અષાઢ સુદ અગિયારસના દિવસથી એટલે કે બુધવારથી ગોરોનું વ્રત શરૂ થયું છે. તેરસથી એટલે કે આવતીકાલથી જયાપાર્વતીનું વ્રત શરૂ થઇ રહ્યું છે. આ સમયે નાની નાની બાળાઓ વ્રત કરે છે. છોકરીઓ વ્રતમાં ખાઈ શકે તે માટે તમે ઘરે જ શિંગપાક બનાવી શકો છો. ઝડપથી ઘરે બની જતી આ શુદ્ધ વાનગી સ્વાદિષ્ટ લાગે છે અને સાથે જ હેલ્ધી પણ રહે છે. તો નોંધી લો સરળ રેસિપિ અને ઘરે જ બનાવી લો આ વાનગી.
સૌ પહેલાં એક કડાઈ લો અને તેમાં શીંગને શેકી લો. હવે તેને ઠંડી થવા દો અને તેના ફોતરાં કાઢી લો. ઠંડી થાય એટલે તેને મિક્સરમાં ક્રશ કરી લો. હવે કડાઈમાં તેને શેકો. અન્ય ગેસ પર કડાઈ મૂકો અને તેમાં ખાંડ અને પાણીને ગરમ કરીને તેની ચાસણી કરી લો. ચાસણી તૈયાર થશે ત્યાં સુધીમાં શિંગનો ભૂકો પણ શેકાઈ જશે. હવે આ બંનેની સાથે તેમાં ટોપરું પણ મિક્સ કરી લો. તેને ઘી લગાવેલી થાળીમાં પાથરી લો. હવે તેને ઠરવા દો. ઠરી જાય એટલે તેના કાપા પાડીને તેને તૈયાર કરી લો. તેને તમે 15 દિવસ સુધી સ્ટોર કરી શકો છો.