અત્યારે ચોમાસામાં ગરમગરમ નાસ્તો ખાવાનું મન બધાંને થતું હોય છે. જેમાં ખાસ કરીને ભજીયા, દાળવડા મળી જાય તો મજા જ પડી જાય છે. ચોમાસામાં આજે અમે તમને એવો ટેસ્ટી અને ક્રિસ્પી નાસ્તો બનાવતા શીખવાડીશું, જે એકવાર ખાશો તો વારંવાર બનાવશો અને આ ખૂબ જ ઝટપટ પણ બની જાય છે. જેનું નામ છે સાબુદાણાની કટલેસ. આ ચટપટી કટલેસ ઓછાં તેલ અને સામગ્રીમાં તૈયાર થઈ જાય છે. ચાલો જાણી લો રેસિપી.
સૌથી પહેલાં એક બાઉલમાં પલાળેલાં સાબુદાણા નીચોવીને કાઢી લો. પછી તેમાં બાફેલાં બટાકાની છીણ એડ કરો. પછી તેમાં આદુ-મરચાંની પેસ્ટ, તજ, લવિંગ, મરીનો પાઉડર, રાજગરાનો લોટ, 1 ચમચી ખમણેલું સૂકું નારિયેળ, અડધાં લીંબુનો રસ, થોડી સમારેલી કોથમીર, મીઠું સ્વાદ પ્રમાણે, 2 ચમચી ખાંડ, શીંગનો ભૂકો અને કોથમીર નાખીને બધું બરાબર મિક્સ કરી લો. બાઈન્ડિંગ ન થાય તો 1-2 ચમચી વધારે રાજગરાનો લોટ નાખી મિક્સ કરો. પછી કટલેસનો તમને ગમે એવો શેપ આપી રાજગરાના લોટમાં ડીપ કરી પછી ફ્રાઈ પેનમાં તેલ ગરમ કરી સેલો ફ્રાય કરી લો. મીડિયમ આંચ પર બંને સાઈડ ગોલ્ડન બ્રાઉન થાય ત્યાં સુધી તળો. બસ કેચઅપ સાથે સર્વ કરો.