ફરાળી વાનગી / ચૈત્ર નવરાત્રિના ઉપવાસમાં બનાવી લો આ ફરાળી કોફ્તા, મળશે નવો સ્વાદ

• ચૈત્ર નવરાત્રિના ઉપવાસે બનાવો ખાસ
• બનાવો કેળાના કોફ્તા
• નોંધી લો રેસિપી અને કરી લો ટ્રાય

સામાન્ય રીતે ઉપવાસમાં રોજ એકના એક બટાકાની ભાજી અને સાબુદાણની ખીચડી ખાવાનો કંટાળો આવે જ. ત્યારે ફરાળમાં પણ કંઈક નવું મળે તો ચોક્કસથી ઉપવાસ કરવાનું ગમે. તો આજે બનાવી લો ખાસ કેળાના કોફ્તા. પડી જશે ઉપવાસમાં પણ મજા.

કેળાંના કોફ્તા

સામગ્રી

કોફ્તા માટે

-ત્રણ નંગ કાચા કેળા બાફેલા અને છૂંદો કરેલા
-બે નંગ બટાટા બાફેલા અને છૂંદો કરેલા
-એક ટીસ્પૂન આદુંની પેસ્ટ
-એક ટીસ્પૂન જીરૂં પાવડર
-ત્રણ ટીસ્પૂન ચણાનો લોટ
-અડધી ટીસ્પૂન ગરમ મસાલો
-મીઠું સ્વાદ અનુસાર
-તેલ તળવા માટે

ગ્રેવી માટે

-બે ટીસ્પૂન આદુની પેસ્ટ
-પા કપ ટામેટાંની પ્યોરી
-એક ટીસ્પૂન જીરૂં
-એક નંગ તમાલપત્ર
-બે ટીસ્પૂન જીરૂં પાવડર
-એક ટીસ્પૂન ધાણા પાવડર
-એક ટીસ્પૂન હળદર
-બે ટીસ્પૂન લાલ મરચું પાવડર
-એક ટીસ્પૂન ગરમ મસાલો
-એક ટીસ્પૂન રાજગરાનો લોટ
-એક કપ ગરમ પાણી
-બે ટીસ્પૂન તેલ
-મીઠું સ્વાદ અનુસાર
-કોથમીર સમારેલી

રીત

સૌપ્રથમ તેલ સિવાયની કોફ્તા બનાવવા માટેની બધી જ સામગ્રી એક મિક્સિંગ બાઉલમાં બરાબર મિક્સ કરી લો. ત્યાર બાદ તેમાંથી કણક તૈયાર કરો. આ કણકના નાના-નાના બોલ બનાવો. હવે આ બોલને ગરમ તેલમાં મધ્યમ તાપે ડિપ ફ્રાય કરી લો. બોલ ગોલ્ડન બ્રાઉન રંગના થાય ત્યાં સુધી તળો. હવે આ કોફ્તાને એક પ્લેટમાં કાઢીને એકબાજુ મૂકી દો. હવે એક નોન સ્ટિક કડાઈમાં તેલ ગરમ કરો. ગરમ તેલમાં જીરૂં અને તમાલપત્ર ઉમેરો. થોડીક સેકન્ડ માટે સાંતળો. ત્યારબાદ તેમાં આદુની પેસ્ટ ઉમેરીને એકાદ મિનિટ માટે સાંતળો. હવે તેમાં હળદર, લાલ મરચું પાવડર, ધાણા પાવડર, જીરૂં પાવડર, ગરમ મસાલો અને મીઠું ઉમેરીને બરાબર મિક્સ કરીને 3થી 4 મિનિટ માટે સાંતળો. ત્યારબાદ તેમાં ટામેટાંની પ્યોરી ઉમેરીને બરાબર મિક્સ કરીને બીજી 5 મિનિટ માટે ચઢવા દો. હવે રાજગરાના લોટને ગરમ પાણીમાં ઉમેરીને ઘટ્ટ પેસ્ટ બનાવી લો. એ વાતનું ખાસ ધ્યાન રાખવું કે લોટના ગઠ્ઠા ના રહી જાય. હવે આ મિશ્રણને ગેસ પર ચઢી રહેલી ગ્રેવીમાં ઉમેરીને બરાબર મિક્સ કરી લો. થોડી વાર ચઢવા દીધા બાદ તેમાં તૈયાર કરેલા કેળાંના કોફ્તા ઉમેરો. બરાબર મિક્સ કરીને 4થી 5 મિનિટ માટે ચઢવા દો. ત્યાર બાદ ગેસ બંધ કરીને કોફ્તાને કોથમીરથી ગાર્નિશ કરો. ગરમા-ગરમ સબ્જીને સર્વ કરો.