રેસિપી / કરી લો ઉત્તરાયણની તૈયારી, બનાવી લો ઠંડીમાં રક્ષણ આપનારી આ ખાસ પૌષ્ટિક ચીકી

ડ્રાયફ્રૂટ ચીકી ખાવાથી બાળકોને અનેક પ્રકારના પોષક તત્વો પણ મળી રહે છે. આ સાથે તેના સેવનથી શિયાળાની ઠંડી સામે રક્ષણ પણ મળે છે. તો જાણો કેવી રીતે સરળતાથી તમે ડ્રાયફ્રૂટ ચીકી ઘરે જ બનાવી શકો છો. 

બદામ -કાજુ-પીસ્તાની ચીકી

સામગ્રી

-1 વાટકી ગોળ 
-1 વાટકી કાજુ-પીસ્તા 
1 વાટકી બદામ વચ્ચેથી અડધી કાપલી
-1 ચપટી કેસર 
-1ચપટી કેસરી ખાવાનો રંગ
-2 થી 4 ટીપાં કેસર એલચી એસેન્સ

રીત

સૌપ્રથમ કાજુ, બદામ, પીસ્તાના અધકચરા ટુકડા કરી લો. મિક્ષરમાં કરવો નહિ. શીંગ-કોપરું ખમણવાના હેન્ડ મિક્સરથી કરવો. જેથી તેલ છૂટું પડે નહીં. હવે કેસરને સહેજ તપાવી એક ચમચી પાણીમાં કેસરી રંગ નાંખી એકરસ કરી લેવું. ત્યાર બાદ એક જાડા તળિયાવાળી પેણીને ગેસ પર ગરમ કરવા મૂકવી. તે સહેજ ગરમ થાય કે તરત જ ફૂલ આંચે ગોળને ઝડપથી હલાવો. ગોળ ઓગળે કે તરત જ ગેસ બંધ કરી, તેમાં કાજુનો તથા પીસ્તા અને બદામને મિક્સ કરો. આ સાથે  કેસર નાખેલો કેસરી રંગ તથા કેસર એલચીનું એસેન્સ બે ટીપાં નાખી બરાબર હલાવવી તરત જ ઘી લગાવેલી થાળી પર ભાર દઈને પાથરી દો. પછી તેમાં મનપસંદ કાપા પાડી ચકતાને ડબ્બામાં ભરી ઉપયોગમાં લેવા. આ પ્રકારની ચીકી એકસામટી મોટા જથ્થામાં ન બનાવવી. ઉપર પ્રમાણે થોડું થોડું પ્રમાણ લઈ બનાવવાથી સરળતાથી અને સફળતાથી બનાવી શકાય છે. આ જ પ્રમાણ લઈ તલની, કાજુ-બદામની, સીંગ વગેરેની ચીકી પણ જુદાં જુદાં વેનીલા, રોઝ, પાઈનેપલ અથવા ઓરેન્જ એસેન્સનો ઉપયોગ કરી જુદી-જુદી વેરાયટીઝની કલરફૂલ ચીકી બનાવી શકાય છે.