવું મળે તો ચોક્કસથી ઉપવાસ કરવાનું ગમે. બસ તો આજે જ નોંધી લો આ ખાસ રેસિપિ અને કરી લો ટ્રાય.

કેળાનું શાક

સામગ્રી

-બે નંગ કાચા કેળાં
-ચપટી હળદર
-બે નંગ લીલા મરચાં
-અડધી ટીસ્પૂન જીરૂં
-અડધી ટીસ્પૂન સિંગોડા લોટ
-એક ટીસ્પૂન કોથમીર સમારેલી
-એક ટીસ્પૂન દહીં
-એક ટીસ્પૂન લીંબુનો રસ
-એક ટીસ્પૂન તેલ
-પા કપ મીઠો લીમડો
-મીઠું સ્વાદ અનુસાર

રીત

કાચા કેળાંનું શાક બનાવવા માટે સૌપ્રથમ તેને છોલીને, કટ કરીને તેને મીઠાના પાણીમાં પલાળી રાખો. આમ કરવાથી તેનો રંગ બદલાશે નહીં. હવે તેને હળદરના પાણીમાં પલાળીને બાફી લો. કેળા સોફ્ટ થાય ત્યાં સુધી બાફો. હા પણ એ વાતનું ધ્યાન રાખવું કે તે વધારે પડતા ના બફાય જાય. હવે કેળામાંથી વધારાનું પાણી નીતારીને તેને એકબાજુ પર મૂકી દો. એક મિક્સિંગ બાઉલમાં દહીં, હળદર અને મીઠું ઉમેરીને બરાબર મિક્સ કરો. હવે એક નોનસ્ટિક પેનમાં તેલ ગરમ કરો. ગરમ તેલમાં જીરૂં ઉમેરો. જીરૂં લાલ થાય એટલે તેમાં મીઠો લીમડો અને લીલા મરચાં ઉમેરીને સાંતળો. થોડીક સેકન્ડ માટે સાંતળ્યા બાદ તેમાં દહીંવાળું મિશ્રણ ઉમેરો. દહીંમાં વઘાર બરાબર મિક્સ થઈ જાય એટલે તેમાં કેળા ઉમેરીને બરાબર મિક્સ કરો. કેળાં પર બધો જ મસાલો ચઢી જાય એટલે ગેસ બંધ કરી દો. હવે તેના પર કોથમીર, શિંગોડા લોટ અને લીંબુનો રસ ઉમેરીને બરાબર મિક્સ કરી લો. ગરમા-ગરમ શાકને સર્વ કરો. ઉપવાસમાં આ ફરાળી શાક ખાવાથી સ્ટેમિના બની રહે છે.